Read Western Dani Owak Loongga 15 Bible Online

Owak Loongga 15 - Western Dani bible

Owak Loongga 15

¹Peebi nen gandum anggen mbanggwi eyom paga Timoton nen, “Nakwe pekka na o,” yinuk, nage logonet, kambin aagaluk ambi wonok kwe nogo ame unggwi nage nagagerik, ogoba nogo yoge, “Nakwe akem yime wonage me pekka unggwi o,” yoge mbareegi, kwe ogoba nen, “Ungguurak mage o,” yoge nagagerik,

²“Kolaga yi, abu keebi ombake keege nagarik, koreeluk ambi muk wogogirak me, awuluk ti abu kigirikwe me, obaane'me awuluk ti aret kolet o.”

³Yoge mbareegi, at Timoton nen kwe ogoba nogo yoge, “It Pilitin mendek nen eeppanggaarak paga an onggo aaninggin inoba piige neenok ti, an maluk yo'niriyak mage o. It inobaalombok aret o.”

⁴Yorage nagagerik, oome nen wundi nanuk, nggeewo mba'ngge tiga ratus piginabi nage nagagerik, ineebe mbere'ndak lombok inage imbirak te'muluk eerogo piinok, ndi wuninggak inage paga keele maarogo piige nagagerik,

⁵kani wuninogo punuk, aap Pilitin mendek ineyabu gandum yarak me time teppiige mbareegi, gandum warak logonak inom, awo mbangga'lek aro paga wonage inom, kani nenet nage logonet, anggur awi yarak inom, eyo tayitun awi yarak inom, abok aret kani nenggegerak.

⁶Nengge mbareegi, it aap Pilitin mendek it mban-mban yogo logonet, “A puk! Yi ta nen eeki mbakop?” Yogo mbareegwa, it ambi nen yogo logonet, “Aap Timana mendek Timoton aru nogo nen Timoton akwe waganogo at oreeluk ambi wogogerak me, aap Timoton nen aret eekerak o.” Yogo mbareegwa, it Pilitin mendek apit aret nogo nogogwaarik, kwe nogo ogoba imbirak ineenik ngge-ngge kani kumbiyareegwaarak.

⁷Kani kumbiigo mbareegwa, at Timoton nogo nen yorage logonet, “Kit togop eekotak me, an nen inane'me wagangga'lek logonet, an puk arigin mondok lek mbako logonip o.”

⁸Yinuk, anini ambik age nagagerik, kumili negen a'nuk, it ambik aret inoorogo piinok, puut lunik Etam ndoome time ari nanuk, wonagagerak.

⁹Wonage kagak, aakumi Pilitin mendek apit aret wogo nogogwarik, inawooliya o Yekura paga wuppatinuk logonet, o Leki onda mbanuwok nduk, eeko mbareegwa,

¹⁰it aap Yekura mendek nen it yorogwe, “Kit nonggop nduk ninooriyak nduk wogotak?” Yorogo mbareegwa, it nen yorogo logonet, “At Timoton nen nit eeppinanegerak kwak nit kunduk, at togop aret eeppuwok nduk, keele maari wogo o.”

¹¹Yorogo mbareegwa, it aap Yekura mendek ineebe tiga ribu puut lunik Etam ndoome time nogo nogogwaarik, Timoton yogo logonet, “It aap Pilitin mendek inabu'me tebembinanogo wonogwe kat keenggo'lek a? Kat nen nonggop eerogo pinaniyak nduk eeke agandik?” Yogo mbareegwa, at Timoton nen, “It nen an ee'nakaarak nogo onggo aret eeppiigirak me tit yogwe.”

¹²Yorage mbareegi, it nen at yogo logonet, “Kat keebe keele maarogo it Pilitin mendek ineenggime pagi nawok nduk, wokkabi wogo o.” Yogo mbareegwa, at Timoton nen it yorage logonet, “Kit nen aret, Kat koorugun lek o, yinuk, kumbuk mbanogo an yo'ninip o.”

¹³Yorage mbareegi, it nen, “Op aret yagandak me, nit koorugun lek o. We keele maakkabunuk, it ineenggime pagi nagun aret o.” Yogo nogogwaarik, puut lunik nogome nen keele mbere ngget mendek paga eenggi keele maa'nuk wonok nogogwaarak.

¹⁴Wonok, o Leki ari nogo mbareegwa, it aap Pilitin inale'nggen nen keekok agan wundi wogwe iigak, abera'lek me taa'nogo aret Aliku ALA Aberiniki omaawi at oba ari wage logonet, eenggi keele maarak nogo kani nen ligi awut ne ambit liingge nengge menggerak togo'nogo aret nggaru-nggaru ma'nagagerak.

¹⁵Ma'nage mbareegi, keledai eegwak nenenak ngget mendek taati wonage kage nagagerik, eenggime woppunuk, aap ineebe seribu aret inoorogo piyareegerak.

¹⁶Inoorogo piige nagagerik, Timoton nogo nen ari logonet, “Keledai eegwak nenenak paga Aap ineebe seribu aret inoorogo piige, Keledai eegwak paga aap inoorak nogo Obaga luk-luk eerogo piige, Eekirak o,” yinuk, yereegerak.

¹⁷Ari nagagerik, keledai eegwak nogo eenggime nen mbo pereegerak me, o taati nogo endage, Eegwak Nenenak o, yogo nogogwaarak.

¹⁸Ndi, at Timoton nogo niyo abu eeke mbareegi, at oone nggwok paga Aliku ALA yoge logonet, “Kat komaawi an kayeloman wo'negendak paga aap apit aret inookirak kwe, yogondak an yi abu nen kangge neenok, it aakumi inagabolo mbana'lek mendek ineenggime arigin ti op mbaken?”

¹⁹Yoge mbareegi, Ala nen o Eegwak Nenenak time yugum eno pelengge mbareegi, niyo eneeri time nen wundeegerak. Wungge mbareegi, niyo nogo at Timoton nengge nagagerik, omaawi age, iniki linggolage, eereegerak. Ti eereegerak paga yi eneeri nogo endage, Ala Yoge Kenok, Yi Wogoreegim o, yinuk, yogo nogogwaarak me, niyo ti, o Eegwak Nenenak time yogondak wonage aret o.

²⁰Ndi, it aap Pilitin mendek nen Iterali mendek inabu'me tebembiirogo wonogwe ti eyom paga Timoton nogo aakumi Iterali inarum logonet, inowak loongge kagak, tahun 20 aret eereegerak.