Read Western Dani 2 Yaya 1 Bible Online

2 Yaya 1 - Western Dani bible

2 Yaya 1

¹2 YAYA Ala nen miikkabeegerak niriluk kat kaagalogwe kinom an Ala apuri inarum logokit nduk, mippaneegerak nogo nen, kit abet aret niniki kunik eekkinake minggirak me, wone ambi yokkira o. An nen mban niniki kunik eekkinake ti lek o. Ata, it aakumi nen Ala ndogop menggerak wone waganeegwaarak nogo abok ninom nen niniki kunik eekkinako o.

²Ala ndogop menggerak wone waganeegurak ninikime wonage nogo ti, mondok-mondok logogin aret me,

³nit, “Ala ndogop menggerak,” wone nogo woppunuk, mugurok nogo logonet, ninoreewi ninom niniki-kiniki kunik eerit nogwe niigak, ninogoba Ala at aput Yetut Keritut imbirak iniki kunik en wo'nirogwe, ninabuwa nen obeelom eeppinanugwi, niniki ugun tayenak ale'nggen logowok nduk, eeppinanugwi, eeko logowak o.

⁴At ninogoba Ala nen, “Yogop ee'nip o,” yo'niragagerak nogo kat kaagalogwe ando kinom ndak-ndak eerit nogwe konengge nagarik, an niniki abu ale'nggen mbakirak o.

⁵ Ndi, niriluk o. Yogondak ambi eeke logonok nduk, yokkiri. “Niniki-kiniki kunik eeko logonip o,” yinuk, yokkege yi nogo ti, wone ngget mendek lek o. O maan aa'nduk togon konenggo nogogutak nogo aret yokkigi o.

⁶Niniki-kiniki kunik eeko logorak nogo ti, Ala wone yugu ndak-ndak eeko logorak ti aret. Niniki-kiniki kunik eerit nogo logorak wone ti, maan aa'nduk togon yo'niragagerak koneneegutak nogo aret yokkiragi o.

⁷It aap ando nen, “Yetut Keritut ti, aap kwak nggween paga yime nda'narulik o,” yinuk, aakumi inambo'me laganuwok nduk yoranet nogo menggaarak mendek yi o ndi o ineebe ambik aret wonogwe o. It aap ti, Pilit Keritut negen logonet, pilit-pilit aret aakumi inambo'me laganggo menggaarak me,

⁸nit nen yokkirogogurak waganeegutak nogo, kobak eerogo mbo pugwi kiinok, obeelom eekwi paga Ala nen onggo ndak-ndak wokkiroorak mbareegerak nogo, lek eerogo patukwak, kiniki liirogon tum wakkologo logonip o.

⁹Aap ambi Keritut wone mamunniragagerak nogo mban ari lek at iniki koombunuk, alik inom nabenogo yoranet nage kenok, at Ala imbirak kunik logonet ari lek o. Ndi, Keritut wone mamunniragagerak nogo ndak-ndak eeke kenok perak, ninogoba Ala aput imbirak inom kunik aret logonet ari mbaruwok o.

¹⁰Aap ambi wone yi mendek lek alik mendek wonok yokkira wage kenok, keyage warogo kiname mambuurak mage o.

¹¹Keyage warogo kiname mambugwi kiinok, at omaluk kit kinom ndak-ndak aret nabenggolaamunggup o.

¹²An wone ambik yokkiroorak nduk wonage kwe, liiru mbanggiroorak anggon ee'nake me, kiya wage logominggirik, ninom ninengga kunna'nuk, ninale'nggen paga wone li'lak aret mbaniyak uugwe mbake agarik o.

¹³Koweeluk Ala miireegerak aagalogwe nogo ninom nen keyage wakkinako o. Wa!