Read Western Dani 1 Yaya 5 Bible Online

1 Yaya 5 - Western Dani bible

1 Yaya 5

¹Kit nen, “Yetut ti, Keritut aret o,” yinuk, abet mbakwi kiinok, Ala nen aret ndakkinabeegerak me, kit at apuri aret ogotik o. Ndi, kinogoba Ala kiniki kunik eekwi kiinok ti, apuri ndarak nogo inom kiniki kunik eeginako logorak me,

²nit nonggop eekwi paga Ala apuri niniki kunik aganakwi nineenu ariyak mbakop? Lek o. Ala nen, “Yogop ee'nu, ndogop ee'nu,” wone yo'nirage nogo eeko logonet, Ala niniki kunik eekwi ti paga at apuri niniki kunik aganakwi mbako monggoorak.

³ At Ala niniki kunik eekwi nogo ti, at nen, “Yogop ee'nu, ndogop ee'nu,” yinuk, wone yo'nirage eekwi nogo ti aret. Ndi, at Ala nen wone, “Yogop ee'nu, ndogop ee'nu,” yo'nirage nogo ti, aaninggin lek aret o.

⁴Nit Ala nda'ninabeegerak nogo nen it aakumi nggween paga mendek mban mugurok nogwe nogo tebenogo piigo monggoorak. It aakumi nggween paga mendek mban mugurok nogwe tebenogo piigwi nogo ti, nit abet mbakwi paga nen aret tebenogo piinok, nit tiyanak aret ogoorik.

⁵Taani nen it aap nggween paga mendek mban mugurok nogwe nogo, tebenogo piigo menggaarak mbakop? Lek o. Nit nen, “Yetut ti, Ala aput aret o,” yinuk, abet mbakwi nogo nen aret tebenogo piigo monggoorak kogo o.

⁶At niyome wuppege kogogurak nogo inom, ndi, kangge logonet, amiya wangge kogogurak nogo inom, ti, Yetut Keritut eebe aret o. Niyome wuppege kogogurak nogo mban ti lek o. Ata, at amiya wangge nogo inom kogo nogogurik, “Yi Yetut Keritut abet aret o,” yinuk, mbareegurak. Ndi, Aberiniki nogo ti, Ala ari menggerak ndak-ndak abet mban ari menggerak me, at nen kunduk, “Yi Yetut Keritut abet aret o,” yinuk, abok paganogo yo'nirage menggerak.

⁷Togop me, Aberiniki nen yo'nirage inom, niyome wuppege kogogurak nogo inom, ndi, amiya wangge ninigen kogogurak nogo inom, wone kenagan ti aret eereegerak kwe, alom ambit, “Yetut ti, Keritut aret o,” yinuk, nineenu aruwok nduk, eereegerak.

⁹Aakumi nen paganogo yo'nirogwe iinok ti, abet mba'nuk woorak op mbakwi kwe, nit abet mbaruwok nduk Ala nen alom kenagan paga, “Yetut ti, an naput aret o,” yinuk, eereegerak ti, mondok iya me, “Yi abet aret o,” yinuk, waganggo logowok o.

¹⁰Nit niniki Ala aput oba panggombunuk, abet mbakwi niinok, ninikime nen, “Yi Ala aput abet aret waganggoorak kogo o,” yinuk, mbako logogun o. Ndi, it Ala abet mbaka'lek logonet, at aput iniki oba panggombunuk, abet mbaruwak nduk, paganogo yoragagerak nogo, abet mbaka'lek me, Ala pilit pugungga negen agago pogo logogun o.

¹¹ At Ala nen wone paganogo yo'niragagerak nogo yi aret o. Nit nineenik mondok-mondok logowok nduk, Ala nen nabelan-kabelan wo'niragagerak me, at aput waganggwi niinok, nit mondok-mondok nineenik logogun ti aret.

¹²Nit Ala aput waganggwi niinok, nineenik mondok-mondok logogun kwe, wagangga'lek niinok perak, nineenik logogun abu lek aret o.

¹³Kit kiniki Ala aput oba panggombunuk abet mbakwi nogo, Ala nen kineenik mondok-mondok logorak unde eeppinagareegerak kineenu arubagip nduk, liiru yi mbanggiragi o.

¹⁴At Ala iniki mbake nogo ndak-ndak wo'niraawak nduk, nggino yogwi niinok, at aruk konembunuk, wo'nirage menggerak nineenu me, ninagabiti mbaka'lek, “Wo'niraagin aret,” mba'nuk, at nggino yogo logowok o.

¹⁵Nit nen at nggino yogwi nogo, at abet aret aruk konengge menggerak nineenu me, wo'niraawak nduk, nggino yogwi nogo ti, “Wo'niraagin aret,” mbako logowok o.

¹⁶Aap ambi nen maluk eeriyak iniki miippatinuk eerit nage kinigen kogo logomonggotik, at kani omoonu'me noorak nduk, eekwi nogo mendek eerit nage me, ake Ala yorubagip nduk, yokkirage ti lek o. Ata, kinore ambi Ala nen ninomaluk lek eerogo pinaniyak nogo mendek eeke kinigen kogwe kenok, Ala nen omaluk lek eerogo punuk, eenik mondok logorak mendek unde logowak nduk, “Ake Ala yogo logonip o,” yinuk, yokkiragi o.

¹⁷Yi maluk ndi maluk eekwi nogo ti, abok endage maluk aret kwe, ambi kani omoonu'me noorak nduk, miippunuk eekwi nogo mendek wonage kenok, yokkiragi o, noreewi.

¹⁸Aap ambi Ala nen ndareegerak kenok, at maluk eerit nageelik ti, nineenu aret o. Ala aput Yetut nen aap ti, liirogon aret porogo menggerak me, at maluk eeka nogo nen aap ti, maluk eeppuurak mondok meek aret o.

¹⁹Yi aakumi ndi aakumi maluk eeko menggaarak nogo abok aret at maluk eeka Tile nogo abu'me wonogwe nineenu kwe, nit perak, Ala apuri aret ogoorik o.

²⁰At Ala aput wambi wage nagagerik, Ala ambit alik lombok menggerak nogo nit liippuwok nduk nineenu eeppinaneegerak o. Ndi, at alik lombok menggerak Ala aput Yetut Keritut imbirak ninom niniki ambit kunik aret ogoorik o. At Yetut Keritut ti, at alik lombok menggerak Ala nogo aret me, nineenik mondok logorak unde eeppinanege menggerak alom at aret o.

²¹Napuri niniki kunik yi wa! At Ala alik lombok menggerak nogo mbo punuk, obaane'me alik ambi mippunuk, alut eekwi kiyo, liippogo logonip o. Abu aret yokkiragi o. Napuri wa!