Read Western Dani Owak Loongga 7 Bible Online

Owak Loongga 7 - Western Dani bible

Owak Loongga 7

¹At Yeru-Mba'an, endage ambi Nggireyon nogo, awuri inom apit aret o kuubondendok yi eneeri endage Karot time ari nogo nogogwaarik, it aakumi Miriyan mendek nogo puut Mora abu'me kobappaga eeben abeenok o omarip paga pa'nggwe inawooliya wuppatinuk, wonogwe iigak, it wonogwe eeben yime pa'nggwe inawooliya wureegwaarak.

²Wuppunuk wonogwe iigak, at Aliku ALA nen Nggireyon yoge logonet, “An nen aakumi Miriyan mendek kineenggime wokkirage neegak, Iterali nen yogo logonet, Ala omaawi paga lek o. Ata, nit ninomaawi paga eeko o, yinuk, iniki tiyappatukwak, kawuri apit kinom wagandak ti, ando mogonogo nappiyoorak me,

³ it ambi inagabiti nen inaganak nuk-nuk eeke kenok, puut Nggileyat yi paga nen aret iniyokan nawak nduk, yoret o.” Yoge mbareegi, aap apit ineebe dua puluh dua ribu aret iname wogwe iigak, aap ineebe sepuluh ribu mban puk ogogwaarak.

⁴Puk ogo mbareegwa, at Aliku ALA nen Nggireyon ambinom yoge logonet, “Kat kawuri apit mban aret wonogwe me, an nen leenogo wokkirikit nen, yi aa'nggi paga ogu time wogoren nak o. Namenggendak me, time nen, Aap yi aret kinom noorak o, ari neenok, kinom aret nage, ndi, Aap yi, kinom noorak lek o, ari neenok perak, puk ogwe, eeruwak o,” yinuk, yoreegerak.

⁵Yoge mbareegi, at Nggireyon nen it aap nogo wogoren niyoome nage mbareegi, Aliku ALA nen at yoge, “It aap niyo inamili penak nggeewo kwak nunggwi iinok, inalik leenogo piige, ndi, it aap inendobanggun yindumbunuk nunggwi iinok ti, inalik leenogo piige, eeru o.”

⁶Yoge mbareegi, it aap ineebe lambunik tiga ratus nogo niyo ineenggi paga tamok nunggugwaarak kwe, it ando apit perak, inendobanggun yindumbunuk nunggugwaarak.

⁷Nonggo mbareegwa, Aliku ALA nen Nggireyon yoge logonet, “It aap ineebe tiga ratus niyo ineenggi tamok nenggaarak ti paga an nen kinagap ndake logonet, aakumi Miriyan mendek kineenggime pinagagin me, it ando ti, iniyokan iname lombok nawak nduk, yoret o.”

⁸Yoge mbareegi, at Nggireyon nen ineebe tiga ratus nogo teppiinok, it aap Iterali mendek ando apit nogo iname nappiige logonet, inambi kambu inom, oone nggwok pu eeka trompet nogo inom, Nggireyon awuri inom waganeegwaarak. Ndi, it aap Miriyan mendek nogo Iterali inawooliya wuppunuk, wonogwe me, alu'me ogu time inawooliya wuppatinuk, wonogwe iigak,

⁹oonikiya nogo paga Aliku ALA nen Nggireyon yoge logonet, “It aakumi Miriyan mendek inawooliya wuppunuk wonogwe ti, an nen keenggime wokkirigin me, mi'na'nuk, inoori nak o.

¹⁰Ndi, kinom wim perenggoloorak kagabiti mbake nogo lek eerogo punuk, kogogumbuk a'nuk, it aap Miriyan mendek inawooliya wuppunuk wonogwe me, inoba kwi'nari wambi nanok nduk, it nonggop yogwe iyaamun? yinuk, kayeloman Pura kimbirak inawooliyana kinaruk nggooni nanip o.” Yoge mbareegi, at ayeloman Pura imbirak wambi nogo nogogwaarik, inawim inawooliya wurik kuli paga nogome nogogwaarak.

¹²Nogo nogogwaarik, it aap Miriyan mendek inom, Amalek mendek inom, aakumi apit oonegen wundi wage menggim pa'nggwe mendek inom, ineebe murip-malo pogom apit aret o alu'me kobappaga time inawooliya wuppatinuk wonogwe, ndi, it inaanggumi unta togop mban aap ineenggi lingginiyak abu meek, mbini kale'ngga pogom wonogwe, eekwi iyareegwaarak.

¹³Iigo nogogwaarik, aap Nggireyon nogo panggo yi nage nagagerik, aruk kagak, aap Miriyan mendek ambi nen abi kagagerak nogo ore ambi mbininogo yoge logonet, “Waabuk negen jelai anggen yigirik paga oroti worarak lilom aago ambi limbik-kambik agan nit Miriyan ninawooliya wurik me yime unggwi wage nagaarik, nawooliya wurik yi, mik ari logonet, yamu-yamu wangge kagarak o.”

¹⁴Yoge mbareegi, ore nogo nen, “Ie! Wone ti alik abu lek o. Ata, at Ala nen nit aakumi Miriyan mendek ninawooliya wurik yi inom abok aret aap Iterali mendek Yowat aput Nggireyon nogo eenggime pegerak me, awooluwak paga ninooriyak nogo aret kagandak o,” yinuk,

¹⁵abi kagagerak nogo alom inom mbininogo yoge Nggireyon aruk konengge nagagerik, at Ala abu'me tebe yinuk, Ala endage tiyappereegerak. Tiyappege nagagerik, Iterali inawooliya wurik me nogome wage nagagerik, at awuri yorage logonet, “Aliku ALA nen aakumi Miriyan inawooliya wuppunuk wonogwe nogo abok aret muk nineenggime pinanggerak me, mbet-mbet mi'nanip o.”

¹⁶Yorage nagagerik, at Nggireyon nen awuri ineebe tiga ratus nogo, aap kenagan eerogo piige nagagerik, oone pu eeka trompet inom, ndi wuninik niyoowa'na yonggolak inom, awuri apit aret inalitak wogoragagerak.

¹⁷Wogorage nagagerik, yorage logonet, “An Miriyan mendek inawooliya wurik kuli paga taa'nogo ari nage logominggirik, an eeke neenok, kit ndak-ndak aret ee'nu o.

¹⁸Eeko logonet, an nawuri ninom oone nggwok eeka trompet nogo oone pu eekwi niinok, kit inawooliya wurik enaagan-ambokan wanggekwi nogo abok aret nen trompet oone pu eeko logonet, Aliku ALA inom, Nggireyon inom, inendage paga o, yinuk, keekok piyanggaamunggup o,” yinuk, yoragagerak.

¹⁹Yorage nagagerik, oonikiya nogo iniki mbere eeke paga it aap Miriyan inaa'nduk o tum wako nogogwaarak nogo inawooliyana nogwe iigak, inobaane'me tum awo ari waga'lek iigak, Nggireyon awuri inom inaa'nduk it wim mendek inawooliya wurik me kuli taati ari nogo nogogwaarik, oone nggwok eeka trompet nogo oone pu eekwi, niyoowak ineenggime wonage nogo telanggwi, eeko mbareegwa,

²⁰aap kenagan aago leenak nogo nen ambugwi aret oone nggwok eeka trompet nogo oone pu eekwi, niyoowak nogo telanogo pugwi, ndi wuninik nogo ineenggi kwaare'me waganggwi, oone pu eeka yuwak nduk, trompet nogo ineenggi abe'nggan waganggwi, eeppunuk, “Aliku ALA inom, Nggireyon inom, inawim o!” yinuk, keekok piyanggogogwaarak.

²¹Keekok yinuk, it wim mendek inawooliya wurik yendok-wandok mi'ndak iinok, it aakumi Miriyan mendek iniki abu ma'nogo nogogwaarik, inoone ya-kwa agan inalitak mbaganit nogogwaarak.

²²Nogwe iigak, aap Nggireyon awuri ineebe tiga ratus nen oone nggwok eeka trompet nogo oone pu eeko mbareegwa, at Aliku ALA nen it aap Miriyan mendek ineegin warak it mban-mban wat-wat agan nogo logowak nduk, eeppiige mbareegi, it mban-mban wat-wat agan o Terera pa'nggwe o Aben-Mekola kota Tabat koorok o Mbet-Tita kuli time mbaganit nogogwaarak.

²³Mbaganit nogwe iigak, it aakumi Iterali mendek inanebunu Natali inom, Atet inom, Manate mendek niyo Yoraran yibagan-enebagan abok aret inom, inawuri ineegin warak woraawak nduk, yonggo nappiyareegerak wogo nogogwaarik, aap Miriyan mendek muguren nogogwaarak.

²⁴Muguren nogwe iigak, at Nggireyon nen, “It aap Miriyan mendek nen yi Yoraran kologo logokwak, kit kinaa'nduk wambi wogo logomonggotik, nggween yi Yoraran yibagan-enebagan kuli o Mbet-Mbara kuli paga mbet-mbet tebenggola wambi woraanip o,” yinuk, yonggo o Eparayim nggelok-nggobok me wonogwe me, nappiige mbareegi, it aap Eparayim mendek abok wambi wogo nogogwaarik, nggween niyo Yoraran yibagan-enebagan o Mbet-Mbara kuli time abok aret tebenggo'net nogogwaarak.

²⁵Tebenggo'net nogo logonet, aap Miriyan mendek inendagembogut mbere ambi endage Orep, ambi endage Teep, imbirak piginako nogogwaarik, aap Orep nogo yugum puut lunik Orep paga warogo pugwi, ndi, aap Teep nogo anggur aambiranggo menggam o endage Teep time warogo pugwi, eeppunuk, it aap Miriyan mendek nogo muguren nogo nogogwaarik, it aap Orep Teep imbirak inanobak mbanak wonok, aap Nggireyon niyo Yoraran aa'nggi paga wonage me iri wogogwaarak.