Read Western Dani Owak Loongga 13 Bible Online

Owak Loongga 13 - Western Dani bible

Owak Loongga 13

¹It aakumi Iterali mendek nen Aliku ALA enegen kagak, maluk ambinom eerit nogo mbareegwa, at Aliku ALA nen aakumi Iterali waganogo it aap Pilitin mendek ineenggime piige mbareegi, wonogwe iigak, tahun 40 eereegerak.

²Ti eyom paga aap o Tora mendek anebunu Ndan endage Manowa akwe wubili me, aagalogwe ndaka'lek aret wonagagerak.

³Wonage me, Aliku ALA ayonggo malayikat ambi kwe nogo wonage me, kin ari wage nagagerik, yoge logonet, “Kat kwe yi, kaagaluk ndaka'lek wubili abet aret wonage kwe, kabila age logomenggendik, kaagaluk aap aret ndarumunggun o.

⁴ Kabila a'nuk, kaagaluk aap aret ndaremenggendak me, anggur amburu inom, niyo kumili eeginaka mendek inom, yi mendek ndi mendek noorak mage yugu mendek inom, kat noorak mage me liippege logot o. Wulaga ti, nda'narigin kuli paga nen Ala ake eeke logowak nduk, leenogo pemenggerak me, at eeruwak mbanggak yuurak mage o. Ndi, it aakumi Pilitin mendek nen kit Iterali mendek inabu'me tebembinagago wonogwe nogo kinagap ndake logorak aa'nduk at nen aret warenigin o,” yoreegerak.

⁶Yoge mbareegi, kwe nogo nen ogonggelo wonage me, wage nagagerik, yoge logonet, “Ala wone liirogon eeka ambi neya wagaarak o. Neya wagaarak nogo ti, enete Ala ayonggo malayikat pogom aret kage nagarik, nagabiti ambik lombok ee'nake mbaki, kat nggeeme nen wagan? Ndi, kat kendage ngge? yoga'lek neegak kwe,

⁷at nen mban an yo'nege logonet, Kat kabila age logomenggendik, kaagaluk aap aret ndarumunggun o. Wulaga ti, nda'narigin kuli nen nok, kambi noorak kuli paga Ala ake leenak aret logogin me, kat anggur amburu inom, niyo kumili eeginaka mendek inom, yi mendek ndi mendek noorak mage yugu mendek inom, nengge logorak mage, yo'negerak o,” yinuk, yoreegerak.

⁸Yoge mbareegi, aap Manowa nogo nen Aliku ALA yoge logonet, “Nogoba o! Elege nda'narigin, yagandak ti, nda'nage kenok, nit nonggop eeppogo logorak mamunniraawak nduk, at koone liirogon eeka nappi wagandak nogo ne ambinom nappi omok o,” yinuk, tamban eereegerak.

⁹Yoreegerak nogo, Ala aruk konengge nagagerik, ne ambinom kwe nogo ogonggelo imbirak lek, alik eyabume kwi'ndak wonage me, Ala ayonggo malayikat nogo pekka wagagerak.

¹⁰Pekka wage mbareegi, kwe nogo mbe agan ogonggelo yori wage logonet, “Wulaga wae! Aap niinggi ni'neya wagaarak nogo, ambinom pe'neya wagaarak wonage o.”

¹¹Yoge mbareegi, ogonggelo nogo mi'na'nuk, akwe imbirak aap nogo owagam nogo nogogwaarik, ogonggelo nogo nen yoge logonet, “Ne ambit paga nakwe wone yori wagaarak nogo, kat aret ilik?” Yoge mbareegi, at nogo nen, “E o. An aret o,” yoreegerak.

¹²Yoge mbareegi, at Manowa nen Ala ayonggo nogo yoge logonet, “Kat wone yagandak nogo a'me nggelok ari kenok, wulaga ti, eenik wonage logonet, eraambe inom, eeke logorak inom, nonggop eeke logogin? Yo'niret o.”

¹³Yoge mbareegi, Aliku ALA ayonggo malayikat nogo nen Manowa yoge logonet, “Kakwe wone yogirak nogo liirogon ndegenggolage logonet,

¹⁴yi mendek ndi mendek eyo anggur paga ogobakkigirik inom, anggur amburu inom, niyo kumili eeginaka mendek inom, yi mendek ndi mendek noorak mage yugu mendek inom, nengga'lek wone an lengganogo yogirak ti mban omaawi porogo logowak o.”

¹⁵Yoge mbareegi, aap Manowa nen Aliku ALA ayonggo malayikat nogo yoge, “Nit kambin aagaluk ambi warogo kanooniya lariyak me, mbuuluk ya'i puk aru o.”

¹⁶Yoge mbareegi, Aliku ALA ayonggo malayikat nogo nen, “Yilinogo paninuk, nanooniya eerumonggotak kwe, an nagin lek me, Eeriyak, mbakotak nogo ti, warogo Aliku ALA ake aret kani kunu o,” yoreegerak. Yoreegerak nogo ti, aap Manowa nogo nen, “Yi Aliku ALA ayonggo nen aret yo'nege,” yelok kaga'lek logonet, yoreegerak.

¹⁷At Aliku ALA ayonggo nogo nen Manowa nogo yoge mbareegi, at Manowa nogo nen Aliku ALA ayonggo nogo yoge logonet, “Nogoba o. Kat yo'niragandak wone nogo aret age kenok, kat kendage tiyappuwam me kendage ngge o?”

¹⁸Yoge mbareegi, Aliku ALA yonggo nogo nen, “An nendage ti, aakumi nen liippaniyak meek aret me, Kat kendage ngge, nonggop nduk yo'nege agandik?”

¹⁹Yoge mbareegi, aap Manowa nogo nen kambin awo tawe ambi warogo gandum anggen yigirik Ala ake pugwi mendek nogo inom yugum ndoonak paga punuk, Aliku ALA ake kani kuneegerak. Kungge nagagerik, akwe imbirak inigen iigak, Aliku ALA iya tit ambi eereegerak nogo yi o.

²⁰Kani kuneegerak omoonuk lagangge enggela'me Aliku ALA ayonggo malayikat nogo mbogut paga laganeegerak. Lagangge nogo Manowa akwe imbirak inigen kogo nogogwaarik, inenete wanduk nggween paga ngginnogogwaarak.

²¹Ndi, at Aliku ALA ayonggo nogo Manowa akwe imbirak nigiya waga'lek mbareegi, at Manowa nogo nen, “Yi Aliku ALA ayonggo malayikat abet aret kagak wonogoorak kagi,” yinuk, eenu agagerak.

²²Eenu age nagagerik, at Manowa nen akwe yoge logonet, “Nit Ala muk ninigen kogoorak me, kambugun aret kogo o.”

²³Yoreegerak kwe, akwe nen, “Lek o. At Aliku ALA nen ninooriyak mba'netak nen kambin warogo kani kunggoorak nogo inom, gandum yigirik ake pogoorak inom, wagangge, ndi, ninenggaanom paga iya tit eeke kogoorak inom, wone yogondak iluk yo'niragaarak inom, ti yo'nirage, ee'netak lek o,” yoreegerak.

²⁴Yoge nagagerik, logonuk peebi nen kwe nogo aagaluk aap aret ndake nagagerik, endage Timoton tooneegerak. Ndi, wulaga nogo tawe age kagak, Aliku ALA ale'nggen at obaga pege nagagerak.

²⁵Oba pege kagak, o Tora Etitawon oolo o endage Makane-Ndan nogome wonage me, aa'nduk lombok eeriyak nogo at Aliku ALA Aberiniki nen inikime nggaganogo yoge nagagerak.