Read Western Dani Owak Loongga 5 Bible Online

Owak Loongga 5 - Western Dani bible

Owak Loongga 5

¹Ne ti eyom paga kwe Ndebora at Abinowam aput Mbarak imbirak ndawi wareegwaarak nogo yi o.

²“It Iterali wim nambuka wakaa'ngget nogo wim namburiyak nduk, ineeruwak tek aago inaa'nduk ogwe, Ndi, it aakumi ugun iniki nen, Ninom namburi nawi o, yinuk, yogwe, Eekaarak me, An Aliku ALA alut eeke agarik o.

³An nogo, Iterali inogoba Ala ake ndawi tiyangge, At Aliku ALA endaame wake, Eeke me, Kit aap kinendagembogut yi, kinaruk o. Kit nagawan-nagawan yi, konenggo logonip o.

⁴Kaliku nogoba ALA wae! Kat nen o Teyit nen wundi nage, O Erom nen li'luk ee'nuk, wungge, Eeke keegak, Nggween akom langgok eeke, Mbogut paga nen mayu wamelanggen wuppit wage, Iyaagi nappunuk, mayu lubu-lubu wangge,

⁵ Puut Tinayi unde menggendak Kaliku ALA kenggaanom paga, Kaliku Iterali inogoba Ala kenggaanom paga, Puut-puut na'ndo-wa'ndo eeke, Eekerak o.

⁶At Anat aput Tamagat wonage eyom paga, At Yawen nda'nagagerak eyom paga, Tu nggwok paga aakumi nebek lek iigak, Tu mbuuluk paga yelok-nggolok mban nogwe,

⁷O Iterali wonage me time inabolok yogwe, Noone-koone yogwe, Eeka'lek puk wonogwe iigak, Kat Ndebora nogo mi'nage, Iterali inagalo kwe aret kwe, mi'nage, Eekendak o.

⁸Iterali nen Ala obaane'me alik mendek ambi miikwi iinok, Inawim nen inooruwak nduk, inaru pak paga wagaarak kwe, Aakumi Iterali ineebe empat puluh ribu inenggela'me time Inarin inawooluwak lek aret iigirak kwe,

⁹Iterali inoweewi wim wakaa'ngget inaa'nduk ogwe, Aakumi ugun iniki nen, Ninom wim eeruwok o, yogwe, Eekaarak kenok, Wi, lombok inombake logonet, Aliku ALA alut eeke agarik o.

¹⁰Yi tooko menggam ndawi waka nen ndawi waka logonet, Aliku ALA nen yegetak a'me nggelok eeke, Aakumi Iterali ugun mendek nen abe koonak mban eekwi, Eekaarak ndawi ti, Kit keledai amborowak paga yum ndoombunuk kwi'nogwe, Keledai miya amborowak paga kwi'na'nuk wogwe, Eeko monggotak nogo Konembunuk yoranet nogo logonip o. Ndawi wakwi iinok, Aliku ALA apuri nen tu kota unggwogo menggam wambi woraanuk,

¹²Ndebora yi wae. Mi'naru o. Ndebora yi wae. Mi'naru o. Mi'na'nuk, ndawi ambi tiyanu o. Mbarak yi wae. Mi'naru o. Aap Abinowam aput yi wae, Aakumi kugun wogonake logomenggendik, wogoren namunggun o.

¹³Yogwi iinok, it eegu pugu nogo nen inoweewi nagawan-nagawan yora wogwe, Aliku ALA apuri yo'niri wogwe, Eeko logonet,

¹⁴Eparayim mendek Amalek inanggween paga nen wogwe, Mbeniyamin awuri inom wogwe me, inom wogwe, It Makit mendek nen inogobamini wim wone mbangga wogwe, Tebulon mendek nen yigin unde inoweewi wogwe, Eekaarak o.

¹⁵Itakat mendek aap wakaa'ngget Ndebora inom ogwe, Itakat mendek wogwe iinok, Mbarak inom wogwe, Eeko nagaarik, Oonda mbanuwak nduk, o kobappaga time wambi wagaarak o. Togop aret eekaarak kwe, anebunu Uruben mendek perak, Nonggop eeruwi? yinuk, iniki koonggwi wonogwe,

¹⁶Nonggop nduk, ndomba wonogo menggam puk ogwe? Ndomba unde nuwet ari nogo koneniyak nduk wonogwe ilik? Anebunu Uruben mendek wonogwe nogo, Nonggop eeruwi? yinuk, iniki mban koonggwi, Eekaarak o.

¹⁷It Nggileyat mendek yi Yoraran ene paga puk wonogwe, Ndan mendek nonggop nduk inayiiro paga yilinik mban wonogwe, Atet mendek niyo yenggenak laut aa'nggi paga ilin me time kumaarak puk wonogwe, Eekaarak kwe,

¹⁸Anebunu Tebulon mendek nen perak, Ninooriyak op aret o, yinuk, inagabiti mbaka'lek aret nogwe, Anebunu Natali mendek kunduk inagabiti mbaka'lek puut karume time nogwe, Eekwi iigak,

¹⁹O Taanak niyo Megiro yi eneerime time aap inoweewi inendagembogut abok wim namburi wogwe, Aap inendagembogut Kanan mendek inom perenggologwe, Eekaarak kwe, Inagugun mbuti perak inom, alik mendek ambi inom, wonok noolik o.

²⁰Laaluguragan mbogut paga nen inom a'nuk nambukwi, It wonogo menggam nen aap Titera inom nambukwi, Eekwi iinok,

²¹Niyo Kiton nogo ti, o maan mendek aret me, Ninawim nogo wogoren nage, Eeke kenok, Niniki yi wae. Ninogogumbuk eeppatinuk, wim eeko logowok o.

²²Kuda ogowa ambik me, Mbe agan nogo logonet, iniyogobit oone agan nogwe iinok,

²³It kota Merot menggaarak nogo nen it aap wakaa'ngget inom wim eekwi iinok, Aliku ALA yeenggwaariyak woroolik me, Aliku ALA ayonggo malayikat nogo nen o kota Merot pulunogo pege, It o time wonogwe nogo pulunogo piige, Eeruwak, yegerak o.

²⁴Yi kumi ndi kumi iigak, aap Kenit mendek Kebet akwe Yawen nogo inale'nggen oba pugwi, Kumi abok inawooliyana wonogwe iigak kwe, at mban inale'nggen oba pugwi, Eeko logowak o.

²⁵Aap Titera nogo nen, Niyo wo'niru, yegerak kagak, yilak amburu wogoge, Niyoowak it nagawan nengga paga yilak amburu longgo warak toologo wogoge, Eeke nagaarik,

²⁶Ooliya wuriyak omaawi eeka pulu wagangge, Eenggi abe paga ndo wagangge, Eeke nagaarik, Aap Titera anobak yigirogo wake, Andi'ndak awi yuk togon mannake, Eeke mbaki,

²⁷Kwe Yawen iyok paga oone ndu ngginnage, Ngginnage nagaarik, puk age, Ngginna'nuk, puk age nagaarik, iyok paga taati aret kangge, Eekerak o.

²⁸Eeke kagak, Titera agalo nogo nen, Pugagi mbanak me nen wunnagak eeke logonet, Anggweendo waga'lek elaambirik nonggop nduk o? Aguda iniyogobit oone agan waga'lek nonggop aga o? Ari kenok,

²⁹Komologwe ayeloman mini iniki warak nen kwe nogo wone onggo yogwi kwe, At nen mban onggo yikkolage logonet,

³⁰Aakumi inagugun waganogo tumbukkologwe, Komologwe tawe ambit ilik, mbere a? it aap inalitak kologwe, Yum yabenggek eerak kugun wogo Titera ake waganggwi, Yum yabenggek irip paga pugu'ndalek aago kenok, nenggaanok me yirik logorak kugun wogo niri wogwe, Eekwi nogo lek a? Yinuk, ari agaarik o.

³¹Togop aret me, Kaliku nogoba ALA wae. Kawim togop aret lek eerugun kwe, Oonegen komeninuk lagi wage kenok, Ia! yinuk, pi wakwi kwak, Kat kinom kiniki kunik nogo, togop aret logowak o.” Yinuk, ndawi pege nagagerik, wonogwe iigak, o nogo abolok lek wonage kagak, tahun 40 aret eereegerak o.