Read Western Dani 2 Peterut 1 Bible Online

2 Peterut 1 - Western Dani bible

2 Peterut 1

¹2 PETERUT At ninagap ndaka Yetut Keritut ninogoba Ala nogo nen nit obeelom eerogo pinanikit nduk, eereegerak paga wone abet mba'nuk, waganeegurak niniki kunik porogo wonogwe nogo, kit ninom ndak-ndak waganeegurak me, an Timon Peterut Yetut Keritut ayeloman ayonggo nappiigak mendek agago paneegerak nogo nen, kit abok aret wone ambi yokkira o.

²At ninogoba Ala ninowe Yetut imbirak iniki kunik nen wo'nirogwe, niniki ugun tayenak ale'nggen logowok nduk eeppinanugwi, eeko menggaarak nogo mondok liippunuk waganggwi kiigak, nggwok togon eeppinagit wundi wogo logowak o.

³At abu obeelom mondok tiyanak menggerak nogo, ninom ndak-ndak logowok nduk, ninayonggo pinaneegerak nit nogo nen at eeke menggerak liippunuk waganggwi paga, nit nggween paga yime logonet, Ala ari menggerak nogo liippunuk, eerit nogo logowok nduk, at omaawi eeppinaneegerak.

⁴At Ala abu obeelom mondok tiyanak menggerak me, at nen, “An ndogop eeppinagagin o,” yinuk, yo'nirage menggerak mondok iya iniki kunik nogo mendek, “Onggo lek we aret eeppinagagin o,” yinuk, yo'niragagerak wone nogo ti, mugurok nogwe paga at Ala iniki menggi kwak nit niniki ndak-ndak ee'ninake, ndi, it nggween paga mendek iniki nen nengge nogo mugurok nogo logonet, ineebe maluk eerogo patit nogo mengga kwak, nit togop ee'ninake kero, ninagap ndarogo pege, eeke nogo nit kaawok nduk, wone ti yo'niragagerak.

⁵Togop me, kit kiniki Ala oba panggombunuk abet mbakwi nogo paga obeelom eerit nogo logorak liippunuk mamunggologwe, ndi, obeelom eerit nogwe paga yi eeriyak ndi eeriyak kineenu eekkologwe,

⁶ndi, kineenu ogwe nogo paga nen kiniki warak eekkologwe, ndi, kiniki warak eekkologwe nogo paga maluk eeppinagagwi iigak, kiniki kwi'ndak nu'lek logorak mamunggologwe, ndi, kiniki kwi'ndak nu'lek wonogwe nogo paga Ala ari menggerak ndak-ndak eerit nogo logorak mamunggologwe,

⁷Ala ari menggerak ndak-ndak eerit nogwe paga kinoreewi inabuwa mbako logorak mamunggologwe, ndi, inabuwa mbakwi nogo paga irip paga aakumi abok aret kinom kiniki kunik eekkologo logorak mamunggologwe, eerit nogo logonip o.

⁸Ti eeko logorak nogo mendek abok aret nggwok togon eerit nogwe mban kiinok, aakumi nen, “Inowe Yetut Keritut ineenu kwe, anggen alik mendek yi'nage kiraap!” yinuk, yogo logogun lek o. Ata, “Inowe Yetut Keritut abet aret ineenu me, anggen obeelom mendek nggwok togon yi'nage agaarik o,” yinuk, yogo logogun o.

⁹Ndi, kit ti eeko logorak yokkiragarak nogo eeka'lek kiinok perak, “Ala nen ninomaluk lek eerogo pinaneegerak,” mbaka'lek mari eerogo punuk wonogwe me, aap inigen mbuk nen yi mendek ndi mendek nda nakkoorak meek nogo kokwak wonogwe kinombarugun o.

¹⁰Ti kenok, nowe-nawot o. At Ala nen miirogo pinagage nagagerik, kinayonggo pereegerak me, “Abet aret mii'ninabeegerak kogo,” mba'nuk, kiniki mondok nu'lek logonet, nggwiirit-nggwaarit eeko logonip. Togop eeko logomonggotak kenok, kit kiniyogobit lik togon yigeebu wambumunggup lek o.

¹¹Ti eeko logomonggotak kenok, nit ninagap ndaka ninowe Yetut Keritut abu'me piige menggim mondok-mondok menggim nogome, at Ala nen, “Kit aret unde eekkola woraanip o,” yinuk, yokkiraagin o.

¹²Togop me, Ala ndogop menggerak wone nogo kinaruk konembunuk waganggo nogogutik, mondok nu'lek monggotak kwe, kagak, ambinom liippunuk eerit nogo logobagip nduk, an nen kulinik-kalinik yokkiragak mban eeke logogin aret o.

¹³At ninowe Yetut Keritut nen an nagabolo ooliya wurik kwak yi, mbet-mbet nggonenogo punuk, noorak paganogo yo'negerak nogo ndak-ndak, nagabolo nggonenogo puurak eyom abu panggo yegerak neenu me, awo nagabolo nggonengga'lek neenik wonage logonet, yi wone ndi wone yokkirage minggirak nogo kit aberak logobagip nduk, an yokkirage logorak ti, op aret mbake agarik o.

¹⁵An kambiminggirak neegak, kit nen, “At ninogoba nogo nen wone ndogop yo'niragagerak nogo o,” yinuk, kiniki abeko logobagip nduk, an awo kangga'lek logonet, yi wone ndi wone yokkirage minggirak nogo, mondok nggwiirit-nggwaarit aret yokkirage logogin o.

¹⁶Nit ninowe Yetut Keritut, “Wi,” yinuk, pi wakwi iigak woroorak wone yokkirogogurak nogo ti, it aakumi nen timbayok wone mbininggo logonet, inoone amburu ndik-ndik yogo menggaarak nogo paga niniki panggombunuk yokkirogo logolik o. Ata, at Yetut Keritut mondok tiyanak lombok menggerak ninigen abe nen kogogurak nogo aret yokkirogogurak o.

¹⁷ Keritut ninom puut ayuk warak menggim nogome niigak, at mondok tiyanak, “Wi!” ugwi ninogoba Ala nogo nen ninowe Yetut Keritut ayuk wurogo tiyappege logonet, “An naput niniki kunik nale'nggen ee'nake nogo yi aret o,” yinuk, mbogut paga nen oone ari nit aret ninaruk konembunuk, yokkirogogurak nogo o.

¹⁹Ti yereegerak kenok, o maan it aap Ala nen wone yorage kagak yorogo nogogwaarak nogo a'me lik yi wagak eeke kogo nogogurik, nit niniki abet mbakwi nogo, mondok nu'lek eerogo pinanegak eeke kogogurak o. O weerikit nduk, kilim nagake kagak, ndowan ambiret abinak ndelenak-welenak ari kogo monggoorak nogo, wundi waga'lek kagak, o apit me ndi wuninogo pogootak eya kenok, niniki ale'nggen age menggi kwak, kinikime awo eya eekkinabi waga'lek kagak, wone yo'nirogo nogogwaarak nogo kiniki kunik eekkologo logonet, liippogo logorak ti, op lombok aret o.

²⁰Wone yi ti, mondok iya me, liippinip o. Aap ambi Aberiniki nen koonogo yoga'lek kagak, “Ala wone liiru mbanak nogo, niniki koombunuk, ambi yokkira o,” yinuk, yuurak ti, abu meek me,

²¹it aap aa'nduk Ala wone yorogo nogogwaarak nogo nen iniki koombunuk yorogo logolik o. Ata, Aberiniki inikime lik yi unggwage mbareegi, Ala nen yorage kagak yorogo nogogwaarak nogo kineenu arubagip nduk yokkiragi o.