Read Western Dani Owak Loongga 21 Bible Online

Owak Loongga 21 - Western Dani bible

Owak Loongga 21

¹ It aap Iterali mendek o Mitapa time kuwak eeppunuk, wone mbanggo logonet, “Nit ninapuri komologwe ti, it Mbeniyamin mendek kolaawak nduk, wogorogo logogun mondok lek o,” yinuk, wone kumbuk mbaneegwaarak.

²Mbaneegwaarak me, ne ambi paga o Mbeten nogo nogogwaarik, Ala enggaanom paga le yogo logonet, “Kaliku nit Iterali ninogoba Ala yi wae. Aakumi Iterali inenggela'me nen anebunu ambiret Mbeniyamin mendek yi, nanonduk inenggaawak lek aga o?” yinuk, inoone nggwok paga Ala yogwi iigak, o aret kiip agagerak.

⁴O kiip age mbareegi, nogo yinuk, ko'lu kuubondendok it aakumi nogo nen Ala ake kani kunggak ogobakkigirogo punuk, ake warogo kani kunggwi, Ala inom lambunik logowak nduk, ake warogo wogogwi, eereegwaarak.

⁵It Iterali nogo nen wone aa'nduk mbanggo logonet, “Aakumi nit mendek ninanebunu ambi at Aliku ALA enggaanom paga o Mitapa yime ninom kuwak eeri wogwe lek kenok, kambuwak nduk, inoorogo piyaawok o,” yinuk, wone abuk nggaruk togon kumbuk mbanogo pereegwaarak me, Ala ake warogo wogogo nogogwaarik, yogo logonet, “Nit ninanebunu Iterali mendek o Mitapa Aliku ALA enggaanom paga ninom kuwak eeri woroolik nogo taamini o?” yinuk, yereegwaarak.

⁶Ti yereegwaarak nogo ti, it Iterali nogo nen, “Nit ninoreewi Mbeniyamin mendek Iterali ninenggela'me nen o yogondak aret inenggaawak lek agaarak o,” yinuk, inabuwa nen iniki wakkologo logonet,

⁷“Ninapuri komologwe kenok, it Mbeniyamin mendek wogorogo logogun mondok lek o, yinuk, Aliku ALA endage paga wone kumbuk mbanggoorak me, it Mbeniyamin mendek inoorulik ineenik wonogwe nogo ti, inakuwi kolaawak nduk, ngga nen kwaarogo wogoraagun?”

⁸Yogo nogogwaarik, “Nit ninanebunu Iterali mendek Aliku ALA enggaanom paga o Mitapa ninom kuwak eeri woroolik nogo taamini?” yinuk, yereegwaarak. Yogo nogogwaarik, ti eyom paga it Iterali lambunik kuwak eeri nogogwaarak nogo ineebe ineenggi lingginik pekkogo nogogwaarik, aap inanebunu Yabeti-Nggileyat mendek ambiriluk ambi inom kuwak eeri woroolik iyareegwaarak.

¹⁰Iigo nogogwaarik, it aap wim nambuka wakaa'ngget ineebe dua belas ribu aret kuwak eeppiinok, yorogo logonet, “O Yabeti time nogo logomonggotik, aap inom, kumi inom, elege-aabologwe inom, abok aret wooluwak paga inoorogo piinet nogo logonet,

¹¹yogop eerumunggup o. Aap inom, kumi aap kigin warak inom, abok tigitogon inoorogo piyo o.”

¹²Yorogo mbareegwa, it aap nogo, nogo nogogwaarik, it Yabeti-Nggileyat mendek inenggela'me komologwe aap inom lambungga'lek iinok mban ineebe empat ratus aret wogonako nogogwaarik, o Kanan paga o Tilo inawooliya wurik me time piya wogogwaarak.

¹³Piya woraanuk, aakumi Iterali kuwak aago nogo nen aap Mbeniyamin mendek ndo endage Erimon wonogwe nogo yorogo logonet, “Ninom paalungga warogo lambunuwok nduk, woraanip o.”

¹⁴Yorogo mbareegwa, ne ti eyom paga aret it Mbeniyamin mendek nogo iniyokan unggwi woraanuk, Iterali wonogwe me iya nogo mbareegwa, it Iterali nogo nen kumi-aap Yabeti-Nggileyat mendek inoorit nogo logonet, komologwe teppiinok, wogoren wogogwaarak nogo waganogo it Mbeniyamin mendek wogorogogwaarak kwe, ineebe endak arulik ando wobok yereegerak.

¹⁵Wobok ari mbareegi, it Iterali nen yogo logonet, “At Aliku ALA nen ninom nggaganogo pinanggerak me,” yinuk, aakumi Mbeniyamin mendek inabuwa nen iniki puru yinuk,

¹⁶it Iterali kuwak aago inoweewi nogo nen yogo logonet, “Kumi inanebunu Mbeniyamin mendek lek eerogo piigoorak me, it aap Mbeniyamin mendek inakuwi koloorak ando wobok yegerak yi, kolaawak nduk, nit nen nonggop eeruwi mbakop?

¹⁷Nit Iterali ninenggela'me yime ninanebunu ambi lek age kero, it inanebunu Mbeniyamin mendek inoorulik ineenik wonogwe yi, inendage ki logorak op kwe,

¹⁸nit Iterali mendek nogo nen, Aap ambit ambi nen apuluk kolaga it aap Mbeniyamin mendek wogorage kenok, pulunik aret logowak o, yinuk, muk kumbuk mbanggoorak me, it inakuwi kolaawak nduk, ninapuri komologwe wogoroorak lek me, wone nonggop koonuwi o.”

¹⁹Yogo nogogwaarik, wone ambi koonggo logonet, “O Mbeten abeenok o omarip paga pa'nggwe o Mbeten nen o Tikem nogo menggam tu nggwok paga oonegen lagi wage menggim pa'nggwe o Lebona eeben abeenok o ame pa'nggwe o Tilo time, tahun ambi eekak eeke paga at Aliku ALA alut eeko logonet, ale'nggen eeruwok nduk, eeri wogo menggaarak me o,” yinuk,

²⁰it aap Mbeniyamin mendek nogo yorogo logonet, “Kit nogo logomonggotik, anggur awi yarak me time enaarak a namunggup o.

²¹Enaarak kinigen wonogwe me, it Tilo mendek inapuri komologwe wundi wa'nuk, kwirabik-kwirabok agan wogwe iinok, pilak yogo logonet, kinalitak lombok komologwe Tilo mendek ti, Nakwe yi aret o, yinuk, pikko'nok it Mbeniyamin wonogo menggam kiname aret namunggup o.

²²Ndi, inogobamini nen ilik, inowe wologwe aap nen a, Wo'niraawak o, yinuk, inili agan wogwe iinok ti, nit nen it yorogo logonet, Nit nogo, aakumi Mbeniyamin mendek inoorit nogo logonet, inakuwi inaani ndiniren woroolik eereegurak me, kinapuri komologwe ti, kit nen wogoranetak nen maluk eekotak yokkiroorak kwe, it nen ndiniren nagaarak me, inili yugup o. Ata, kiniki abe paga aret teppiyaanip o, yinuk, yoraagun o,” yorogogwaarak.

²³Yorogo mbareegwa, it Mbeniyamin mendek nogo nen wone yugu nogo ndak-ndak aret eeko logonet, it komologwe nogo kwirabik-kwirabok agan wogwe me, it aap nogo nen, “Nakwe yi aret o,” yinuk, ineengge ndak-ndak aret komologwe nogo pikko'nok, ineyate kwak inanggween unde eeppatinuk menggam lombok nogogwaarak. Nogo nogogwaarik, wonogo logonet, inawi kota maluk agagerak nogo obaane'me wukkologo nogogwaarik, time aret wonogogwaarak.

²⁴Ne ti eyom paga it Iterali kuwak eeri wogogwaarak nogo inanebunu ndarak ndegek ineyate kwak inanggween unde eeppatinuk, wonogo menggam lombok nogogwaarak.

²⁵ Ne ti eyom paga Iterali inenggela'me aap endagembogut ambi inarum wonage lek me, maluk aret kagak, “Yi obeelom aret eeko ogoorik o,” yinuk, inalitik-inalitak iniki koombunuk nen ugun eerit nogo nogogwaarak. 97