Read Western Dani Owak Loongga 20 Bible Online

Owak Loongga 20 - Western Dani bible

Owak Loongga 20

¹Wone mbanggo nogogwaarik, aakumi Iterali nogo apit aret inanebunu Ndan wonogwe me kuli nen nugwa, o Mberetiyeba inom, o Nggileyat mendek inom, aap wim nambuka inawooluwak li'luk aago ineebe empat ratus ribu ambugwi aret at Aliku ALA enggaanom paga o Mitapa aret kuwak eeri wogo logonet, Ala apuri kuwak eerak inanebunu lombok inoweewi inom aret kuwak eereegwaarak.

³Ndi, Iterali apit o Mitapa kuwak eekwi nogo aakumi Mbeniyamin mendek inaruk koneneegwaarak. It Iterali nogo kuwak eeko nogogwaarik, aap Lewi mendek nogo yogo logonet, “Eekulik maluk mendek agaarak nogo alom liirogon aret mbininniret o.”

⁴Yogo mbareegwa, aap Lewi mendek akwe wakaarak nogo nen yorage logonet, “An nakwe nayeloman wogo nogo nimbirak inanebunu Mbeniyamin mendek wonogwe me, o Nggibeya wogo nogoorik, time nogo yugwi me,

⁵aakumi o Nggibeya mendek nen an nooruwok nduk, oonikiya paga wogo nagaarik, nit nogo yugwi o ti, o'nggut wanggeppunuk, nakwe nogo wonok nogo nagaarik, aap ambi nen eeri unggwagak, aap ambi nen eeri unggwagak, eeko logonet, at eebe warogo pegaarak o.

⁶Pogo mbaka, an nen nakwe warak nogo wonok wage nagarik, mbanogo punuk, kinanebunu 12 o kineyate kwak unde eeppatinuk kiname lombok wonogwe me, nappigirak o. An togop eekirak ti, aakumi Nggibeya mendek nen nit aakumi Iterali ninenggali kaawak nduk, eekulik maluk lombok eekaarak kenok, eekirak o.

⁷Togop aret eekirak me, yogondak kit Iterali yime wonogwe yi, kiniki wakkogo logomonggotik, wone yo'ninip o.”

⁸Yorage mbareegi, inoone ambugwi aret yogo logonet, “It Nggibeya eekaarak nogo onggo eeppiiga'lek niigak, nit yi apit ambi inawooliyana ilik, iname a, nagun mondok lek o.

⁹It eeppiyoorak nogo yi o. Ta noorak nogo nineenu aruwok nduk, iri'ngga mbanogo wakkogo logomonggoorik,

¹⁰nit aakumi Iterali ninenggela'me abu maluk lombok eekaarak onggo it yigin unde nogo aap Mbeniyamin wonogo menggam o Nggibeya time inom wim eekwi iigak, inake inambi wogora nagak yuwak nduk, Iterali inanebunu lombok 100 wonage kenok, ineebe 10 aret leenogo piigwi, seribu wonage kenok, ineebe 100 aret leenogo piigwi, ndi, sepuluh ribu wonage kenok, ineebe seribu aret leenogo piigwi, eeko logowok o.”

¹¹Yogo nogogwaarik, aakumi Iterali nogo iniki ambit eeppunuk, aakumi kota Nggibeya wonogwe ti, inooriyak nduk, eereegwaarak.

¹²Eeko nogogwaarik, it Iterali inanebunu lombok aago nogo nen wone eerogo aap Mbeniyamin mendek wonogwe me, nappiinet nogo logonet, “Eekulik mendek maluk lombok kinenggela'me agaarak wonage ti, nonggop o?

¹³Maluk mendek nit Iterali ninenggela'me agaarak nogo lek aruwak nen aakumi o Nggileyat mendek maluk lombok eekaarak nogo inooruwok nduk, wo'nira woraanip o.” Yorogogwaarak kwe, inanebunu Mbeniyamin mendek nogo nen inoreewi Iterali mendek nen wone eerogo nappereegwaarak nogo inaruk konenulik mbo pereegwaarak.

¹⁴Mbo pogo nogogwaarik, inoreewi it Iterali nogo inom wim nggaganuwok nduk, it Mbeniyamin mendek inawi kota-kota lombok nen o Nggibeya kuwak eeri wogogwaarak.

¹⁵Aakumi Mbeniyamin mendek nogo inawi kota-kota lombok nen wogogwaarak nogo ineebe lambunik ti, dua puluh enam ribu aret inawooluwak ko'nok kwi'nogwe, ndi, it inaworak o Nggibeya mendek ti, tujuh ratus aret leenogo inom kwi'nogwe, eereegwaarak.

¹⁶Aap wim nambuka ineebe kwi'nogogwaarak inenggela'me aap ineenggi kwaarek yugum keele paga nggelembunuk, nombok-kombok eerogo aakumi ineeruwak ambiriluk mbanak pugunik ineenggi tobo warogo nappogo nogogwaarak ineebe tujuh ratus aret leenak wonogogwaarak.

¹⁷Ndi, it Iterali mendek nogo inalik mban aap wim nambuka ineebe empat ratus ribu aret inawooluwak ineenggime logonet, kuwak eereegwaarak.

¹⁸Abu aret pipuk eeko nogogwaarik, aap Iterali nogo o Mbeten nogo nogogwaarik, Ala yogo logonet, “Aap inanebunu ngge mendek nen inaa'nduk a'nuk, aap Mbeniyamin mendek ninom wim namburi noorak?” Yogo mbareegwa, at Aliku ALA nogo nen, “Anebunu Yekura mendek nen inaa'nduk a'nuk, nawak o,” yoragagerak.

¹⁹Yorage mbareegi, ko'lu kuubondendok it Iterali mendek nogo, nogo nogogwaarik, o Nggibeya koorok panggok togon aret inawooliya wukkologogwaarak.

²⁰Wukkologo nogogwaarik, it Mbeniyamin mendek nogo inom wim perenggolaawok nduk, it Iterali mendek ineebe koonogo piinok, wonogwe iigak,

²¹it Mbeniyamin mendek o Nggibeya nen wundi wogo logonet, ne ti eyom paga aret it Iterali mendek ineebe dua puluh dua ribu aret kolaa'nggut negen mbanogo nappiya wogogwaarak.

²²Nappiya wogo mbareegwa, it Iterali nogo inawooliyana wogo nogogwaarik, Aliku ALA enggaanom paga leenggu maakwi iigak, o aret kiip age mbareegi, it nen at Aliku ALA yogo logonet, “Nit nen ninoreewi Mbeniyamin mendek ti, ninom wim ambinom eeri nawi ilik, lek a?” Yogo mbareegwa, Aliku ALA nen, “Kinom wim namburi nanip o.” Yorage mbareegi, kobit ineebe koombunuk wonogogwaarak togo'nogo eeppunuk, at ambi kini wuppegak eerit

²³

²⁴it Mbeniyamin wonogwe me panggok togon nogo mbareegwa,

²⁵it Mbeniyamin mendek nogo nen wundi wogo logonet, ne ti paga Iterali nogo inawooluwak ineenggime iigak, ineebe delapan belas ribu ambinom aret kolaa'nggut negen mbanogo piya wogogwaarak.

²⁶Mbanogo piigo mbareegwa, Iterali nogo abok o Mbeten woraanuk, Aliku ALA enggaanom paga inambe mage negen a'nuk, leenggu maakwi iigak, o kiip age mbareegi, Aliku ALA enggaanom paga ake warogo kani kunggwi, Aliku ALA inom lambunik logowok nduk, at ake warogo wogogwi, eereegwaarak.

²⁷Ne ti eyom paga Ala aloobut mbanak me oone yugu yonggolak nogo time aret wonage me, aap Karun ombooluk aap Eleyatat apuluk Pinekat Aliku ALA unde logonet, nogome ake eeke kagak, aakumi Iterali nogo nen at Aliku ALA yogo logonet, “Nit ne ambinom ninoreewi Mbeniyamin mendek ti, ninom wim eerit nawi ilik, puk aruwi a?” Yogo mbareegwa, Aliku ALA nen, “O ko'lu aret an nen aakumi ti waganogo kit kineenggime pinagagin me, noorak op aret o,” yoragagerak.

²⁸

²⁹Yorage mbareegi, ko'lu it Iterali mendek nogo o Nggibeya inaagan-ambokan ku enaarak logowak nduk, inawuri ando nappiigo nogogwaarik,

³⁰it ando o Nggibeya aakumi Mbeniyamin inom wim namburiyak nduk, nogo nogogwaarik, it aa'nduk ineebe koombunuk wonogogwaarak togo'nogo aret wonogwe iigak,

³¹it Mbeniyamin mendek nogo iname o kota nen wundi woraanuk, inoba kwi'nogo nogogwaarik, inoorit wogo logonet, “Aa'nduk inookoorak togo'nogo aret inoorit nogo ogoorik o,” yogwe iigak, it Iterali nogo nen yogo logonet, “Nduk-nduk irinet woraawok nduk, o kota time nen mbaganit wogwe yuwak eerit tu nggwok paga ari nawi o,” yinuk, we pilit mbaganit wogwe yuwak nduk-nduk irinet o kota endekem tu o Mbeten nogo menggam nggwok paga wogwe, ando tu o Nggibeya paga nogwe, eekwi iigak, it Mbeniyamin mendek nen aa'nduk eereegwaarak togo'nogo aret Iterali mendek muguren ineebe 30 aret inooreegwaarak.

³²

³³Muguren inoorit wogwe iigak, it Iterali wim nambuka nogo wonogwam nen o Mba'an-Tamat paga woraanuk, inakom panggombunuk, ina koonogo na'nogwe, it aap o Nggibeya oonegen kilu yi nage menggim pa'nggwe ku enaari nogogwaarak nogo mbet-mbet aret mi'nogwe,

³⁴ndi, it aap wakaa'ngget Iterali mendek ineebe sepuluh ribu o kota Nggibeya tu nggwok paga aret mi'nogwe, eeko nogogwaarik, ambugwi aret it Mbeniyamin mendek inom mondok perenggologogwaarak kwe, it Mbeniyamin nen, “Nit tebenogo pinaniyak nduk eeko agaarik o,” yinuk, mbarulik.

³⁵Mbaka'lek iigak, at Aliku ALA nen aakumi Mbeniyamin mendek nogo inooruwak nduk, it Iterali wogorage mbareegi, ne ti eyom paga aret it Iterali mendek nen it Mbeniyamin mendek inawooluwak ineenggime iigak, ineebe dua puluh lima ribu seratus aret kolaa'nggut negen mbanogo piyareegwaarak.

³⁶Piigo mbareegwa, it Mbeniyamin mendek nen, “Nineegin abu tebek yegerak kogo,” yinuk, yereegwaarak. Ti eereegwaarak ti, it Iterali nogo nen inawuri ku taani nogogwaarak nogo iniki panggombiinok, it mbaganit wogwe yuwak wogwe iigak,

³⁷aap ku taani nogogwaarak nogo pilak yogo logonet mbet-mbet aret o Nggibeya inawi paga kwi'nari unggwogo logonet, o kota time endak wa'na'nuk, aakumi apit aret inawooluwak paga inoorogo piinet nogogwaarak.

³⁸“Inooko logonet, inawi o kota kani pumonggotak ka'luk yonggo-ndonggo agan mbogut eenggi pigagangge kenok, nit mbaganit nogwe yuwak wogwe nogo yungguk yogo logonet, inoorit unggugun o,” yinuk, inom wone mbaneegwaarak me, it Iterali mendek nogo mbaganit wogwe yuwak wogwe iigak, aap Mbeniyamin mendek nogo nen inoorit wogo logonet, ineebe 30 negen inooreegwaarak. Inooko nogogwaarik, yogo logonet, “Aa'nduk inoorit nogoorak togo'nogo aret eeko ogoorik o,” yogogwaarak nogo nen

³⁹

⁴⁰inena yunggunogo na'nogo nogogwaarik, iname o kota Nggibeya kani pereegwaarak ka'luk yonggo-ndonggo agan mbogut endak wari lagangge nogo inigen kogogwaarak.

⁴¹Inigen kogwe iigak, Iterali nogo inena yungguk yogo logonet, Mbeniyamin mendek nogo inoba kwi'nari nogo mbareegwa, “Nit mondok aret ninoorogo pinaniyak nduk, eekwi kagi,” mbakwi iigak, it Iterali nen muguren nogo mbareegwa, it inaganak nugiranet mbaganit

⁴²o karume time nogogwaarak. Nogogwaarak kwe, kumaa'nariyak meek me, aap ineegin unde Iterali mendek aap pekkagak kero, tu kota eraaninu nogogwaarak nogo nen it tigitogon aret inoorogo piyareegwaarak.

⁴³It Iterali mendek agi-ogu nogogwaarak nogo aap Mbeniyamin mendek kup mbambiinok, nappiigak-wappiigak inoorit nogogwa-nogogwa oonegen wundi wage menggim pa'nggwe o Nggibeya aret piya nogogwaarak.

⁴⁴Piya nogo logonet, aap Mbeniyamin mendek ineegin unde wakaa'ngget ineebe delapan belas ribu aret inoorogo piyareegwaarak.

⁴⁵Inookwi iigak, ando yungguk togon mbaganit o karume ndo endage Erimon nogome nawok nduk, tu nggwok paga nogwe me, ineebe lima ribu aret inoorogo piigak, muguren nappiigak-wappiigak eerit o Nggireyom kuli aap ineebe dua ribu aret ambinom inoorogo piya nogogwaarak.

⁴⁶Ne ti eyom paga aap Mbeniyamin mendek aap wakaa'ngget inawooluwak ineenggime iigak, inooreegwaarak nogo ti, ineebe dua puluh lima ribu aret inoorogo piyareegwaarak.

⁴⁷Inookwi iigak, aap ineebe enam ratus perak, mbaganit o karume time nogo nogogwaarik, ndo Erimon time kumaarak iigak, tut 4 aret peneneegerak.

⁴⁸Ndi, Iterali nogo yungguninuk aap Mbeniyamin iname wogo nogogwaarik, inawooluwak paga aakumi inom, inaanggumi inom, inoorogo piinok, iname kota-kota inom, inamendek kota-kota wonage inom, abok aret kani pereegwaarak.