Read Western Dani Owak Loongga 16 Bible Online

Owak Loongga 16 - Western Dani bible

Owak Loongga 16

¹Ne ambi paga aap Timoton nogo o Nggata time nagagerak logonet, kwe terak wuka ambi enegen kage nagagerik, imbirak nogo yuwok nduk, ame unggwi nagagerak.

²Unggwi nagagerak wonage kogo nogogwaarik, “At Timoton wagaarak oome yime wonage o,” yinuk, aakumi nen it Nggata mendek nogo yorogo mbareegwa, it nen o nogo wanggeppunuk, oonikiya ti paga ambi eeppuurak nduk, eerulik, ata, “Oonegen wundi wage kenok aret waruwok o,” yinuk, tu kota unggwogo menggam time enaarak wonogogwaarak.

³Enaarak wonogwe iigak kwe, at Timoton kolaga nogo imbirak wonagagerik, oonikiya nogo iniki mbere eeke paga mi'na'nuk, o yaga'lelo unggwogo menggam tu omaawi narak me, eyo mbere abeenok-abeenok yinik wonage nogo eenggi pippunuk, kinogo tunggambe inom, tu eebe inom, abok aret uum paga wagangge nagagerik, piyaninuk, o Keboron nakkagak yime pa'nggwe puut kirin paga time aret pi laganeegerak.

⁴Ti'nuk, peebi ne ambi paga at Timoton nogo nen kwe ambi o kobappaga Torek time mendek endage Ndelila iniki nen uugwe lombok mbareegerak.

⁵Uugwe mbake mbareegi, it aap Pilitin mendek inendagembogut ineebe 5 nen kolaga Ndelila nogo pekka wogo nogogwaarik, yogo logonet, “At omaawi ambik eeke nogo alom ngge? Ndi, eebe nonggop eerogo keele maakwi niinok, omaawi lek age, eeriyak agote wone nogo yokkiruwak nduk, pilit yagak abet yagak yorit unggu o. Yoremenggendak paga yokkege kenok, ninalitak lombok nen wu mbuti perak aaninggin 13 wakkagak wokkirugun o,” yoreegwaarak.

⁶Yo'nuk, nogwe iigak, at kolaga Ndelila nogo nen Timoton yoge logonet, “Timoton wae. Kat komaawi ambik eeke ti, alom nano paga eeke, ndi, kat komaawi lek eerogo tebembagarak nogo nano keele paga maakkakwi, eeriyak kagote wone kiraarak nogo yo'niru o.”

⁷Yoge mbareegi, at Timoton nen kwe nogo yoge, “An neebe yigin agale awo woloonna'lek miin nggaganak 7 paga keele maa'naburak kenok, ti paga aakumi ugun inomaawi lek mengga kwak an togop aret ee'nabigin o.”

⁸Yoreegerak nogo it aap Pilitin mendek inoweewi inendagembogut nogo yorage mbareegi, it nen yigin agale awo woloonna'lek miin nggaganak 7 wonok, kwe nogo wogori wogo mbareegwa, aap o ko ogoorak peenok time kumaarak wonogwe iigak, kwe nogo nen yigin agale ti paga Timoton nogo eenggi keele maappunuk, yoge logonet, “Timoton wae. It aap Pilitin mendek nen kat pikkaburak nduk wonogwe yi o.” Yoge mbareegi, at Timoton nogo mi'nage nagagerik, yigin agale paga eenggi keele maarak nogo ligi awut kani nen ne ambit nengge minggi kwak, ne ambit paga aret mbanogo pereegerak. At omaawi alom nogo ti, it ineenu arulik nobarak aret wonagagerak.

⁹

¹⁰Nogo eeke mbareegi, kwe Ndelila nogo nen Timoton yoge, “Kat nen an wi nombake logonet, koone pilit-pilit aret yo'nege me, nano keele paga maakkakwi iinok, komaawi ti lek arigin, liirogon yo'niru ubi.”

¹¹Yoge mbareegi, at Timoton nen at yoge logonet, “An neebe ndiimbat keele ngget laanak paga maa'nakwi kenok perak, it aakumi ineebe inomaawi lek mengga kwak an togop aret ee'nabigin o.”

¹²Yoge mbareegi, aap Pilitin mendek nogo o ko ogoorak peenok time kumaarak wonogwe iigak, kwe Ndelila nen ndiimbat keele ngget mendek waganogo Timoton nogo keele maarogo punuk, yoge logonet, “Timoton wae. It aap Pilitin mendek nen kat pikkaburak nduk wonogwe yi o.” Yoge mbareegi, at Timoton nogo mi'nage nagagerik, eenggi keele maarak nogo lit keele paga maarak pogom ndenak togon nappereegerak.

¹³Nappege mbareegi, Ndelila nen Timoton yoge, “O yogondak kuli nen, an abu wi lombok nombake logonet, koone pilit-pilit aret yo'nege me, nano keele paga maakkakwi iinok, komaawi lek arigin liirogon yo'niru ubi?” Yoge mbareegi, at Timoton nen onggo yoge logonet, “An neeruwak 7 kuli yonggon-yonggon yarak nogo yum yonggon-yonggon tabak yako menggam time neeruwak inom punuk, yarogo paku omaawi eerogo panugwi iinok, it aakumi ineebe inomaawi lek mengga kwak, an togop aret ee'nabigin o.” Yoge nagagerik, Timoton nogo, nogo yege kagak, kwe Ndelila nen at eeruwak 7 kuli yonggon-yonggon yarak nogo yum yonggon-yonggon tabak yake me, inom enggela'me yappunuk,

¹⁴paku paga omaawi eerogo pege nagagerik, yoge logonet, “Timoton wae. It aap Pilitin mendek nen kat pikkaburak nduk wonogwe yi o.” Yoge mbareegi, at Timoton nogo eenik a'nuk, eeruwak yum inom yonggon-yonggon yarak nogo yerenak-werenak eerogo mbo pegak mi'nagagerak.

¹⁵Mi'nage mbareegi, kwe Ndelila nen at yoge, “Kat kinikime wone kote porogo wonage nogo paganogo an yo'nega'lek logonet, nonggop togon, Kat an niniki kunik o, mban yo'nege agandik? Nomaawi eeke alom yi o, yinuk, paganogo yo'nega'lek keegak, ne 3 paga an wi nombake logonet, pilit pugunogo yo'nege me neebi o,” yoreegerak.

¹⁶Yoge nagagerik, kwe nogo nabenik-nabenak yori unggwagak mban eeke mbareegi, oone ari nogo at Timoton anggon nen kambikit aret mbareegerak.

¹⁷Mbake nagagerik, wone inikime kiraarak wonage nogo abok aret paganogo at yoge logonet, “An nda'nagagirak kuli nen neebe yi nogo Ala ake leenak logokit nduk, eerogo paneegerak me, inamboro mbangga paga neeruwak abu mbannakulik aret minggirak o. Ndi, an neeruwak mbaniyak kenok perak, an nomaawi abu lek a'nuk, it aakumi inomaawi lek mengga kwak an togop aret ee'nabigin o,” yinuk, yoreegerak.

¹⁸Yoreegerak nogo at Ndelila nen wone inikime kiraarak wonage nogo, “Abu aret paganogo yo'nege kagi,” mbake nagagerik, aap Pilitin mendek inoweewi inendagembogut nogo woraawak nduk yonggo nappiige logonet, “Wone inikime kiraarak nogo abu aret yo'negerak me, ne ambit yogondak yi paga aret woraanip o,” yinuk, yonggo nappiyareegerak yora nogo mbareegwa, it wogo logonet, wu mbuti perak inom wonok wogogwaarak.

¹⁹Wogo mbareegwa, kwe nogo nen ambulok paga at Timoton nogo yippege nagagerik, aap ambi nen at eeruwak 7 kuli yonggon-yonggon yarak nogo mbaniyak nduk wiireegerak wage nagagerik, Timoton eeruwak nogo mbangge kagak, omaawi lek arit unggwage kwe nogo nen kage nagagerik, “Yogondak abu aret tebenogo pigirak kagi,” mbareegerak.

²⁰Mbake nagagerik, at kwe nogo nen, “Timoton wae. It aap Pilitin mendek nen kat pikkaburak nduk wonogwe yi o.” Yoge mbareegi, at Timoton nogo, nogo yege me, eenik a'nuk, iniki nen mbake logonet, “An aa'nduk keele maa'nakwi iinok, nggonenogo mbo punuk, wundi nage minggirak togo'nogo aret eerigin o,” mbareegerak kwe, at Aliku ALA nen muk teppereegerak, eenggo'lek logonet, mbareegerak.

²¹Mbake kagak, it aap Pilitin mendek nogo nen at eebe pippogo nogogwaarik, enegen imbirak kilirogo punuk, piganok o Nggata nogogwaarak. Nogo nogogwaarik, mbuti keele tembaga paga eenggi imbirak maarogo punuk, o keele maarogo mambiigo menggam nogome logonet, gandum anggen mbanak nogo yigike logowak nduk, yoreegwaarak

²²yigike wonage kagak, at eeruwak mbaneegwaarak nogo obaane'me wundeegerak.

²³Ti'nuk, ne ambi paga it aap Pilitin inoweewi inendagembogut abok aret inagugi alut eeko logonet, inale'nggen nen laago nggwok lariyak nduk, kuwak eeppunuk, “Nit ninagugi Ndagon nen at ninom wim mbanak Timoton nogo waganogo nineenggime pinanggerak me, wa,” yinuk, inagugi endage Ndagon nogo alut eereegwaarak.

²⁴Alut eeko nogogwaarik, inale'nggen alik negen yogo logonet, “Aap Timoton agi'ndok kanggo logowok nduk, wonok woraanip o.” Yorogo mbareegwa, at Timoton nogo o keele maarogo mambiigo menggam time wonage me, wonok, agi'ndok kanggo logowok nen inenggaanom paga o eyak mbere yinik oolo time pi wogogwaarak nege nogo inigen kogo nogogwaarik, inagugi endage Ndagon nogo alut eeko logonet, “At ninom wim mbanak Timoton yi nen ninoreewi apit aret inooke, Ninanggween paga yi mendek ndi mendek yarak nogo maluk eerogo pege, Eeke menggerak me, Ninagugi nen waganogo nineenggime pinanggerak o,” yinuk, alut eereegwaarak.

²⁵

²⁶Alut eekwi iigak, Timoton nen wulaga at piganok nege nogo yoge, “O wurik eyak panggonak nogo paga namborowak penggerak logokit nen, Yi, yo'niru o,” yoreegerak.

²⁷It aakumi Timoton agi'ndok kambuwok nduk, o wurik me wonogogwaarak nogo ti, aap inom, kumi inom, it aap Pilitin mendek inoweewi inendagembogut inom, apit aret o yagabit aago wonogwe, ndi, aakumi ando ineebe apit tiga ribu aret o kirin ndoonogo wurik irimbaga time inigen wonogwe, eekwi iigak,

²⁸at Timoton nogo Aliku ALA yoge logonet, “Kat Kaliku Kitok Menggendak ALA o. An nenegen mbere kilirogo panegaarak namee'nggo aap Pilitin mendek yi, inoorikit nduk, abe'nake logonet, komaawi ne ambiriluk yogondak yi aret wo'niru o, nogoba Ala.”

²⁹Yoge nagagerik, o wurik panggonak eyak mbere oolo yinik wonage nogo ambi eenggi abe'nggan pigagangge, ambi eenggi kwaare'nggan pigagangge, eeke nagagerik,

³⁰“An aakumi Pilitin mendek yi, ninom aret kambi o,” yinuk, eenggi mondok omaawi paga o eyak nogo panggonogo nappege mbareegi, o wurik nogo apit aret ndenggak ari logonet, aap Pilitin mendek inoweewi inendagembogut inom, aakumi time wonogwe inom, abok aret aan lebeninake logonet, at Timoton inom aret aan lebenggolagagerak. Ti eereegerak nogo ti, at Timoton eenik logonet, inooreegerak nogo ti, mbuuluk. Ndi, o inom aan lebenggolage logonet, inooreegerak ti, ambik aret inooreegerak o.

³¹Ti eeke mbareegi, at owe-awot inom, at agalomini-ogobamini apit inom, at eebe wa nogo nogogwaarik, wonok o Tora Etitawon oolo at ogoba Manowa nggween taambuwam time nggween taambi wogogwaarak. At Timoton nogo aakumi Iterali mendek inarum wonage logonet, inowak looninake kagak, tahun 20 aret eereegerak.