Read Western Dani Owak Loongga 17 Bible Online

Owak Loongga 17 - Western Dani bible

Owak Loongga 17

¹Aap ambi o Eparayim puut nggelok-nggobok me mendek endage Mika aret wonagagerak.

²At nen at agalo yoge logonet, “Nagalo o. Wu mbuti perak aaninggin 13, Aakumi nen waganggaarak o, yinuk, kugi pulunogo piige keegirak nogo ti, an aret waganggirak porogo wonage agarik o.” Yoge mbareegi, agalo nogo nen, “Naagaluk o. At Aliku ALA nen ale'nggen koba pagage logogin o.”

³Yoge mbareegi, wu mbuti perak aaninggin 13 nogo awu unde agalo nogo wogoge mbareegi, agalo nogo nen, “Wu ti, Aliku ALA ake leenogo puurak uugwe lombok mbakirak me, mbuti perak ti paga Ala obaane'me ogut ambi ogobakkigirogo pege, ndi, ambi worarogo longgo warogo pege, eeriyak ake nduk, naagaluk wokkigi o.”

⁴Yoreegerak kwe, aagaluk nogo nen wu nogo waganogo agalo wogoge mbareegi, agalo nogo nen wu mbuti perak aaninggin mbere wakkaanuk, ambi oolo inom wakkagak eerogo wagangge nagagerik, aap mbuti perak worarogo yi mendek ndi mendek longgo waka nogo wogoge mbareegi, at nen mbuti perak nogo paga Ala obaane'me ogut ambi ogobakkigike, ndi, mbuti perak ti, worarogo at Ala ogut ambi longgo wake, eeke nagagerik, aap Mika ame kugi ogut alik mendek eerak wonogwe me, inom pi wage mbareegi, at Mika nogo nen oome alut eeko menggaarak mendek ogut ambinom ogobakkigike, yum agale warak epod ogobakkigike, eeppunuk, Ala unde logonet, Mika ake eeke logowak nduk, aput ambi leenogo mippereegerak.

⁶ Ne ti eyom paga aakumi Iterali inenggela'me aap endagembogut ambi inarum wonage lek me, maluk aret kagak, “Yi obeelom aret eeko ogoorik o,” yinuk, inalitik-inalitak iniki koombunuk nen ugun eerit nogo nogogwaarak.

⁷Ne ti eyom paga o Yekura kota Mbe'lekem time aap tawe Lewi mendek aap nggiru negen inanebunu Yekura inom wonagagerak nogo nen,

⁸“O nggeeme logokit o?” yinuk, kota Mbe'lekem nen wundi wage nagagerik, kwaarit nege logonet, o Eparayim puut nggelok-nggobok aap Mika ame nogome aret unggwi nagagerak.

⁹Unggwi nage mbareegi, aap Mika nogo nen aap nogo yoge logonet, “Kat ngga nen wagan o?” Yoge mbareegi, at nen Mika nogo yoge, “An aap Lewi mendek me, o Yekura kota Mbe'lekem nen, O nggeeme logokit o? yinuk, kwaarit wagi o.”

¹⁰Yoge mbareegi, at Mika nen at yoge, “Kat nen nit ninogoba a'nuk, Ala unde logonet, ninake eeke logonok nduk, ninom yime ye mbanggolaawok o. Ninom wonogo logonet, tahun ambit eerak paga wu syikal 10 wokkege, kayum inom, kambi inom, wokkege, eeke logogin o,” yoreegerak.

¹¹Yoge mbareegi, aap Lewi mendek nogo nen, “Op aret o,” ari nagagerik, inom nogome aret puk age mbareegi, aap tawe nogo Mika nen apuluk negen aret eekkolagagerak.

¹²Eekkolage nagagerik, at Mika nogo nen aap tawe Lewi mendek nogo Ala unde logonet ake eeke logowak nduk, leenogo mippege mbareegi, Mika ame time aret wonagagerak.

¹³Time aret wonage me, Mika nogo nen ari logonet, “Aap Lewi mendek yi, Ala unde logonet, nake eeke menggerak me, at Aliku ALA nen an obeelom eerogo panege logogin yogondak neenu agi o,” yinuk, yereegerak.