Read Western Dani Owak Loongga 4 Bible Online

Owak Loongga 4 - Western Dani bible

Owak Loongga 4

¹Aap Ekut kangge mbareegi, it aap Iterali mendek nen Aliku ALA enegen kagak maluk ambinom mban eerit nogo mbareegwa,

²at Aliku ALA nen Iterali waganogo aap o Kanan inowe endagembogut Yabin o Katot logonet wone lengganogo yorage menggerak nogo eenggime pereegerak. At yigin unde inowe endage Titera, awi Karotet-Kagoyim wonagagerak.

³Ndi, at aap Yabin nogo nggweendo wim eeka kuda nen nikkenok nage menggerak sembilan ratus mbuti paga ogobakkigirik unde wonagagerak me, it Iterali mendek abu'me tebembiirogo logonet, aaninggin-paaninggin alik negen inoba piige kagak, tahun 20 age mbareegi, it Iterali nogo inoone nggwok paga nen, “Yeenggwa niret o,” yinuk, Aliku ALA yogo nogogwaarak.

⁴Yogwi iigak, aap Lapirot akwe endage Ndebora, Ala nen yoge kagak yoraga wonagagerak me, o ti eyom paga it Iterali inowak loongge nagagerak.

⁵Wonage me, at kwe Ndebora nogo o Eparayim puut nggelok-nggobok time o Arama inom, Mbeten inom, iru-ogwe kagak, oolo ageyo nggabu alome kwi'ndak wonage me, it Iterali mendek nogo nen inawone mbanuwak nduk, at owagam wagak eeko nogogwaarak.

⁶Ne ambi paga at Ndebora nen aap Abinowam aput Mbarak nogo o Kereti aap Natali mendek iname wonage me, woraawak nduk, yonggo nappiyareegerak yori nogogwaarak wage mbareegi, yoge logonet, “At Aliku Iterali inogoba Ala nogo nen, Aap Natali mendek inom, Tebulon mendek inom, ineebe sepuluh ribu aret wogoren, o puut Tabot paga lagi namenggendak keegak,

⁷an nen aap Yabin awuri ineegin warak inowe Titera nogo, at awuri yigin unde inom, at anggweendo wim eeka ogobakkigirik kuda nen nikkenok nage menggerak nogo inom, niyo Kiton pa'nggwe time nduk-nduk iranet keenggime pagi woraagin, yegerak me, yokkigi o.”

⁸Yoge mbareegi, at Mbarak nen Ndebora yoge logonet, “Kat ninom noorak keenok, an noorak op kwe, kat ninom noorak lek keenok perak, an kunduk nagin lek o.”

⁹Yoge mbareegi, at Ndebora nen, “Op aret o. An ninom aret nagin neegak kwe, kat nen ari logonet, Nalik noorak lek, yagandak paga at Aliku ALA nen aap Titera nogo waganogo, kwe ambi eenggime pemenggerak paga nen kat kendage tiyak yigin lek o,” yinuk, Mbarak imbirak o Kereti nogogwaarak.

¹⁰Nogo nogogwaarik, at Mbarak nen it aap inanebunu Tebulon mendek inom, Natali mendek inom, aap ineegin warak ineebe sepuluh ribu nogo woraawak nduk, yonggo piyareegerak wogo mbareegwa, inom nogo logonet, at Ndebora nogo inom nogogwaarak.

¹¹Ndi, aap ambi endage Ebet anebunu Keni mendek nogo nen, at owe-awot aap Kobap Muta arebenggelo ombowologwe wiganak ando inom ogooppunuk, o Kereti koorok nggween Taanayim teno alome time ooliya wuppunuk, wonagagerak.

¹²Wuppunuk wonage kagak, “Aap Abinowam aput Mbarak nogo muk puut Tabot paga laganggerak wonage o,” yogwe at Titera nogo aruk konengge nagagerik,

¹³anggweendo wim eeka sembilan ratus mbuti paga ogobakkigirik nogo inom, at awuri at inom wonogwe nogo abok aret inom, o Karotet-Kagoyim nen niyo Kiton kuli time wonogwe nogo kuwak eeppiyareegerak.

¹⁴Kuwak eeppiyareegerak wonogwe iigak, at Ndebora nen Mbarak yoge logonet, “At Aliku ALA nen aa'nduk a'nuk nagaarak lek mbaken? O yogondak aret aap Titera keenggime pagakit nduk, muk aa'nduk a'nuk nagaarak me, mbet nak o.” Yoge mbareegi, at Mbarak nogo awuri sepuluh ribu nogo inom puut Tabot paga nen wambi wogo nogogwaarik,

¹⁵aap Titera nogo inom wim namburuwok nduk, endok kunggwi iigak, at Aliku ALA nen aap Titera awuri ineegin warak nogo inom, anggweendo wim eeka mendek inom, abok aret naalop-kaalop eerogo piinet nage mbareegi, aap Titera nogo anggweendo paga nen wambi woraanuk, iyok paga kole mbaganit nagagerak.

¹⁶Kole nage kagak, at Mbarak awuri inom nen Titera awuri ineegin warak inom, inanggweendo wim eeka nogo mendek inom, apit aret muguren-magaren eerit, o Karotet-Kagoyim kuli piya nogo nogogwaarik, Titera awuri nogo aap ambit-ambi ineenik teppiyoolik abok tigitogon aret wooluwak paga inoorogo piinet nogogwaarak.

¹⁷Inoorit nogwe iigak, o Katot mendek inowe endagembogut Yabin nogo ti, aap Ebet nogo owe-awot inom kunik me, aap Titera nogo, iyok paga kole mbaganit aap Keni mendek Ebet nogo akweeluk Yayen awooliyana nogome ari nagagerak.

¹⁸Ari nage mbareegi, at kwe Yayen nogo Titera wage enegen kage nagagerik, ame nen wundi nanuk, imbirak lambumbunuk, yoge logonet, “Kagabiti mbaka'lek mbet-mbet unggwi omok o, nogoba.” Yoge mbareegi, ooliyana nogome unggwi nagagerak. Unggwi nage mbareegi, kwe nogo nen nogoyum paga lenggenogo kiraappereegerak.

¹⁹Kiraappege mbareegi, aap Titera nogo nen, “An yi abu me, yi ambi too'niru o.” Yoge mbareegi, at kwe nogo nen, tapi agabolo paga niyoowak ogobakkigirik yilak amburu toolak nogo abit paarogo wogoreegerak nengge mbareegi, nogoyum nogo paga lenggembereegerak.

²⁰Lenggembege mbareegi, at aap nogo nen kwe nogo yoge logonet, “Tungga paga taati wonage me, aap ambi woraanuk kin wakkeego logonet, Aap ambi wagaarak yime wonage a, lek a? yokkugwi iinok, kat nen, Yime lek, yoraanu o,” yinuk, yoreegerak.

²¹Yoge nagagerik, at owak lobak yereegerak me, nogo pili lombok yege kagak, at kwe Yayen nogo nen ooliya wuko logonet omaawi eeka mbuti pulu inom, ndo inom, eenggime woppunuk, mbawok owagam nage nagagerik, mbuti pulu nogo paga at andi'ndak awi yuk togon nggween inom polok togon wareegerak me, aret kambeegerak.

²²Kambeegerak kagak, at Mbarak nen Titera kwaarit wage kwe Yayen nogo enegen kage nagagerik, ame nen wundi nanuk, aap Mbarak nogo yoge logonet, “Aap kat kwaarit wagandak nogo, titikkirikit nduk omok o.” Yoge nagagerik, imbirak pekka unggwogo nogogwaarik, aap Titera nogo mbuti pulu andi'ndak awi yuk togon warak nggween kunik kambeegerak wonage kagagerak.

²³Ne ti eyom paga Ala nen it Iterali yeenggwaarage kagak, Iterali mendek nen aap Kanan inowe endagembogut Yabin awuri nogo tebenogo piyareegwaarak kwe,

²⁴inowe Yabin perak, it aakumi Iterali nogo inomaawi arit unggwage logonet, tebenogo puwok nduk wakkenet unggwogoga-unggwogoga irip paga enggaawak lek eerogo aret pereegwaarak.