Read Western Dani Owak Loongga 2 Bible Online

Owak Loongga 2 - Western Dani bible

Owak Loongga 2

¹At Aliku ALA ayonggo malayikat nogo o Nggilagan nen o Mbokim wage nagagerik, Iterali mendek nogo yorage logonet, “An o Metit nen wokkiren kinombomini wone kumbuk mbanogo yoragagim yime pinagi wage nagagirik, yokkirage logonet, Kit an ninom wone abuk nggaruk togon koonogo pereegurak nogo an nen lek eerogo pigin lek o. Ata, mondok-mondok aberak aret logogin o, yinuk, yokkirage nagagirik,

² it aakumi o yime wonogwe nogo kinom lambunna'nuk, wone koonogo puurak lek o. Ata, kit nen inagugi aanggo warogo wogogo menggam ogobakkigirik yinik-minik eerogo pinip o, yokkiragagirak kwe, kit nen an yokkiragagirak nogo taganogo punuk eerit nogwe ti, nonggop nduk, eeko ogotik?

³Togop aret me, it aakumi o yime menggaarak yi, kit wonogwe me nen, an naa'nduk a'nuk mugogo wumbiyaagin lek o. Kinom ogoorak aret logonet, an nalut eekwi nobaane'me inagugi alut eerumunggup nduk, keele pugu pogom nggelenogo pinagagin o,” yinuk, yoragagerak.

⁴At Aliku ALA ayonggo nogo nen wone abok aret yorage mbareegi, it Iterali mendek nogo nen leenggu nggwok maareegwaarak.

⁵Leenggu maako nogogwaarik, o taa'nogo endage, Leenggu Maakom o, yinuk, toombunuk, time at Aliku ALA ake warogo wogoreegwaarak.

⁶At Yotuwa nen it aakumi Iterali iname nappiige mbareegi, ineyate kwak nggween inalitak lombok tumburiragagerak nogo unde a'nuk logowak nduk, nogogwaarak.

⁷Ndi, it Iterali ti, at Yotuwa eenik wonage kagak, Aliku ALA mugurok nogwe, ndi, kangge kagak, Iterali inoweewi at Aliku ALA nen Iterali eeppiige inigen kogogwaarak nogo awo ineenik wonogwe iigak kunduk, Aliku ALA mugurok nogwe, eeko nogogwaarak.

⁸Ndi, at aap Nun aput Aliku ALA ayeloman Yotuwa nogo, ndarak kagak tahun seratus sepuluh eeppunuk, kangge mbareegi,

⁹ puut Nggaat o omarip paga pa'nggwe o Eparayim puut nggelok-nggobok me o Timanat-Tera yate negen anggween mbanogo pereegwam nogome aret nggween taambereegwaarak.

¹⁰Nggween taanogo pogo nogogwaarik, it aap Yotuwa inom ndak-ndak ambugwi tawe ogogwaarak ndarak kero, abok aret inombomini nogogwam nggwogoba wonogwe me nogwe iigak, inobaane'me nda'nogogwaarak nogo, Aliku ALA inom, ndi, Aliku ALA nen Iterali eeppiige nagagerak nogo inom, ineenggo'lek aret wonogogwaarak.

¹¹Wonogo logonet, Aliku ALA enegen kagak maluk mban eerit nogo logonet, aakumi ti mendek inagugi Mba'an mban inayuk wuppunuk, mugurok nogo nogogwaarak.

¹²Mugurok nogo logonet, Iterali inogobamini inogoba at Aliku Ala o Metit nen wogoren wagagerak kagak, mbo punuk, at alut eekwi obaane'me it aakumi enaagan-ambokan time wonogwe nogo inagugi inayuk wuko logonet, mugurok nogwe paga, Aliku ALA anini eeppiyaawak nduk, eeppereegwaarak.

¹³At Aliku inogoba Ala mbo punuk, aakumi ti mendek inagugi Mba'an inom, Atitoret inom, mugurok nogo mbareegwa,

¹⁴at Aliku ALA nen anini inoba piige logonet, inamendek kiraari unggwi wogo logowak nduk, eeppiige, inawim enaagan-ambokan wonogwe nogo nen inoori unggwi wogo logowak nduk, eeppiige, eeke kenok, it ko wappunuk logorak meek aret age nagagerak.

¹⁵At Aliku ALA nen wone kumbuk mbanogo yoragagerak ndak-ndak, wim namburiyak nduk wundi nogwe iinok, ineegin tebek yuwak nduk, Aliku ALA nen eeppiige kagak, aaninggin-paaninggin alik negen inoba age nagagerak.

¹⁶It aakumi maluk eeppiigwi wonogwe nogo ineenggime nen inagap ndaruwak nduk, at Aliku ALA nen aap inowak loongga mendek ambi mippegak, ambi mippegak, mban eeke nagagerak.

¹⁷Ambi mippegak mban eeketak kwe, it aakumi Iterali nogo nen aap inowak loongga inoweewi inoone ti, liirogon konenggo logolik. Ata, it nogo nen kwe ambi ogonggelo mbo punuk, ya wukak menggi kwak, at Aliku ALA mbo punuk, obaane'me kugi inayuk wuppunuk, mugurok nogogwaarak. At Aliku ALA nen, Yogop ee'nu ndogop ee'nu, yegetak inombomini liirogon konembunuk, eerit nogo nogogwaarak nogo kwak, eeka'lek inombomini eeko nogogwaarak mbet-mbet mari eerogo mbo punuk, alik eerit nogwe paga inawim ineenggi paga piyareegerak.

¹⁸Piyareegerak wonogwe me, inawim nogo nen tebenogo piigwi, andi-pandi eerogo piigwi, eekwi iinok, “Ai! Ao!” yogwe nogo at Aliku ALA aruk konembunuk, inabuwa nen inake kulinik-kalinik aap inowak loongga mippege nagaatik, yeenggwaage kagak, at eenik wonage logonet, it aakumi Iterali nogo inawim ineenggime nen inagap ndake nagagerak.

¹⁹Ti'nuk, aap inowak loongga nogo kangge kenok, it aakumi Iterali mendek nen inombomini maluk mbuuluk negen eeko nogogwaarak kwe, it perak, maluk nggwok lombok eerit nogo logonet, Aliku ALA obaane'me kugi inayuk wukwi, mugurok nogwe, eerit nogo nogogwaarak. Togop mban eerit nogwe iigak, at Aliku ALA nen inowak loongga ambi mippege, kangge kenok ambi mippege, eeke nagagerak. It Iterali inogogumbuk a'nuk, maluk eerit nogo nogogwaarak nogo ti, mbo puurak mbaka'lek, kundugu aret eerit nogo logorak mbareegwaarak.

²⁰Togop aret eerit nogwe iinok, it aakumi Iterali mendek nogo, Aliku ALA anini inombake logonet, “O maan it inombomini, Yogop eeko logorak o, yinuk, wone ninom koonogo pereegirak nogo, it aakumi yi, konengga'lek taganogo mbo pegaarak me,

²¹at Yotuwa nen yi aakumi ndi aakumi inenggela'me nen mugogo wumbiiga'lek logonet kambeegerak nogo, yogondak yi paga an nen aakumi yi, inanebunu ambiriluk ambi mugogo wumbiyaagin lek o.

²²Ata, It aakumi Iterali inombomini an Naliku ALA nen wone yoragagirak nogo, nggirik-nggerok porogo logonet, eerit nogo nogogwaarak nogo ndak-ndak, it yogondak togop aret eekwi iyaamun ilik? yinuk, inabut mbanikit nduk teppiyaagin,” yereegerak.

²³Wone yereegerak ti paga at Aliku ALA nen yi aakumi ndi aakumi mbet-mbet mugogo wumbiyaawak nduk, Yotuwa eenggime puulik inom time logowak nduk, teppiyareegerak.