Read Western Dani Owak Loongga 11 Bible Online

Owak Loongga 11 - Western Dani bible

Owak Loongga 11

¹Aap ambi Nggileyat mendek endage Yepata wim nambuka wakaa'ngget lombok aret wonagagerak. At ogoba endage ti, Nggileyat. Ndi, agalo perak, kwe ya wukak nogo mendek wonagagerak.

²Aap Nggileyat akwe abe wogo nogo nen aagalogwe aap Nggileyat obaane'me ndaganabeegerak nogo tawe ogo nogogwaarik, Yepata nogo yogo logonet, “Kat kwe alik mendek aagaluk me, ninogoba eyate nit kologo logonet, kat inom wokkiriyak abu lek o.”

³Yogo mbareegwa, at Yepata nogo oreewi inenggela'me nen mbaganit o endage Top time ye mbanggola nage nagagerik, wonage logonet, aakumi maluk eeppiiga mendek inom age nagagerik, yogoot kumaarit nugu nogogwaarak.

⁴Ti'nuk peebi, aakumi Amon mendek nogo aakumi Iterali mendek inom wim nggagambunuk,

⁵aap Nggileyat mendek inoweewi nogo nen at Yepata o Top wonage me, wa nogo nogogwaarik,

⁶yogo logonet, “Kat ninawuri yigin unde inarum logonet, ninawim wone mbangge keegak, aakumi Amon ninom wim nambuko logowok nduk, wokkabi wogoorak me, ninom nawi o.”

⁷Yoreegwaarak kwe, Yepata nogo nen wone onggo it yorage logonet, “An, Kineebi, nombako nogogutik, nowe-nawot inenggela'me nen mugogo wumbani wogogutak kit aret nogo lek a? Kit aret kwe, o yogondak aaninggin-paaninggin kinoba agaarak kenok, an mu'niren wogotak ya?”

⁸Yorage mbareegi, it aap Nggileyat mendek inoweewi nogo nen at yogo logonet, “Yagandak ti, abet aret kwe, ninom nogo logomonggoorik, aakumi Amon mendek kinom wim eeke keenok, nit aakumi Nggileyat mendek apit aret ninarum logorak mippagawok nduk, o yogondak ninom nawok nen wokkabi wogo o.”

⁹Yogo mbareegwa, at Yepata nen it yorage logonet, “Kit nen wo'nabi wogotak ninom nogo logomonggoorik, aakumi Amon ninom wim eekwi niigak, at Aliku ALA nen waganogo an neenggime pege kenok, kit nen an kinowe logorak mippaniyak ti, abet aret yogop a?”

¹⁰Yorage mbareegi, it nen at yogwi, “Nit yogwe niigak, at Aliku ALA aruk konenggerak me, kat yo'niragandak nogo ti, ndak-ndak aret eeppagagun o.”

¹¹Yogo mbareegwa, aap Yepata nogo aap inoweewi nogo inom wogo nogogwaarik, it inarum logonet, inawim wone lenggangge logowak nduk, inowe mippereegwaarak. Mippogo mbareegwa, Yepata nogo nen wone kooniyak ambi oba age kenok, Aliku ALA enggaanom paga o Mitapa time yori nage nagagerak.

¹²Ti'nuk, aap Yepata nogo nen aap Amon mendek inowe endagembogut nogo yori nawak nduk, wone eerogo nappiige logonet, “Nit alom nano eekoorak paga ninom wim eeriyak nduk, ninawi paga unggwi wagandak?”

¹³Yinuk, wone eerogo nappiyareegerak yori nogo mbareegwa, aap endagembogut Amon mendek nogo nen aap Yepata wone eerogo nappiyareegerak nogo yorage logonet, “It aakumi Iterali o Metit nen wundi wogo nogogwaarik, nit ninanggween niyo Aronon kuli nen nok, niyo Yabok nen nok, niyo Yoraran kuli abok aret ndinggologogwaarak nogo kiniki abe paga ninanggween unde wo'niraanip o.”

¹⁴Yinuk, wone eerogo nappiya wagagerak nogo at Yepata yogo mbareegwa, at nen aap endagembogut Amon mendek nogo ambinom yori nawak nduk,

¹⁵wone eerogo nappiige logonet, “Aakumi Iterali nen aap Mowap mendek inanggween inom, aap Amon mendek inanggween inom, it ndinggoloolik o.

¹⁶Aakumi Iterali o Metit nen wundi woraanuk, wogo logonet, tu karume paga nen niyo yenggenak Laut Merah pa'nggwe ari wogo nogogwaarik, o Kareti aret wogogwaarak o.

¹⁷ Wogo nogogwaarik, aakumi Iterali nogo tu aap endagembogut o Erom mendek anggween ti paga woroorak nggino yoruwak nduk, yonggo nappiya wogogwaarak yori wogogwaarak kwe, aap o Erom mendek endagembogut ti nen, Naruk koneniyak neebi o, ari mbareegi, ti'nuk, aap Mowap mendek inowe endagembogut wonage me, tu ti paga woraawok nduk, wone eerogo nappi wogogwaarak kwe, aap ti kunduk, E o, yoraga'lek mban mbareegi, Iterali nogo o Kareti time puk wonogogwaarak.

¹⁸ Time wonogogwaarik, ti'nuk, it tu karume paga wogo nogogwaarik, aap Erom inanggween inom, aap Mowap inanggween inom, kuli mbanak tu ti paga aap Mowap inanggween oonegen wundi wage menggim pa'nggwe keyokkagak niyo Aronon wunda wogo nogogwaarik, time inawooliya wukkologogwaarak. Niyo Aronon ti, aap Mowap mendek inanggween kuli aret me, aap Mowap inanggween ti paga unggwi woroolik.

¹⁹ Ti'nuk, aakumi Iterali nen wone eerogo aap Amori mendek inowe endagembogut Tikon arum menggim o Ketibon wonage me, wone eerogo nappiya wogo logonet, “Nit noorak mbakom nawok nduk, tu kat kanggween ti paga woroorak op aret ilik?” Yoruwak nduk, nappiya wogogwaarak yori wogogwaarak kwe,

²⁰aap Tikon nogo nen iniki mbake logonet, It Iterali tu an nanggween yi paga woroorak yagaarak ti, we woroorak lek ambi eeppinaniyak nduk woroorak yagaarak kulik? Mbake nagagerik, iniki yungguppegak eeke nagagerik, aakumi at awuri abok aret kuwak eeppiinok, o Yakat paga inawooliya wukkola nogo nogogwaarik, Iterali inom wim nambukkologogwaarak.

²¹Nambukkologogwaarak kwe, at Aliku Iterali inogoba Ala nen aap Tikon inom, at awuri abok aret inom, waganogo Iterali ineenggime wogorage mbareegi, inoorogo piigo nogogwaarik, aakumi Amori time wonogwe nogo inanggween abok aret it Iterali aret kologogwaarak.

²²Inanggween kologogwaarak kuli ti, niyo Aronon nen nugwa niyo Yabok kuli inom, o karume nen nugwa niyo Yoraran kuli inom, abok aret unde eeppatinuk, logowak nduk, kologogwaarak.

²³At Aliku Iterali inogoba Ala nen aap Amori mendek inanggween nogo aakumi Iterali unde logowak nduk, aap Amori mendek mugogo wumbiinok, ndinogo wogoragagerak wonogwe iigak, alom nano paga kat nggween ti, woorak nduk, ari agandik?

²⁴Kat kagugi Kamot nogo nen iniki koombunuk, wokkege nogo, Op aret o, yinuk, wagangge menggendak nogo lek a? Nogo ndak-ndak at Aliku ninogoba Ala nen ndinogo wo'niragagerak nogo nit kunduk, unde eeppatinuk, logogun aret.

²⁵ Aakumi Mowap mendek inowe endagembogut aap Tipot aput Mbalak nogo nen ninom wone wakwi, ninom wim nambukwi, eeka'lek aret kwe, At ti meek. Ndi, An iya me, nduk, ari agandik?

²⁶Aakumi inawi kota Ketibon inom, Arowet inom, it kota imbirak ti, enaagan-ambokan inawi mbuulogwe-mbaalogwe inom, kota-kota niyo Aronon ambet paga wonogwe inom, it Iterali wonogwe iigak, tahun tiga ratus aret eereegerak o. Eeke kagak, ti eyom paga kat koloolik nonggop nduk teppereegindak?

²⁷Nonggop nduk, nit nen kat maluk eeppagaga'lek niigak kwe, nit maluk eeppinangge logonet, ninom wim eeriyak ari agandik! Togop aret me, inowak loongga Aliku ALA nen ne yogondak yi paga Iterali inom, Amon inom, at nen mban ninawone mbanogo ninowak loonninabigin, yegerak o,” yinuk, yoruwak nduk, nappiyareegerak yori nogogwaarak.

²⁸Yori nogogwaarak kwe, aap Amon inowe endagembogut nogo nen aap Yepata nen wone eerogo nappiyareegerak nogo aruk konenulik, mbo pereegerak.

²⁹Mbo pege mbareegi, at Aliku ALA Aberiniki nogo Yepata oba age mbareegi, o Nggileyat inom, aap Manate inanggween paga inom, tu ti paga nage nagagerik, o Nggileyat kota Mitapa paga nen nugwa aap Amon inanggween paga time nagagerak.

³⁰Nage nagagerik, at Aliku ALA yoge logonet, “Kat nen aakumi Amon mendek an neenggime pege keenok, inoorogo piinok, nagap ndarak obeelom aret name wage neenok, nano mendek ambi an name nen tu paarogo punuk, an keyage wo'nabi wundi wage kenok, Kaliku ALA kake ti aret me, kake warogo kani kunggo mengga kwak, aret warogo kake kani kunigin o,” yinuk, wone mondok abuk nggaruk togon kumbuk mbanogo pereegerak.

³¹

³²Kumbuk mbanogo pege nagagerik, Yepata nogo nok-nok aret aakumi Amon inom wim nambuke kagak, Aliku ALA nen at eenggime wogoge mbareegi,

³³o Arowet nen inoorit nagagi-nagagi o Minit kota Aben-Keramim kuli kota 20 abok aret mondok pup eerogo piyareegerak. Ti eerogo piyareegerak paga aakumi Amon mendek Iterali inabu'me tebenak aret wonogogwaarak.

³⁴Inoorogo piige nagagerik, at Yepata nogo ame Mitapa wagagerak. Wage mbareegi, at apuluk kolaga nogo aret ogoba keyage wappuurak nduk, togolowak oone lobale eerit kwirabik-kwirabok agan endekem ka wundi nagagerak. At apuri alik ambi komologwe inom, wologwe inom, ambi ndaganabulik, we kolaga ambiriluk ti aret manggu lombok me, eereegerak. Apuluk ambiriluk nogo nen aret eeke ogoba nogo enegen kage nagagerik, ayum nibinik-ndelenak eerogo pake nagagerik, apuluk nogo yoge,

³⁵ “A o, napuluk! An kogoba nogo, wone mondok abuk nggaruk togon kumbuk mbanogo at Aliku ALA yogirak nogo lek eerogo puurak meek aret me, niniki maluk eerogo panege, niniki warogo panege, eerikit nduk, ee'naken o, napuluk.”

³⁶Yoreegerak kwe, kolaga apuluk nogo nen, “Nogoba o. Kat nen at Aliku ALA wone abuk nggaruk togon kumbuk mbanogo yogendak ti aret o. It aakumi Amon mendek kinom wim mbanak ti, inooriyak mbakendak nogo at Aliku ALA nen yeenggwa kege kagak, lek eerogo piigendak me, kumbuk mbanogo Aliku ALA yogendak nogo ti, ndak-ndak aret eeppanu o, nogoba.”

³⁷Yoge nagagerik, ambinom yoge logonet, “Yogendak ti, eeppaniyak op kwe, an ambi eeriyak, E o, yo'nenok nduk, yokkiri o. An kolaga awo tawe aap ninom lambungga'lek neegak kambuurak me, niniki koonit nage logonet, nale yikko'net norewologwe ninom puut nggelok-nggobok paga time tut mbere paga nugwi a nawok nduk, nappanu o.”

³⁸Yoge mbareegi, ogoba Yepata nogo nen, “E o. Tut mbere paga time nege a nak o.” Yoge mbareegi, kolaga nogo orewologwe inom puut nggelok-nggobok paga time nogogwaarak. Time nugu logonet, “Kolaga awo tawe aap imbirak lambungga'lek kagak aret kambigin o,” yinuk, orewologwe inom le yit nugu nogogwaarak.

³⁹Tut mbere penembunuk, iyokan ogoba ka wage mbareegi, kolaga apuluk nogo aap kigin waka'lek kagak aret kwe, ogoba nen wone abuk nggaruk togon kumbuk mbaneegerak nogo ndak-ndak aret eeppereegerak.

⁴⁰Eeppereegerak ti paga aakumi Iterali inapuri komologwe tawe nogo nen tahun ambi eerak paga aap Nggileyat mendek Yepata apuluk kolaga abuwa nen abeko logonet, le yogwe iigak, ne 4 paga age menggerak.