Read Western Dani Owak Loongga 18 Bible Online

Owak Loongga 18 - Western Dani bible

Owak Loongga 18

¹Ne ti eyom paga aakumi Iterali inenggela'me aap inowe endagembogut ambi lek aret wonagagerak. Ndi, ti eyom paga mban inanebunu Ndan mendek nogo it Iterali mendek ando ineyate kwak nggween kologwe iigak, it Ndan mendek koloolik me, ineyate kwak unde eeppatinuk, logowok nduk, nggween kwaakwi wonogogwaarak.

²Togop aret me, “O nggeeme we wonage kaamun?” yinuk, yi awi ndi awi time aret inigen yomboonit nugu logowak nduk, it inanebunu Ndan mendek o Tora Etitawon wonogwe nogo nen aap wakaa'ngget ineebe 5 inenggela'me nen leenogo piigo nogogwaarik, yorogo logonet, “O nggeeme ambi wonage kero, kinigen yombooni nanip o.” Yorogo mbareegwa, aap nogo aakumi Eparayim inanggween puut nggelok-nggobok me nogo nogogwaarik, aap Mika awoore'nggam panggo yi nanuk, aap tawe Lewi mendek nogo oone unggut ari liippogo nogogwaarik, time nogo yuwok nduk, puk a'nuk, aap nogo yogo logonet, “Kat aap ta nen wokkeren o yime pagi wagaarak? Kat keyabu ngge eeke menggendak? Ndi, nonggop nduk wagandak?”

⁴Yogo mbareegwa, Mika nen eeppereegerak mbininogo yorage logonet, “Aap Mika nen Ala unde logonet, ake eeke logokit nduk, mippanege nagaarik, nawu wo'nege menggerak o.”

⁵Yorage mbareegi, it nen at yogwi, “Nit o kwaarit wogoorak nogo, ambi kwaarugun ilik, lek a? Kat nen Ala yoru o.”

⁶Yogo mbareegwa, aap Ala unde nogo nen it yorage logonet, “Kit o kwaariyak nduk, wogotak nogo at Aliku ALA nen, Op aret kwaariyak, kinombake me, kiniki ugun tayenak aret nogo logonip o.”

⁷Yorage mbareegi, it aap 5 nogo, nogo nogogwaarik, o Layit ari nanuk, wonogo logonet, aakumi Layit mendek nogo ti, aakumi o Tiron mengga kwak logonet, iniki nu'lek ugun tayenak obeelom aret wonogwe, o time yi mendek ndi mendek obeelom mban wonage me, it ineenggi abu warak lombok logonet, yi mendek ndi mendek uugwe mbaka'lek aret wonogwe, ndi, aakumi o Tiron mendek ti, o nda lombok me, it inom ariyak abu lek iigwi, eereegwaarak.

⁸Eekwi iigo nogogwaarik, iniyokan inoreewi lombok o Tora inom, Etitawon inom, wonogwe me nogome wogo mbareegwa, inoreewi nogo nen it yorogo logonet, “O time nonggop kogotak o.”

⁹Yorogo mbareegwa, it nen yorogo logonet, “O Layit ti, abu obeelom lombok wonage me, it aakumi ti, mugogo wumbiya nawok nduk, pipuk ee'nip o. Kit o yime mban aambira aago kwi'ndak mban logorak op mbakop? O time unggwi nogo logomonggotik, kinawi ye mbanggola noorak kiniki yungguppegak eeriyak mage o.

¹⁰O Ala nen wo'niragaarak ti, ambe wiganak lombok me, yi mendek ndi mendek ambi lek lek, abok aret wonage, ndi, aakumi kunduk, Ndogop eeppinanigin, mbaka'lek iniki ugun wonogwe, eekwi iigom time aret unggwi nagun o.”

¹¹Yorogo mbareegwa, it inanebunu Ndan mendek ineebe enam ratus ineegin li'luk eekko'nok o Tora Etitawon nen wundi wogo nogogwaarik,

¹²it Yekura inanggween paga o Kiriyat-Yeyarim nogome aret inawooliya wukkola wogogwaarak. Togop eereegwaarak me, o Kiriyat-Yeyarim oonegen kilu yi nage menggim time pa'ne endage ti, Ndan Inawooliya Wukkologogwam o, yinuk, yogwe wonogwe aret o.

¹³Ndi, time nen aakumi Eparayim puut nggelok-nggobok aap Mika wonage me nogome aret ari nogogwaarak.

¹⁴Ari nogo nogogwaarik, aap 5 o Layit inigen yombooni nogogwaarak nogo nen inoreewi lombok yorogo logonet, “O ambi yime ti, mbuti perak paga Ala obaane'me ogut ogobakkigirik inom, ambi longgo warogo ogobakkigirik inom, oome alut eeko menggaarak ogut eerak inom, yum agale warak epod inom, wonage nogo kineenu ilik, lek a? Togop aret me, kit nonggop eeriyak nogo kooninip o.”

¹⁵Yorogo nogogwaarik, aap Mika ame taa'nogo ari nanuk, aap tawe Lewi mendek nogo, “Keebe op aret wonage me wa,” yo'nuk,

¹⁶it inanebunu Ndan mendek aap enam ratus ineegin li'luk eekko'nok nogogwaarak nogo tu unggwogo menggam wonogwe iigak,

¹⁷it aap 5 aa'nduk o inigen yombooni nogogwaarak nogo nen ko waka'lek nugwa aret oome unggwi nogo nogogwaarik, mbuti perak paga Ala obaane'me ogut ogobakkigirik inom, yum agale warak epod inom, oome alut eeko menggaarak ogut eerak inom, mbuti perak paga Ala obaane'me ogut longgo warak inom, apit aret wa unggwogogwaarak.

¹⁸It aap ineegin li'luk eerak ineebe enam ratus nogo aap Ala unde nogo inom tu unggwogo menggam wonogwe iigak, it aap Mika ame unggunuk, mbuti perak paga Ala obaane'me ogut ogobakkigirik nogo inom, yum agale warak epod nogo inom, oome alut eeko menggaarak ogut eerak inom, mbuti perak paga Ala obaane'me ogut longgo warogo ogobakkigirik inom, wonok wundi wogo mbareegwa, at Ala unde nogo nen it yorage logonet, “Kit nonggop eeko ogotik?”

¹⁹Yorage mbareegi, it nen at yogwi, “Kat nit ninogoba a'nuk, Ala unde logonet, nit abok ninake eeke logonok nduk, eekwi me, Koone puk o. Kat nen yuurak ambi lek me, ninom nawok nduk, mok mban. Ala unde logonet, aap ambiret aaganapuri inom inake eeke logorak ti op a, aakumi Iterali inenggela'me anebunu ambi ndarak ndegek abok aret inake eeke logorak ti op a?”

²⁰Yogo mbareegwa, aap Ala unde nogo iniki ale'nggen age nagagerik, mbuti perak paga Ala obaane'me ogut ogobakkigirik nogo inom, yum epod nogo inom, oome alut eeko menggaarak ogut eerak inom, wagangge nagagerik, aakumi ambik aago inenggela'me nogome unggwi nagagerak.

²¹Unggwi nage mbareegi, it apit nen komologwe-wologwe inom, inaanggumi inom, inamindik-inamendek onggo nggwok mendek nogo inom, apit aret waganggo nogogwaarik, inaa'nduk piinok, inom nogogwaarak.

²²It aakumi nogo aap Mika ame nen o nda lombok ari nogwe me, it aakumi Mika inom menggaarak apit aret wiiragagerak kuwak ari wa'nuk, Ndan mendek inambokan muguren nogo logonet,

²³inoone nggwok paga Ndan mendek nogo yorogo mbareegwa, it Ndan mendek nogo ina yunggunogo na'nari wogo nogogwaarik, at Mika nogo yogwi, “Nano agaarak kenok, aakumi ambik kinom mu'niren wage agandik?”

²⁴Yogo mbareegwa, at nen it yorage logonet, “An ta nimbirak logobok kagak, Ala obaane'me ogut eerogo pigirak inom, Ala unde logonet, nake eeke menggerak aap nogo inom, kit wonok nogo logonet, Nano agaarak kenok, mu'niren wage, yo'nugwi ti, nanonduk yo'nogo ogotik?”

²⁵Yorage mbareegi, it Ndan mendek nen at yogo logonet, “Kat koone agan wage ti, it aakumi ambi iniki aagi a'nuk, kinoba kwi'nogo logonet, kat inom, kapuri inom, kinenggaawak lek eerogo pinagukwak, koone nggarurogon kame nak o.”

²⁶Yo'nuk, ugun nogo mbareegwa, at Mika nen aakumi ti, at ndak-ndak lek, inomaawi ambik aret iige nagagerik, taati nen yungguninuk, ame aret wagagerak.

²⁷Wage kagak, aakumi Ndan mendek nogo nen yi mendek ndi mendek Mika nen ogobakkigireegerak nogo inom, Ala unde logonet, ake eeke menggerak aap nogo inom, wonok, o Layit nogogwaarak. It aakumi Layit mendek nogo, Ndogop ambi eeppinaniyak, mbaka'lek iniki ugun wonogwe nogo inawi paga kwi'na'nuk, wooluwak paga inooko logonet, inawi kani mbelanogo pereegwaarak.

²⁸Ndi, o kota ti, o Tiron nda lombok, ndi, aakumi time mendek nen kunduk, aakumi Layit mendek inom kunik lek aret wonogogwaarak me, it Ndan mendek nen inookwi iinok, aakumi ambi nen inagap ndaganabi woroolik aret o. O kota Layit ti, Mbet-Erekop koorok kobappaga time aret wonagagerak. Aap Ndan mendek nogo nen aakumi ti, abu aret inoorogo piinok, o kota ti, obaane'me wuko nogogwaarik, it time aret ye mbanggologogwaarak.

²⁹Ndi, o ti, aa'nduk nen, Layit aret, yogo nogogwaarak kwe, wuko nogogwaarik, it inombo aap Iterali aput Ndan endage toonak ndak-ndak aret o ti endage Ndan aret toonogo pereegwaarak.

³⁰O nogo abu aret wurogo pogo nogogwaarik, aap Mika nen Ala obaane'me ogut eerogo pereegerak nogo o time pako nogogwaarik, aap Muta ombooluk Nggeroton aput Yonatan inom, apuri inom, Ala unde logonet, inanebunu Ndan mendek inake eeko logowak nduk, mippiinok, eekwi iigak, aakumi inanebunu alik mendek nen keele maageren noorak kuli aret ari nagagerak.

³¹Ndi, Ala awooliya wurik nogo, o Tilo paga wonage kagak, it nen aap Mika nen Ala obaane'me ogut ogobakkigireegerak nogo aret inenggela'me logowak nduk, mippatinuk, wonogogwaarak.