Read Western Dani Owak Loongga 10 Bible Online

Owak Loongga 10 - Western Dani bible

Owak Loongga 10

¹Aap Abimelek nogo kangge mbareegi, aap Itakat mendek endage Ndoro ombooluk Puwa aput Tola nogo nen aakumi Iterali inagap ndaruwak nduk, mi'nagagerak. Mi'nage nagagerik, o Eparayim puut nggelok-nggobok me o Tamit time aret wonagagerak.

²Aap Tola nogo aakumi Iterali inarum wonage logonet, inowak loongge kagak, tahun 23 eeppunuk, kangge mbareegi, o Tamit paga nggween taambereegwaarak.

³Taambogo mbareegwa, obaane'me aap Yayit o Nggileyat mendek mi'nage nagagerik, aakumi Iterali inarum wonage logonet, inowak loongge kagak, tahun 22 aret eereegerak.

⁴At apuri ti, 30 aret ndaganabeegerak. Ndi, o Nggileyat paga inawi ti, 30. Ndi, inaanggumi keledai awooluk ti, 30 togop aret wonagagerak me, inawi 30 nogo ti, “Aakumi Yayit wonogo menggam o,” yinuk, o yogondak yogwe wonogwe aret o.

⁵Aap Yayit nogo kangge mbareegi, o Kamon paga nggween taambereegwaarak.

⁶It aakumi Iterali nogo at Aliku ALA enegen kagak, maluk ambinom eeko logonet, kugi Mba'an inom, kugigwe Atitoret inom, aakumi Aram mendek inagugi inom, aakumi Tiron mendek inagugi inom, aakumi Mowap mendek inagugi inom, aakumi Amon mendek inagugi inom, aakumi Pilitin mendek inagugi inom, apit aret Ala obaane'me mippunuk, inayuk wuko logonet, mugurok nogo nogogwaarak. At Aliku ALA nogo mugurok naga'lek, inambokan monogo punuk, wonogo mbareegwa,

⁷Aliku ALA anini aakumi Iterali inoba piige nagagerik, ineebe waganogo aakumi Pilitin mendek inom, Amon mendek inom, ineenggime piyareegerak.

⁸Piige mbareegi, tahun ti paga it aakumi ti nen Iterali inabu'me tebembiigwi, iniyok aan lebenogo negen piigwi, eeko logonet, it aakumi Iterali oonegen wundi wage menggim pa'nggwe niyo Yoraran ene paga aakumi Amori inanggween o Nggileyat paga wonogwe nogo, inabu'me tebembiinok, aaninggin-paaninggin inoba piigwi, ti'nuk, aakumi Amon mendek nen kunduk, niyo Yoraran mbanogo yi paga wunda woraanuk, inanebunu Yekura mendek inom, Mbeniyamin mendek inom, Eparayim apuri wiganak mendek inom, abok aret inookwi, eekwi iinok, aakumi Iterali nogo nen, “Nonggop eekkoloobok,” lombok age kagak, tahun 18 aret eereegerak.

¹⁰Eeke mbareegi, Iterali nen inoone nggwok paga at Aliku ALA yogo logonet, “Nit nen kat ninogoba Ala mbo pagago nogoorik, kobaane'me kugi Mba'an mippunuk, mugurok nogo nogoorak nogo ti, maluk lombok eeppagagoorak o,” yoreegwaarak.

¹¹Yoreegwaarak kwe, at Aliku ALA nen aakumi Iterali nogo yorage logonet, “Aakumi o Metit mendek inom, Amori mendek inom, Amon mendek inom, Pilitin mendek inom,

¹²Tiron mendek inom, Amalek mendek inom, Mawon mendek inom, it apit nen kit tebembinagago wonogwe iinok, kit nen, Yeenggwa niret o, yo'nogo mbareegup, kinagap ndarulik mbo pinagage neyareegutak mbakop?

¹³Mbo pinagulik aret kwe, kit nen perak, an mbo panugo nogotik, nobaane'me alik mendek mippunuk, mugurok nogo nogotak me, an nen kinagap ndarigin abu lek o.

¹⁴Kit aaninggin kinoba wonage kenok, kinagugi miikkologotak nen kinagap ndakkinabuwak nduk, nggino yori nogo logomunggup o.”

¹⁵Yoragagerak kwe, it Iterali nen Aliku ALA yogo logonet, “Lek o. Nit abet aret maluk eekoorak me, kat op eeppinaniyak ninombakendak nogo aret eeppinaniyak kwe, yogondak perak, mbo pinaniyak ti mage o. Ata, yeenggwa niret o, ninogoba.”

¹⁶Yogo nogogwaarik, aakumi alik mendek inagugi inenggela'me wonage nogo mbo pogo nogogwaarik, at Aliku ALA nogo mugurok nogogwaarak. Mugurok nogo mbareegwa, it aaninggin-paaninggin inoba wonogwe nogo Aliku ALA nen, “Kinobaalombok o,” yinuk, mbo piyoolik yeenggwaaragagerak.

¹⁷Ti'nuk, inanebunu Amon mendek nen Iterali inom wim namburuwok nduk, mi'nogo nogogwaarik, o Nggileyat paga inawooliya wukkola wogo mbareegwa, Iterali mendek kuwak eeppunuk, o Mitapa paga inawooliya wukkola nogogwaarak.

¹⁸Togop eekwi iigak, aap inoweewi Nggileyat mendek nen at ambi yogak eeko logonet, “Aap ta nen agabiti mbaka'lek aa'nduk a'nuk, aakumi Amon inom endok kuni unggwage kenok, nit aakumi Nggileyat mendek apit aret at ninowe ninarum aret logowak o,” yinuk, yogogwaarak.