Read Western Dani Yurat 1 Bible Online

Yurat 1 - Western Dani bible

Yurat 1

¹YURAT Kit ninogoba Ala nen yonggo pinagareegerak kinom kunik Yetut Keritut kinarum wonage nogo, an Yakobut ore Yetut Keritut ayeloman Yurat nogo nen aret keyage wappinagi o.

²At Ala kinabuwa nen obeelom eeppinagage, kiniki ugun tayenak ale'nggen logobagip nduk, eeppinagage, iniki kunik eekkinake, eeke menggerak nogo ti, kulinik-kalinik eeppinagagak mban eeke logowak o.

³ Noreewi o. Kit an niniki kunik me, wone ambi yokkira o. Kit ugun kineenggo'lek kiigak, it aap ando kinenggela'me unggwi wogo nagaarik, Ala iniki kunik en obeelom eeppinanege menggerak wone nogo, abut laganogo, “Ala iniki kunik ee'ninake menggerak me, nit maluk eekwi niinok, maluk ninoba pinanigin lek o,” yinuk, iniki liirak lek iniki nengge kenok ugun-ugun eerit nogo logonet, at Aliku ninowe Yetut Keritut nogo ti, “Nit ninowe lek o,” yinuk, yogo menggaarak. Togop me, Ala nen it maluk eekwi onggo muk inoba piyoorak nduk, punogo piyareegerak wonage kagak, we ugun kobak logonet, agan nugwi me, nit ninagap ndareegerak wone ndak-ndak waganeegurak nogo, amburu mbanogo liiru mbanggiraakit mbakirak kwe, it togop agan nugwi iinok, abet mbakwi wone ambit at Ala nen o maan nit at apuri ake leenak mondok-mondok unde eeppinaneegerak wone nogo, taganogo mbo pugwi kiyo, “Yi Ala wone aret me, taganiyak lek o,” yinuk, mondok kinogogumbuk logonet, pipporogo logobagip nduk, liiru yi, mbanggiragi o.

⁵ Ninogoba Ala nen maan it at apuri Iterali mendek o Metit nen inagap ndarogo wumbiya wage nagagerik, ti'nuk, it ando abet mbaka'lek iinok, Ala nen inooke logonet, lek eerogo piyareegerak wone nogo ti, kit muk kinaruk koneneegutak kwe, aberak logobagip nduk, ambinom yokkiragi o.

⁶Ndi, at Ala nen it malayikat ando, “Yogop eeko logonip o,” yinuk, o unde eeppiyareegerak kagak, “O yi mban unde logorak nineebi o,” yinuk, mbo pogo mbareegwa, at Ala nen, “An mondok iya tit eeke neyoorak nogo eyom paga inawone amburu mbanogo maluk eekwi onggo inoba piyaakit o,” yinuk, ineebe mondok-mondok mbutigeele paga maarogo o apit me mambiyareegerak wonogwe nogo, kiniki abeko logonip o.

⁷ Ndi, it malayikat eeppiyareegerak nogo pogom, it aakumi o Torom inom, o Nggomora inom, yi kota ndi kota enaagan-ambokan wonogwe nogo inom, nen nggeewo negen kumi ugun wurinabit nogwe, iniki aganggen eeginake kenok eekulik mendek kagak ugun-ugun eeginabit nogwe, eeko mbareegwa, “It aakumi maluk eekwi iinok, Ala nen kani omoonu'me mondok-mondok nappiyaagin kogo o,” yinuk, nineenu ogo logowok nduk, kani paga inooreegerak nogo o.

⁸It aap kinenggela'me ugun unggwi wagaarak nogo ti, aakumi o Torom inom, Nggomora inom, eeko nogogwaarak nogo ndak-ndak eerit nogo logonet, “Nabinggaanggo paga yogop eeriyak op aret kagarak o,” yinuk, iniki aganggen eeginake kenok, eekulik mendek kagak ugun-ugun eeginabit nogwe, Ala wone konenggo logorak, “Nineebi o,” yinuk, taganogo mbo pugwi, ndi, it inayuk warak mbogut paga menggaarak malayikat nogo kunduk, miyuk-meya eerogo piigwi, eerit nogo menggaarak.

⁹Muta kangge mbareegi, at yonggo mbogut paga nugu menggaarak inowe Mikayen Tile imbirak, “Eebe an koloorak kat koloorak,” nili-kili yogo logonet, at Mikayen nen, “Kat abu maluk lombok me, kambu o,” yinuk, Tile yoriyak op aret kwe, agabiti nen, “Nogoba nen mban mbekkirigin o,” yinuk, yoreegerak kwe,

¹⁰it aap kinenggela'me unggwi wagaarak wonogwe ti perak, wone alom liirogon ineenggo'lek kagak miyuk-meya eerogo pogo logonet, nggeewo iniki lek ugun eerit nogo mengga kwak, it togop aret iniki aganggen eeginake kenok eerit nogwe nogo mban ineenu logonet eerit nogwe me, ineebe aret lek eerogo patit nogo agaarik o.

¹¹ It nogo nen at Kayin eereegerak nogo ndak-ndak eerit nogwe, aap Mbileyam maluk eereegerak nogo kokwak, it togon iniki lek negen wu koloorak mban iniki lunik logonet mugurok nogwe, ndi, aap Kora awuri inom Muta wone taganogo mbo pogo mbareegwa, Ala nen lek eerogo piyareegerak nogo pogom, it ndak-ndak ineebe lek eerogo piyaawak nduk, eekkologwe, eerit nogwe me, inabuwa o.

¹²Niniki-kiniki kunik paga mbi nawok nduk, kuwak eekwi me, it aap ti, inageerok abe mendek ko'nok wa'nuk, it ando abu iigak, inagabiti mbaka'lek inalik mban nonggo menggaarak me, yum abu laambu kwe, oololuk mili eerak menggi kwak logonet, eeko menggaarak o. Mayu ndugwi paga luurik lek me, ndugwi o wiya nen wonok nage, eyoonggen abe yuwak nduk, awi yakaatak kwe, anggen abe yega'lek kanenep age kenok, kinogo pegaatak me, mondok mbuk age,

¹³niyo kilaarak-mogonik eeke logonet, eyak-nggoyak eerogo nippit wage menggi kwak, it aap ti, eekulik mendek kagak togop aret ugun-ugun eerit nugwi, ndi, laaluguragan inobaane'me lombok wonogwe iigak, ambiret ambi nggigik togon, pinda agan lek ari nage menggi kwak, eerit nugwi, eeko menggaarak me, at Ala nen o apit aago me mondok-mondok logowak nduk, inake ogobakkigirogo piyareegerak wonage agaarik o.

¹⁴ Aram ombowologwe ambo'me-ambo'me nda'narit wundi wogo logonet, 7 nda'nagagerak Enok nogo, Ala nen at yoge kagak aakumi yorage logonet, “It aakumi Ala wone woorak, Nineebi o, yinuk, Ala miyuk-meya eerogo pugwi, oone taganogo punuk, iniki liirak lek maluk ugun eerit nugwi, eekwi nogo ninowe nen inowak loonogo maluk onggo inoba piyaakit nduk, at awuri ake leenak malayikat nogo ineebe ambik lombok aago at inom wogwe iigirak o,” yinuk, yoragagerak nogo ti, it aap kinenggela'me agan nugwi nogo, aret eeppiyoorak nduk, yoragagerak o.

¹⁶It aap ti nen ineebi-ineeba yogwe, inoreewi meek inombakwi, eeriyak iniki nengge kenok eerit nugwi, “An aap nggwok o,” yinuk, wogoppatit nugwi, inamendek kolaawok nduk, inoone amburu ndik-ndik agan nugwi, eeko menggaarak o.

¹⁷Togop kwe, noreewi o. Kit an niniki kunik wonogwe me, wone ambi yokkira o. At ninowe Yetut Keritut nen nappiigak mendek agago mippiyareegerak nogo nen wone aa'nduk yokkirogo nogogwaarak nogo abeko logonip o.

¹⁸ It nogo nen kit yokkirogo logonet, “O age yobok paga it aakumi iniki liirak lek nogo nen iniki nengge kenok mban eerit nogo logonet, kit miyuk-meya eerogo pinagarak nogo kin ari woraagun o,” yinuk, yokkirogo nogogwaarak nogo, abeko logonip o.

¹⁹It aap ti, Aberiniki inikime lek me, nggween paga mendek mban iniki nengge kenok mugurok nogo logonet, Ala apuri ogoorogo piinet nogo menggaarak it aret.

²⁰Togop kwe, noreewi niniki kunik kit perak, kit kiniki kole aruwak nduk, wone abu alik leenak kit abet mbareegutak wone nogo mban eerit nogo logonip o. Ninowe Yetut Keritut ninabuwa nen mondok-mondok nineenik eeppinaniyak nogo, eeppinanuwak nduk, tokkogo logonet, Ala iniki kunik eekkinake nogo eeppinagagak mban eeke kogo logomunggup nduk, Aberiniki yokkirage kagak tamban eeko logonip o.

²²It ando iniki yungguppegak eeko menggaarak nogo inabuwa mbako logonet, yanggorogon yorogwe,

²³it ando nen kani omoonu'me nogwe me, kinagabiti mbaka'lek inagap ndarogo piya wogwe, ndi, it ando perak, iniki nengge mugurok nogo logonet, mbogoyum laambu abe me mili mondok nabek yi unggwage menggi kwak maluk eekwi ti, ogole warak me, ninom lambunggologwe niyo, “Ninagabiti o,” mbakwi kwe, kagak, inabuwa mbako logonet yorogwe, eeko logonip o.

²⁴Ninowe Yetut Keritut eereegerak paga ninagap ndareegerak at Ala nogo nen nit abet mbareegurak nogo mbo punuk, alik eerit nogwe niyo, ninarum liirogon logomenggerik, “Kit wone ambi kinoba wonage lek abu obeelom aret me, nowagam mi'nari woraanip o,” yinuk, yo'nirage mbaremenggi, nit niniki ale'nggen mbakak at mondok tiyanak menggerak enggaanom mi'nari nawok nduk, wo'niren pinani nagin aret me, yi aakumi ndi aakumi aa'nduk nda'nogogwaarak inom, yogondak ndarak inom, peebi nda'nariyak inom, nit abok ninogoba ambit ninagap ndaka kat aret me, kat aap nggwok kendagembogut komaawi ambik yi aakumi ndi aakumi abok kabu'me logonet, kat koone mban konenggwi, kat kendage mban tiyappagagwi, eeko logowak o. Amin.