Read Western Dani Owak Loongga 12 Bible Online

Owak Loongga 12 - Western Dani bible

Owak Loongga 12

¹Ne ti eyom paga aap Eparayim mendek nogo kuwak eeppiinok, o Tapon wunda nogo nogogwaarik, aap Yepata nogo yogo logonet, “Nit ninom aakumi Amon mendek inoori nawok nduk, yo'niroolik nonggop nduk? Kalik inoori nagandak me, kame keegak keebe inom aret kani pagagun o.”

²Yogo mbareegwa, Yepata nen it yorage, “Aakumi Amon nen wim iya negen an nawuri ninom ninoba kwi'nogo mbaka, Yeenggwa nira woraanip o, yinuk, yokkirogoorak kwe, it ineenggime nen ninagap nda'ninabi woroolik puk ogotak nogo o.

³Ninagap nda'ninaburak nduk ambi wogwe lek, kiige nagarik, Nalik nage me, nooriyak kenok, op aret o, yinuk, aakumi Amon ninom wim eeriyak nduk, wunda nage mbareegi, at Aliku ALA nen it aakumi ti, inoorikit nen an neenggime panggerak nogo o. Togop aret eekerak kagak, kit nonggop nduk ne yogondak yi paga wogo nogotik, Ninom wim eeriyak, mba'nuk, yo'nogo ogotik?”

⁴Yorage nagagerik, Yepata nogo nen aap Nggileyat mendek kuwak eeppiinok, yorage logonet, “It inanebunu Eparayim mendek nogo nen, It Nggileyat mendek ti, ninanebunu Eparayim mendek inom, Manate mendek inom, ando mogonak mendek mbaganit nagaarak nogo it aret yagaarak me, inoba kwi'naruwi o,” yinuk, inanebunu Eparayim mendek wim inoba kwi'nogo nogogwaarik, mondok inoorogo piinet nogogwaarak.

⁵Inoorogo piinet nogo nogogwaarik, tu o Eparayim noorak yi Yoraran ayo mbanggo menggam tebembunuk wonogwe me, it aap Eparayim mendek ambi inowagam nanuk, “Wunda na o,” yorage kenok, it aap Nggileyat mendek nen, “Kat Eparayim mendek ilik?” yogwi iinok, at nen, “Lek o,” ari kenok,

⁶it nen at yogwi, “Ti kenok, wone, Sibolet, yu o,” yogwi iinok, at nen wone, Sibolet, yuurak kagak, Tibolet, ari kenok, pigogo niyo Yoraran ayo mbanggo menggam taati aret warogo pogo nogogwaarak. Ti eyom paga aret aakumi Eparayim mendek ineebe empat puluh dua ribu aret inoorogo piigo nogogwaarak.

⁷Inoorogo piinok, Yepata nogo aakumi Iterali inarum wonage logonet, inowak looninake wonage kagak, tahun 6 aret eeppege nagagerik, aap Nggileyat mendek Yepata nogo aret kangge mbareegi, o Nggileyat kota ambi time nggween taambereegwaarak.

⁸Kangge mbareegi, aap ambi o Mbe'lekem mendek endage Ebatan nen aakumi Iterali inarum logonet, inowak loongge nagagerak.

⁹At apuri aap ti, 30. Ndi, komologwe ti, 30 aret ndaganabeegerak me, komologwe nogo inogonggelomini aap inanebunu alik mendek kolaawak nduk, wogorage, ndi, wologwe nogo kumi inanebunu alik mendek mban kolaawak nduk, waganogo ira wage, eeke nagagerak. Aap Ebatan nogo Iterali inarum logonet, inowak looninake kagak, tahun 7 aret eereegerak.

¹⁰Eeke nagagerik, kangge mbareegi, o Mbe'lekem time nggween taambereegwaarak.

¹¹Kangge mbareegi, aap Tebulon mendek endage Elon nen aakumi Iterali inarum wonage logonet, inowak loongge kagak, tahun 10 aret eereegerak.

¹²Eeke nagagerik, aap Elon nogo kangge mbareegi, aakumi Tebulon inanggween paga o Ayalon time nggween taambereegwaarak.

¹³Kangge mbareegi, aap o Piraton mendek endage Kilen aput Aboron nen aakumi Iterali inarum logonet, inowak loongge nagagerak.

¹⁴At apuri aap ti, 40 ndaganake, ndi, apuri nen ombowologwe aap ti, 30 aret ndaganakwi, eereegwaarak. Apuri inom, ombowologwe inom, nogo ti, inaanggumi keledai 70 aret me, inalitak lombok amborowak paga kwi'na'nuk, nugu nogogwaarak. Ndi, aap Kilen aput Aboron nogo Iterali inarum logonet, inowak looninake kagak, tahun 8 eeppunuk,

¹⁵kangge mbareegi, aakumi Amalek mendek inawi puut nggelok-nggobok me aap Eparayim inanggween paga o Piraton nogome aret nggween taambereegwaarak.