Read Western Dani Owak Loongga 19 Bible Online

Owak Loongga 19 - Western Dani bible

Owak Loongga 19

¹Ne ti eyom paga aakumi Iterali inenggela'me aap inowe endagembogut ambi lek aret wonagagerak. Ti eyom paga aap Lewi mendek ambi aakumi Eparayim inanggween paga o nggelok-nggobok ilin ambime wonage logonet, kwe o Yekura kota Mbe'lekem mendek ambi ayeloman eeppunuk, akwe kolagagerak.

²Kolagagerak kwe, ne ambi paga kwe nogo nen ugun eerit nage logonet, mbaganit o Yekura kota Mbe'lekem ogoba wonage me nage nagagerik, time wonage kagak, tut 4 aret peneneegerak.

³Tut 4 aret penengge mbareegi, kwe ogonggelo nogo nen iniki yanggik-yanggok eerogo wonok woraawok nduk, ayeloman imbirak nogo logonet, keledai mbere inom wonok kwe nogo wonage me nogogwaarak. Nogo mbareegwa, kwe nogo nen aap nogo wonok ogoba ame unggwi nage kolaga ogoba nen enegen kage nagagerik, iniki ale'nggen paga waganeegerak.

⁴Wagangge nagagerik, kolaga ogoba at arugelo nogo nen mbi inom, niyo inom, wogorage inom nogome aret piirogo wonage kagak, nogo kenagan aret yereegwaarak.

⁵Nogo kenagan yogo nogogwaarik, ko'lu o kuubondendok iname woraawok nduk, pipuk eeko mbareegwa, kolaga ogoba nogo nen aru nogo yoge logonet, “Yumagale kumbunuk, kinomaawi paga namunggup nduk, ninom mbi nawok o.”

⁶Yorage mbareegi, inom kwi'na'nuk, mbi inom, niyo inom, nonggo logonet, kolaga ogoba nogo nen aap nogo yoge, “Ne yogondak mban kiniki ale'nggen paga ninom nogo yuwok o.”

⁷Yoreegerak kagak, woraakit nduk, eeke me, “Nogo yinuk, nanok ubi,” yorit unggwage mbareegi, inom nogo yereegwaarak.

⁸Nogo 4 yinuk, ko'lu kuubondendok woraakit nduk, eeke me, kolaga ogoba nogo nen, “Yumagale kumbunuk, oonegen kilu yi nage kagak namunggun o.” Yoge nagagerik, inom mbi nunggugwaarak.

⁹Nonggo nogogwaarik, ayeloman nogo inom, ayeloman mendek akwe kolagagerak nogo inom, woraawok nduk, eeko mbareegwa, kwe ogoba arugelo nogo nen yorage logonet, “O abu yumaak arit nage yi, kaanip o. Logonuk lek aret o kiip arigin me, nogo yinuk, ko'lu kuuben kiname namunggup nduk, kiniki ale'nggen paga yime ninom nogo yuwok o.”

¹⁰Yoragagerak kwe, aap nogo nen, “An yime ambinom nogo yuurak neebi o.” Ari nagagerik, akwe ayeloman wogo nogo inom, keledai mbere inamborowak paga kwi'nagak ndoonak nogo inom, wonok wundi woraanuk, o Yebut ti, Yerutalem aret me, time ari wogogwaarak.

¹¹O Yebut koorok aret ari wogwe me, ayeloman nogo nen at ogoba nogo yoge logonet, “O abu aret kiip ariyak eeke me, o kota Yebut aakumi iname time nogo yuwok nduk, nawi o.”

¹²Yoge mbareegi, ogoba nen at yoge, “O yime aakumi Iterali iname lek aakumi inambik iname me, nogo yuurak lek o. Ata, o Nggibeya aret nawok o.”

¹³Yoge nagagerik, iniki ambi koonnage mbareegi, yoge logonet, “O Nggibeya ilik, Arama time a, nogo yuwok nduk, nawok o.”

¹⁴Yinuk, nogo nogogwaarik, aakumi Mbeniyamin iname o Nggibeya koorok panggo yi nogwe iigak, oonegen nogo aret kilu yi nagagerak.

¹⁵Oonegen kilu yi nage mbareegi, o kota Nggibeya nogo yuwok nduk, unggwi nanuk, oore'nggam kwi'nogogwaarak kwe, aap ambi nen inom nogo yuwok nduk, wogonabulik.

¹⁶Togop eeko mbareegwa, taati aret wonogwe me, aap anggok ambi aakumi Eparayim inanggween paga puut nggelok-nggobok me o Nggibeya aakumi Mbeniyamin wonogo menggam nogome wagagerak time wonage logonet, yabu eekko'net nege nagagerik, oonikiya ti eyom paga wage logonet,

¹⁷enegen tiya ari nagagerik, it Lewi mendek nogo oore'nggam time wonogwe iige nagagerik, yorage logonet, “Kit ngga nen wogotak? Kit nggeeme nogwe?” yoragagerak.

¹⁸Yorage mbareegi, it nen at yogwi, “Nit ti, aap Eparayim inanggween paga puut nggelok-nggobok niname time nen aakumi Yekura iname o Mbe'lekem nogo nogoorik, niyokan niname noorak nduk, wogwe me, o kiip age mbaki, o kota yime unggwi wogoorak kwe, aap ambi nen ninom nogo yuwok, yo'niraga'lek kenok, ya kwi'ndak wonogwe o.

¹⁹Ndi, nit kayeloman mini an togon, nakwe kayeloman yi togon, ninom nogwe wulaga yi togon, noorak ninambi inom, anggur amburu inom, keledai noorak iri'ngga inom, ti abok aret wonage me, ambi kwaakwi lek kwe, nogo yuurak perak, lin wako ogoorik o.”

²⁰Yogo mbareegwa, aap anggok nogo nen, “Kit oore'nggam endekem yime nogo yuurak lek o. Ata, an ninom nogo yuurak op aret me, ninom nogo logomonggoorik, ambi mendek lek kenok, wokkiraagin aret me, nawi o.”

²¹Yorage nagagerik, wogoren, at ame unggwi nanuk, keledai nogo inambi wogorage mbareegi, it Lewi mendek nogo iniyok kookkologo nogogwaarik, inambi inom, amburu inom, nunggugwaarak.

²² Nonggo nogogwaarik, iniki ale'nggen agagerak wonogwe me, aakumi inobaabut abu maluk kota time mendek wogo nogogwaarik, aap anggok nogo awi inaagan-ambokan wanggeppunuk, arungga'nggi nogo ineenggi omaawi paga panggonggagak eeko logonet, at o unde aap anggok nogo yogwi, “Aap keya wagaarak wonage ti, nit nen wuruwok nduk, wumbi mok o.”

²³Yogo mbareegwa, aap awi unde nogo endekem wundi nage nagagerik, it yorage logonet, “Aap yi ti, an nen aret name mambigirak me, kit nen eekulik mendek maluk lombok eeppuurak mbakotak ti, mage o, noreewi!

²⁴Togop aret me, napuluk kolaga aap kigin waka'lek tawe wonage nogo inom, aap neya wagaarak akwe ayeloman wogo nogo inom, imbirak waganogo wokkirage neenok, wogoren nogo logomonggotik, kit eeriyak mbakotak nogo it aret eeginaburak op aret kwe, aap an nen waganogo name mambigirak yi perak, eekulik mendek maluk lombok eerogo puurak mage o.”

²⁵Yoragagerak kwe, it aap nogo nen konengga'lek mban wonogwe iinok, aap Lewi mendek nogo nen akwe ayeloman wogo nogo wonok endekem wogora wungge mbareegi, oonikiya ti paga at ambi eekak, at ambi eekak, eekwi tit iigak, o aret kilim nagabeegerak. O nogo wiganit nage kagak, kwe nogo teppereegwaarak.

²⁶Teppogo mbareegwa, kwe nogo wage nagagerik, ore nogo yege me tungga'nggi paga taa'nogo aret ogobak toguk ngginnari wagagerak kagak, o aret weereegerak.

²⁷Kuubondendok ne ti paga aret ogonggelo nogo eenik a'nuk, nugwa ame noorak nduk, tu paarogo pegak endekem wundi nanuk, enegen pekkage nagagerik, kwe nogo aret tu unggwogo menggam ngginna'nuk, tunggambe paga eenggi mba'mbak aago wonage mbareegi,

²⁸yoge logonet, “Kwe yi wae. Nawok nduk, mi'naru o,” yoreegerak kwe, oone yaga'lek aret mbareegi, kwe nogo waganogo keledai nogo paga kwippege nagagerik, ame wonage menggim nogome aret wagagerak.

²⁹ Wage nagagerik, aap nogo nen waruk ambi waganogo akwe ayeloman wogo kambak nogo eenggi-iyok nggarik-nggarek eerogo aap Iterali inanebunu 12 nogo ineengge ndak-ndak aret pege nagagerik, it 12 wonogwe me nogome aret nappit nagagerak.

³⁰Nappit nagagerak nogo inigen kogo nogogwaarik, it abok nen yogo logonet, “Nit o Metit nen wundi wogo nogogurik, o yogondak wonogwe yi kuli paga yogobi eerak ambi ninigen kogolik aret eerak kogo o.” Yogo nogogwaarik, “Eerak yi, liippugwi, niniki koonggwi, eeppunuk, Nonggop eeriyak nogo wone mbanuwok o,” yinuk, yogogwaarak.