Read Western Dani 3 Yaya 1 Bible Online

3 Yaya 1 - Western Dani bible

3 Yaya 1

¹3 YAYA Noreeluk Nggayut wae. “Ala ndogop menggerak o,” yinuk, wone nimbirak waganeegurak paga kat niniki kunik me, an Ala apuri inarum logokit nduk, mippaneegerak nogo nen wone ambi yokkiri o.

²Noreeluk o. Kat an niniki kunik me, kat Ala wone liirogon mugurok nage logonet, kiniki abe koonogo patit nage menggendak nogo kwak, keebe andi lek obeelom aret logonet, yi mendek ndi mendek eeke menggendak nogo obeelom mban age kage logonok nduk, kake tamban eeke minggirak o.

³“Ala ndogop menggerak o,” yinuk, wone nogo woppunuk, eerit nage menggendak nogo, noreewi ando neya wogo nagaarik, “Nogo ndak-ndak aret eerit nage agaarik o,” yinuk, mbininogo yo'niri wogo mbaka, an niniki ale'nggen ambik aret mbakirak o.

⁴Yi mendek ndi mendek eerit nage nogo ti, nale'nggen mbuuluk mbake minggirak kwe, an napuri nogo nen, “Ala ndogop menggerak o,” yinuk, wone woppunuk, mondok ndak-ndak eerit nogwe naruk konengge kenok perak, niniki ale'nggen nggwok lombok mbake minggirak o.

⁵Noreeluk o. Kat an niniki kunik me, wone ambi yokkiri o. Kat kulinik-kalinik ninoreewi Ala apuri nogo obeelom eeppiige logonet, ninoreewi ando nggiru wogwe iigak kwe, abu iya tit eeppiige nogo paga, “Wa!” lombok yokkigi o.

⁶It nogo nen Ala apuri yime kuwak eeko menggaarak inenggaanom mbininggo logonet, “Aap Nggayut iniki kunik ee'ninake logonet, ndogop eeppinanege menggerak o,” yinuk, yo'niragaarak me, aap togoti mendek ambi keya wogwe iinok, Ala inikilom kombaruwak nduk, inamendek ambi lek kenok, wogorage logomenggendik, nappiyoorak ti op aret o.

⁷It aap ti, Keritut wone yoranet nawok nduk, nogo logonet, “It aap abet mbaka'lek inamendek woorak nineebi o,” yinuk yagaarak me, kat yeenggwaaragak yuurak ti, op aret nduk, yokkigi o, noreeluk.

⁸It aap Ala ndogop menggerak wone nogo nggwok wiganit nage logowak nduk, eerit nogwe nogo nen, “Ninom ndak-ndak yoranet nogwe o,” yinuk, ninombaruwak nduk, yeenggwaarogo logorak ti op aret o.

⁹Ala apuri time kuwak eeko menggaarak nogo, inake liiru mbuuluk ambi mbanogo nappi wagarak kwe, aap Ndiyoterepet nogo nen, “Inenggela'me an mban tiyanak logokit o,” yinuk, inikilom mbake menggerak me, noone woolik o.

¹⁰Togop me, nit eerulik kagak oone abu maluk ninoba pinaneegerak me, an wage logominggirik, at yereegerak nogo liirogon mbininogo yokkege neyaamunggun o. Oone maluk ti mban ninoba punuk, puk age ti lek o. Ata, ninoreewi wogwe iinok, ineebe wogonaka'lek logonet, it wogonaburak mbakwi nogo, “Wogonaburak lek o,” yinuk, inenggela'me nen wumbiige menggerak me, liirogon yokkege neyaamunggun o.

¹¹Noreeluk niniki kunik yi wae! It maluk eeko menggaarak nogo kat ndak-ndak eeke logogun o. Ata, it aap obeelom eeko menggaarak nogo ndak-ndak mban eerit nage logot o. Aap ambi obeelom eeke menggerak kenok ti, Ala nen ndareegerak aret mbariyak kwe, at maluk mban eeke menggerak nogo nen perak, Ala mondok liippega'lek aret menggerak o.

¹²Aap Ndemeteriyut nogo, “Ala ndogop menggerak o,” yinuk, wone yugu nogo liippunuk, ndak-ndak eerit nage kenok, Ala inom, it aakumi abok aret inom, nen, “Aap ti, abu obeelom aret o,” yinuk, yogo menggaarak. Ndi, nit pilit lek, abet aret yogo monggoorak kat keenu me, nit kunduk, aap ti, iya tit eeke kogo monggoorak me, yokkogo o.

¹³An wone ambik yokkiriyak mbakirak kwe, liiru mbanggiriyak anggon ee'nake me,

¹⁴an mbet-mbet keya wage logominggirik, nimbirak ninengga kunna'nuk, wone li'lak mbaniyak uugwe mbake agarik o.

¹⁵Ala karum wonage me, kiniki ugun tayenak ale'nggen aret logomunggun o. Koreewi ninom wonogwe nogo nen keyage wappagaga o. Ndi, an noreewi kinom wonogwe nogo ti, “Kinendage kunogombo mban keyage wappinagagi,” yegerak, yoret o. Abu aret yokkigi o. Noreeluk wa!