Read Western Dani Owak Loongga 1 Bible Online

Owak Loongga 1 - Western Dani bible

Owak Loongga 1

¹OWAK LOONGGA WONE Aap Yotuwa kangge mbareegi, it aap Iterali nen at Aliku ALA yogo logonet, “It aap Kanan ninom wim namburi noorak nduk, inaa'ndugak noorak nogo ti, inanebunu taani o?”

²Yogo mbareegwa, at Aliku ALA nen yorage logonet, “It aakumi Kanan mendek inanggween ti, it inanebunu Yekura nogo muk wogoragagirak me, it inaa'nduk aret nawak o,” yinuk, yoragagerak.

³Yorage mbareegi, it Yekura mendek nen inoreewi inanebunu Timeyon mendek nogo yorogo logonet, “Nggween mbanogo pinaneegim time it aakumi Kanan mendek wonogwe ti, mugogo wumbiyaawok nduk, kit ninom nawi o. Ninom nogwe niinok, peebi nen kit ninom a'nuk, kinanggween mbanak me time it Kanan mendek wonogwe ti, mugogo wumbiyaawok nduk woraawok o,” yinuk, yorogo mbareegwa, it Timeyon mendek nogo inom aret wim eeri nogogwaarak.

⁴Eeri nogo nogogwaarik, inom wim nambukwi iigak, at Aliku ALA nen aakumi Kanan mendek inom, Perit mendek inom, it ineenggime piige mbareegi, o Mbetek time aakumi ineebe sepuluh ribu aret inoorogo piyareegwaarak.

⁵Inooko logonet, o Mbetek time aap Kanan mendek inowe endagembogut Aroni-Mbetek inom lambunggo nogogwaarik, at inom wim nambuko logonet, it aap Kanan mendek inom, aap Perit mendek inom, abok aret mugogo wumbiyareegwaarak.

⁶Wumbiigo mbareegwa, aap Aroni-Mbetek nogo mbaganit nage me, mugurok nogo logonet, eebe pippunuk, eenggi iyagalo imbirak inom, iyok iyagalo imbirak inom, mbanogo pereegwaarak.

⁷Mbanogo pogo mbareegwa, at Aroni-Mbetek nen ari logonet, “An nen aap inendagembogut lombok ineebe 70 nogo ineenggi iyagalo imbirak inom, iniyok iyagalo imbirak inom, mbanogo piyareegirak wonogo logonet, nambi nengge neegak, nageyo ndoonak abu'me ameneno wanggetak anebenogo nonggo nogogwaarak nogo ndak-ndak, Ala nen inamee'nggo ee'naki o,” yinuk, ari mbareegi, at eebe o Yerutalem wonok nogogwaarak me, time aret kambeegerak.

⁸Ti eeppunuk, it Yekura nen o Yerutalem mendek oba kwi'nari unggwogo logonet, o kani mbelanggwi, inawooluwak paga aakumi inookwi, eeppunuk, tebenggologogwaarak.

⁹Tebenggologo nogogwaarik, it aap Yekura nogo nen aakumi o Kanan puut nggelok-nggobok me wonogwe nogo inom, o karu nabunogo pereegim o ame pa'nggwe wonogwe nogo inom, puut ogobak mbanogo pit nagagim wonogwe nogo inom, inom wim eereegwaarak.

¹⁰It inanebunu Yekura nogo nen inoorit nogo logonet, aakumi Kanan mendek o Keboron, aa'nduk endage Kiriyat-Araba toonak nogome, it aakumi Tetayi mendek inom, Akiman mendek inom, Talamayi mendek inom, tebenogo piinet nogogwaarak.

¹¹Ti'nuk, o time mbo punuk, it aap Yekura nogo nen it aakumi o Ndebit, aa'nduk endage Kiriyat-Tepet yogo nogogwaarak nogome wonogwe me, wim eeri nawok nduk, eeko logonet,

¹²at Kalep nen, “Aap ta nen it Kiriyat-Tepet mendek inoorogo piinok, o nogo tebenogo pege kenok ti, napuluk kolaga Akata nogo at akwe kolaawak nduk, wogorigin o,” yinuk, yereegerak.

¹³Ari mbareegi, aap Kalep nogo awuluk Kenat aput endage O'niyen nen o kota ti, tebenogo pege mbareegi, Kalep nen apuluk kolaga Akata nogo at O'niyen akwe kolaawak nduk, wogoreegerak.

¹⁴Wogoge mbareegi, ogonggelo ka wagagerak nogo eyom paga kwe nogo nen ogonggelo yoge logonet, “Nogoba anggween mbanak ambi wo'niruwak nduk, yori nawi o,” yinuk, nogo nogogwaarik, kwe nogo keledai amborowak paga nen nggween paga wambi wage mbareegi, at ogoba Kalep nen yoge logonet, “Kat nonggop eeppagarak, mba'nuk wagan o?” Yoge mbareegi, at kolaga nen,

¹⁵“Nogoba o. Kat o karu nabunogo pereegim o ame pa'nggwe nggween amburu lek mbuk mendek wo'negendak tit kwe, an kapuluk nabuwa mbake logonet, niyo eneerime kero ambi inom wo'niru o.” Yoge mbareegi, at Kalep nen anggween mbanak niyo eneeri agi nggwe wungge me inom, ogu nggwe wungge me inom, imbirak wogoreegerak.

¹⁶Aap Keni mendek Muta aru endage Kobap ombowologwe wiganak nogo, it Yekura mendek inom o Nggabunggaame nen it aakumi Yekura inanggween mbanak me karu nabunogo pereegim o ame pa'nggwe o Arat koorok wonogwe time inom logowok nduk, nogogwaarak.

¹⁷Nogo nogogwaarik, it inoreewi anebunu Timeyon mendek inom nogo logonet, aap Kanan mendek o Tepat wonogwe nogo abok aret inoba kwi'nogo logonet, inawi kota nogo mondok pup eerogo piyareegwaarak. Ti paga o Tepat nogo endage, Lek Eerogo Piyareegim o, yogo nogogwaarak.

¹⁸Piigo nogogwaarik, it aap Yekura mendek nen o kota-kota Nggata inom, Atekelon inom, Ekoron inom, tebenggologo logonet, inanggween enaagan-ambokan wonage nogo inom aret kologogwaarak.

¹⁹It aap Yekura nogo at Aliku ALA inarum wonage kagak, o nggelok-nggobok time ye mbanggologogwaarak kwe, it aakumi kobappaga time wonogogwaarak nogo perak, inanggweendo wim eeka mbuti mendek ogobakkigirik wonage me, mugogo wumbiyoorak meek aret agagerak.

²⁰ At Muta nen, “O Keboron wokkirigin o,” yinuk, aa'nduk aap Kalep yoreegerak nogo ndak-ndak aret, Kalep wogoge mbareegi, aap Enak apuri ineebe kenagan nen wiganak nogo mugogo wumbiyareegwaarak kwe,

²¹ it inanebunu Mbeniyamin mendek nen perak, it aakumi Yebut mendek o Yerutalem wonogogwaarak nogo mugogo wumbiyoolik me, it inom lambunik yogondak kuli wonogwe aret o.

²²At anebunu Yutup ombowologwe wiganak nogo nen o Mbeten, aa'nduk endage Lut yogo nogogwaarak nogo mendek inom wim eeruwok nduk, eekugak, at Aliku ALA inarum wonagagerak nogo yi o.

²³Inoreewi ando o nogome inigen lomboppiya nawak nduk, nappiyareegwaarak nogo nogogwaarik,

²⁴aap ambi o time nen wundi wage inigen kogo nogogwaarik, yogo logonet, “Nit nonggoti agago o kota yime unggwi noorak nogo yo'nirage kenok, Nit ninore o, yinuk, teppagagun o.”

²⁵Yogo mbareegwa, at nen, “Tu ti paga unggwi nanip o,” yorage mbareegi, it inoreewi iigak nogogwaarak nogo, abok aret iniya nogo mbareegwa, inom unggwogo nogogwaarik, it aakumi o Mbeten mendek nogo abok aret inawooluwak paga inooko logonet, aap tu yoragagerak nogo owe-awot inom mban mbaganuwak nduk, teppiigo mbareegwa,

²⁶it aap nogo aakumi Ket mendek wonogwe me nogome nogo nogogwaarik, time o wureegwaarak kota agagerak me, o nogo endage Lut tooneegwaarak. Ndi, o ti, o yogondak kuli endage Lut yogwe wonogwe aret o.

²⁷ It aakumi Kanan mendek nogo inogogumbuk puk aret ogogwaarak me, inanebunu Manate mendek nen it aakumi o kota Mbet-Teyan inom, Taanak inom, Ndot inom, Yibeleyam inom, o Megiro inom, inawi enaagan-ambokan abok aret mugogo wumbiyoolik teppiyareegwaarak.

²⁸Teppiigo nogogwaarik, it aap Iterali inomaawi ogo logonet, it aap Kanan mendek mugogo wumbiyoolik teppiinok, inake yabu eeko logowak nduk, inayeloman eerogo piyareegwaarak.

²⁹ Inanebunu Eparayim mendek nogo nen kunduk, aap Kanan mendek o Nggetet wonogwe nogo time nen mugogo wumbiyoolik inom mondok aret wonogogwaarak.

³⁰It inanebunu Tebulon nogo nen it aap Kanan mendek o Kitoron inom, Nakalon inom, mugogo wumbiyoolik inom wonogwe nogo inake yabu eeppiigo logowak nduk, inayeloman eerogo piyareegwaarak.

³¹Ndi, inanebunu Atet mendek nogo nen it aakumi o Ako inom, Tiron inom, Akalap inom, Akitip inom, Kelaba inom, Apek inom, Erekop inom, it aakumi o time wonogwe nogo abok aret mugogo wumbiyoolik me,

³²it aakumi Kanan mendek inaworak ti, it Atet mendek inom aret inenggela'me wonogogwaarak.

³³It Natali mendek nen it aakumi Kanan mendek o Mbet-Temet inom, o Mbet-Anat inom, wonogwe nogo mugogo wumbiyoolik me, it Kanan mendek inaworak nogo it Natali inom logonet, inake yabu eeko logowak nduk, inayeloman eerogo piyareegwaarak.

³⁴Ndi, it aap Amori mendek nen inanebunu Ndan mendek nogo, yorogo logonet, “O kobappaga yime wambi woroorak lek o. Ata, puut nggelok-nggobok me time mban awiirak logonip o.” Yorogo nogogwaarik,

³⁵it aap Amori mendek nogo inogogumbuk aret puut Keret inom, o Ayalon inom, o Taalibim inom, “Nit yime mban logowok o,” yinuk, inoone omaawi paga yorogo nogogwaarik, time aret wonogogwaarak kwe, it Yutup ombowologwe wiganak nogo nen inomaawi ogo nogogwaarik, it Amori mendek nogo kunduk, inake yabu eeko logowak nduk, inayeloman eerogo piyareegwaarak.

³⁶It aakumi Amori mendek inanggween mbanak wonagagerak kuli ti, puut Akirabim yenggen me panggombunuk, o Tela nen nok, o omarip paga pa'nggwe kuli aret wonagagerak.