Read Western Dani Owak Loongga 9 Bible Online

Owak Loongga 9 - Western Dani bible

Owak Loongga 9

¹Aap Yeru-Mba'an apuluk Abimelek nogo nen iyaawi o Tikem wonogwe me, iya nage nagagerik, it inom, at agalo anebunu mendek inom, abok aret wone yorage logonet,

²“An nogo ti, kit kinamiya mogonik aret me, it aap Yeru-Mba'an apuri 70 nogo nen kinarum logorak op mbakwi a, aap ambit-ambi nen kinarum logorak op mbakwi a? yinuk, it aakumi Tikem menggaarak abok aret ineegwa'me wanip o.”

³Yorage mbareegi, at iyaawi nogo nen it aakumi Tikem menggaarak nogo Abimelek nen yereegerak nogo mbininirogo mbareegwa, “Abimelek ti, ninamboko aret me,” yinuk, mugurok noorak mbareegwaarak.

⁴Mbako nogogwaarik, kugi Mba'an-Mberit alut eeko menggam nen wu mbuti perak aaninggin mbere negen wakkagak eerogo Abimelek wogogo mbareegwa, wonok aap endekem mendek a'nggan wogonaka nogo awuri a'nuk inom nugu logowak nduk, wogoragagerak.

⁵Wogorage mbareegi, Abimelek inom at ogoba ame o Opara nogo nogogwaarik, Yeru-Mba'an apuri at oreewi ineebe 70 nogo yugum ambit ndoonak paga inoorogo piyareegwaarak. Inoorogo piigwi iigak, Yeru-Mba'an aput enabooluk ndarak, endage Yotam nogo perak, alik kumaa'nari nagagerak me warulik.

⁶Ti eeko mbareegwa, it aakumi o Tikem menggaarak inom, o Mbet-Milo menggaarak inom, aap Abimelek nogo, inowe endagembogut logowak nduk, o magame eyo teno alome time kuwak ari nanuk, mippereegwaarak.

⁷Mippereegwaarak nogo, at Yotam aruk konembunuk, puut Nggeritin paga lagangge nagagerik, oone nggwok paga agago wuppi wage logonet, “Kit aakumi Tikem monggotak kogona yi wae. Kinoone Ala konengge logowak nduk, an yokkirage yi, kinaruk logonip o.

⁸Ne ambit paga yi eyo ndi eyo ambit me kuwak eeppunuk, inowe endagembogut mippuurak nduk, it nen eyo tayitun yogo logonet, Ninowe kendagembogut kat aret mippagawok o.

⁹Yoreegwaarak kwe, eyo tayitun nogo nen it yorage logonet, An ti, nanggen amburu paga kugi inom, aakumi inom, inayuk wuriyak nduk, eeke minggirak nogo mbo punuk, kit yi eyo ndi eyo kinirimbaga wiga agan nege logorak op mbakop? Neebi o.

¹⁰Yorage mbareegi, it eyo apit nogo nen eyo wuli nogo yogo logonet, Kat aret ninowe kendagembogut mi'naru o.

¹¹Yoreegwaarak kwe, eyo wuli nogo nen ari logonet, An ti, nanggen abu obeelom ombat abe lombok yi'nage minggirak nogo mbo punuk, kit yi eyo ndi eyo kinirimbaga wiga agan nege logorak op mbakop? Neebi o.

¹²Yorage mbareegi, it eyo apit nogo nen eyo anggur nogo yogo logonet, Kat aret ninowe kendagembogut mi'naru o.

¹³Yoreegwaarak kwe, at eyo anggur nogo nen ari logonet, An ti, nanggen amburu paga kugi inom, aakumi inom, iniki ale'nggen eeppiige minggirak nogo mbo punuk, kit yi eyo ndi eyo kinirimbaga wiga agan nege logorak op mbakop? Neebi o.

¹⁴Yorage mbareegi, peebi age yobok paga it eyo apit nogo nen poondo alok nogo yogo logonet, Kat aret ninowe kendagembogut mi'naru o.

¹⁵Yoreegwaarak kwe, at poondo alok nogo nen it yorage logonet, Kit nen an abet aret mippaniyak mbakotak kenok, an nangguna'me nobappiirogo minggim nabu'me yime ari woraanip o. Ndi, Kineebi, mbakwi kenok, an neno'mbak alok yi paga nen kani omoonuk wungge logonet, yi kilu ndi kilu puut Libanon paga wonage nogo apit aret kani nawak, yoragagerak o.”

¹⁶Yinuk, ari nagagerik, at Yotam nen it ambinom yorage logonet, “Kinowe endagembogut Abimelek mippogotak nogo ti, pilit lek kiniki abe paga eeriyak mbakotak nogo a'me aret nggelenggwi, ndi, an nogoba Yeru-Mba'an nen obeelom eeppinagage nagagerak nogo onggo kit nen at inom, apurilogwe inom, ndak-ndak obeelom eeppiigwi, eekotak nen ti, Op aret, mbariyak kwe,

¹⁷kit aap Miriyan mendek ineenggime wonogwe me, an nogoba nen, Ndininake logonet, nooriyak kenok ti op aret o, mba'nuk, kinagap ndareegerak kwe,

¹⁸yogondak kit nen nogoba apurilogwe meek eerogo mbo pinaninuk, nogoba apurilogwe ineebe 70 yugum ambit ndoonak paga abok aret inooppunuk, Abimelek nogo, nogoba nen kwe ayeloman mendek luulu waganeegerak aagaluk aret kwe kagak, kit nen, Nit ninamiya mogonik me, yinuk, kinowe endagembogut mippogotak ti, meek aret kinombaki o.

¹⁹An togop aret mbakirak kwe, o yogondak aap Yeru-Mba'an apurilogwe inom eeppiigotak nogo ti, pilit lek kiniki abe paga eeriyak mbakotak nogo ndak-ndak aret eekotak kenok, Abimelek nen eeppinagage paga kiniki ale'nggen ombakwi, ndi, kit nen at eeppugwi paga at iniki ale'nggen kinombake, eeko logonip o.

²⁰Ndi, kiniki abe paga eerulik kenok perak, Abimelek eebe paga nen kani omoonuk wunuk agan wundi wage logonet, kit o Tikem monggotak inom, o Mbet-Milo monggotak inom, abok aret pup eerogo pinagage, ndi, kit o Tikem monggotak inom, o Mbet-Milo monggotak inom, kit kineebe paga nen kani omoonuk wunuk agan wundi wage logonet, Abimelek eebe nogo lek eerogo pege, eeruwak o,” yinuk, yoragagerak.

²¹Yorage nagagerik, at Yotam nogo oreeluk Abimelek eebe paga agabiti nen mbaganit o endage Mbeet ari nanuk wonagagerak.

²²Wonage kagak, Abimelek nogo nen it aakumi Iterali, “Yogop ee'nip ndogop ee'nip,” yorage kagak, tahun kenagan aret eereegerak.

²³Eeke mbareegi, at Ala nen Abimelek it aakumi Tikem menggaarak nogo inom ogookkolaawak nduk, eeppiige mbareegi, it aakumi Tikem menggaarak nogo nen, logonet-logonet aap Abimelek pilit pugunogo ambokan laganggo nogogwaarak.

²⁴At Ala nen eerogo piyareegerak nogo ti, aap Yeru-Mba'an apuri 70 Abimelek nen inoorogo piige, ndi, o kota Tikem menggaarak nen at orewologwe inooruwak nduk, yeenggwaagwi, eereegwaarak ti paga inane'me inoorak inamiya inoreeluk Abimelek oba logowak nduk, eeppiyareegerak.

²⁵Eeppiige mbareegi, it o kota Tikem wonogwe nogo nen aap ando puut-puut tiyarogon paga aakumi nogwe-wogwe iyo, inigen logowak nduk, piigo mbareegwa, aakumi wogwe iinok, ineebe pippiinok, inamendek ndinggolagak eekwi nogo, wone wonok aap Abimelek yori nogo nogogwaarak.

²⁶Ne ti eyom paga aap Ebet aput Nggaan nogo oreewi inom o kota Tikem time logowak nduk, wogo mbareegwa, it aap o Tikem wonogwe nogo nen, “Abet aret waga,” mbareegwaarak.

²⁷Mbakwi iigak, it aap nogo yabu yarak me nogo nogogwaarik, anggur anggen mbanogo kuwak eerogo aambiranogo punuk, iniki ale'nggen paga laago lappunuk, inagugi awi wurik me unggunuk, mbi nunggwi, anggur amburu nunggwi, eeko logonet, Abimelek pulunogo pereegwaarak.

²⁸Pulunogo pogo logonet, aap Ebet aput Nggaan nogo nen, “Aap Abimelek inom, it aap Tikem mendek inom, ti taani me, nduk, nit inabu'me logorak mbakop? At Abimelek nogo ti, Yeru-Mba'an apuluk nogo lek a? Ndi, at obaane'me wone yaga nogo ti, aap Tebun nogo lek a? Togop aret me, at Tikem ogoba aap Kemot mendek inabu'me logorak op aret kwe, aap Abimelek abu'me nit nonggop togon logorak?

²⁹Togop aret me, yi aakumi ndi aakumi o kota yime wonogwe yi, an niyok me wonage logonetak en, Abimelek tebenogo pikit nduk, yoge logonet, Kawuri yigin unde ninom wim namburuwok nduk, unggwi woraayok, yo'netak o,” yinuk, yereegerak.

³⁰At Ebet aput Nggaan yereegerak nogo aap Tebun o kota unde wonage nogo nen aruk konengge nagagerik, anini ambik agagerak.

³¹Anini age nagagerik, aap Abimelek wonage me, wone mbawok eerogo nappiige logonet, “Aap Ebet aput Nggaan nogo oreewi inom o Tikem unggwi wogo nagaarik, kat kinom ogookkolaawak nduk, o kota yime menggaarak inikime manako agaarik o.

³²Togop aret me, kat inom, kat koreewi kinom wonogwe ti inom, oonikiya paga aret wogo logomonggotik, yabu yarak me time kumaarak ambe nggaganak a woramonggotak me,

³³o ko'lu oonegen awo wundi wage kagak, kota yime inawi paga kwi'nari unggwogwe kiinok, Nggaan inom, at awuri inom, kinom wim namburiyak nduk, wundi nogwe iinok, kat mbake nogo ndak-ndak aret eeppiyaamunggun o,” yinuk, yoreegerak.

³⁴Yoge mbareegi, at Abimelek nogo awuri inom, ineebe 4 aret eerogo punuk, oonikiya paga o Tikem nogome ambe nggaganak puk a wogogwaarak.

³⁵Wogo nogogwaarik, aap Ebet aput Nggaan nogo ugun tu paga wundi nage nagagerik, o kota tu unggwogo menggam taati aret mi'ndak wonage logonet, Abimelek awuri inom kumaarak me taa'nogo nen wundi wogwe enegen iyareegerak.

³⁶Aap Nggaan nogo nen Abimelek awuri inom wundi wogwe enegen iige nagagerik, aap Tebun nogo yoge logonet, “Aakumi ambik puurom nen wambi wogwe ti, kenegen pegiyet o.” Yoge mbareegi, at Tebun nen, “Nogo ti, aakumi wambi wogwe ti lek o. Ti puut agalu'mak aret kagan o.”

³⁷Yoge mbareegi, at Nggaan nen, “Lek o. Ti aakumi ambik nggween kole logonak puut paga nen wambi wogwe, ndi, aap ambi aago eyo teno alom me mbi wako menggam nen wogwe, eekwi ti, kenegen iyet o.”

³⁸Ari mbareegi, at Tebun nen at yoge, “Aap wonengga nen ari logonet, At Abimelek ti ta me, nit at abu'me logorak, yinuk, yegerak nogo ngge o? Kat nen miyuk-meya eerogo piigendak yi aret nogo lek a? Yi aret me, yogondak aret kinom wim perenggolet o.”

³⁹Yoge mbareegi, aakumi o Tikem menggaarak inigen iigak, aap Nggaan Abimelek imbirak wim nambureegwaarak.

⁴⁰Nambuko logonet, at Abimelek nogo mi'na'nuk, muguren inoorit o kota tu unggwogo menggam taa'nogo kuli aret piya wagagerak.

⁴¹Piya wage nagagerik, aap Abimelek nogo ame Aruma puk ari nagagerak kagak, at Tebun nogo nen aap Nggaan inom, at oreewi inom, abok aret, “O Tikem yime kit logorak lek o,” yinuk, mugogo wumbiyareegerak.

⁴²Wumbiige mbareegi, ko'lu nen aakumi Tikem mendek apit aret yabu yarak me nogogwaarak. Nogogwaarak wone nogo aap Abimelek yori nogo mbareegwa,

⁴³awuri nogo 3 kuli eerogo piinok, yabume nogome kumaa'nari wogogwaarak wonogo logonet, it aakumi nogo o kota nen wundi wogwe kwaariigo nogogwaarik, mi'na'nuk, aakumi Tikem mendek nogo apit aret inoorogo piigo logonet,

⁴⁴Abimelek nogo awuri ambik aago inom o kota tu unggwogo menggam time mi'nari wogo nogogwaarik, inoorit nogwe, ndi, it mbere eerak nogo nen aakumi apit aago yabu yarak me wonogwe nogo inoorogo piigwi, eereegwaarak.

⁴⁵Aap Abimelek nogo nen o ne ambit weereegerak paga aret aakumi ti, inoorit nage logonet, o time yigirogo pege, aakumi o kota inikime wonogwe nogo inoorogo piige, eeke nagagerik, yi mendek ndi mendek yakwi iyo, mayu mban yumbunogo pereegerak.

⁴⁶Ti eereegerak nogo, it aakumi Tikem mendek o kota Tikem paga o yerek-nggorek wurik me wonogwe nogo inaruk konenggo nogogwaarik, inagugi El-Mberit alut eeko menggam abu'me nggween nenaarogo pereegwam nogome kumaa'nari unggwogogwaarak.

⁴⁷“Kumaa'nari unggwogogwaarak kuwak eerak wonogwe o,” yogwe nogo, at Abimelek aruk konengge nagagerik,

⁴⁸Abimelek awuri inom puut Talomon paga laganggo nogogwaarik, Abimelek nen ye mbuti waganogo eyo eno'mbak mbanogo uum paga wagangge nagagerik, awuri inom nagagerak nogo yorage logonet, “An eekirak kogotak yi, ndak-ndak kit mbet-mbet ee'nip o.”

⁴⁹Yorage mbareegi, at awuri nogo inalitik-inalitak eyo eno'mbak nogo mbanogo waganggo nogogwaarik, Abimelek inom wogogwaarak. Wogo nogogwaarik, eyo eno'mbak mbanak nogo nggween nenaarogo pereegwam ambe paga aakumi inanobak ndak-ndak taati aret mbo pogo nogogwaarik, kani wuninogo pogo mbareegwa, aakumi o kota Tikem yerek-nggorek wurik me wonogogwaarak nogo kumi inom, aap inom, ineebe seribu abok aret kambeegwaarak.

⁵⁰Ti'nuk, Abimelek nogo o Tebet nage nagagerik, oonda mbani unggwikit nduk, wakkagak mban eeke nagagerik, o paga kwi'nari unggwage mbareegi,

⁵¹o yerek-nggorek wurik omaawi lombok o kota oolo lombok wonage me, kumi inom, aap inom, o kota time mendek abok aret mbe agan o nogome unggwi nogo nogogwaarik, tu kunti omaawi nappunuk, o yerek-nggorek wurik tilaabaga nogome laganeegwaarak.

⁵²Laganeegwaarak wonogwe me, at Abimelek nogo nage nagagerik, o yerek-nggorek wurik nogo kani pikit nduk, tu unggwogo menggam panggo yi unggwage mbareegi,

⁵³ yugum irimbaga punuk gandum yigiko menggaarak nogo mendek kwe ambi nen waganogo aap Abimelek anobak paga mbo wuppege mbareegi, anobak nogo telak yereegerak.

⁵⁴Telak ari mbareegi, at Abimelek nogo nen aap at awooluwak wonok nege nogo yoge logonet, “Aakumi nen, Abimelek nogo kwe nen waki o, yukwak me, kat nen mbet-mbet aret nooru o.” Yoge mbareegi, awooluwak nogo paga ndanuk togon warogo pereegerak aret kambeegerak.

⁵⁵Kangge nogo aakumi Iterali inigen kogo nogogwaarik, inalitik-inalitak iname wonogo menggam lombok nogogwaarak.

⁵⁶Ti agagerak nogo ti, aap Abimelek nen ogoba maluk eeppege logonet, oreewi 70 inooreegerak onggo Ala nen Abimelek nogo wake,

⁵⁷ndi, it aap Tikem mendek maluk eeko nogogwaarak onggo Ala nen eeppiige, eereegerak. Ti eereegerak nogo ti, aap Yeru-Mba'an apuluk Yotam nen pulunogo piyareegerak nogo aret agagerak.