Read Western Dani Wayu 15 Bible Online

Wayu 15 - Western Dani bible

Wayu 15

¹Ti'nuk, peebi mbogut paga time inagabiti warak mondok iya tam warak negen eeke kage logonet, malayikat ineebe 7 nen irip paga aakumi andi aganabuwak nduk, kugi alom 7 unde wonogwe iigirak. It malayikat 7 yi nen aakumi andi aganabuwak nduk, kugi 7 nogo inoba piya woramenggaarak andi aganabit nogwe iinok, Ala anini mbake nogo lek age logomenggerik, iniki yanggo yigin me, irip paga eeppiyoorak nogo unde wonogwe iigirak.

²Iige nagarik, yilaa'nggun nggwok yenggenak negen kwe, etenggen pugagi pindan-pindan eeke enggela'me nen kani omoonuk wungge kagarak. Kage nagarik, wonage me, nggeewo aa'nduk lagi wagaarak nogo nen, “Kit an noone waganggwi, an nogut wakkagak ogobakkigirik nogo alut eekwi, ndi, an nendage kinenggaawak paga liiru mbanak nogo wonok nugwi, eeko logonip o,” yinuk, yoragaarak kwe, “Nit kat koone woorak mondok lek o,” yinuk, oone taganogo mbo pogo mbaka, Ala tiyappiigerak nogo nen yilaa'nggun nggwok yenggenak etenggen pugagi pogom nogo aa'nggi paga nggitat nggwok Ala nen wogoragaarak ineenggime porogo mi'ndak wonogwe iigirak. Iige nagarik, wonage me, nggitat nogo oone eekwi,

³ ndi, Ala ayeloman Muta endawi inom, Ndomba Aagaluk nogo endawi inom, wakwi, eeko logonet, “Komaawi lombok menggendak ninogoba Ala kat aret o. Kat eeke menggendak nogo ti, eerubok mendek mondok iya lombok eeke menggendak o. Yi aakumi ndi aakumi aa'nduk wonogogwaarak, yogondak wonogwe, peebi logogun abok inowe kendagembogut kat aret o. Kat eeke menggendak nogo ti, mondok a'me nggelok abe mban eeke menggendak o.

⁴ Ninogoba o. It taani nen kayuk wukwi, kendage tiyappagagwi, eeka'lek logogun mbaken? Lek aret o. Kat maluk eekeelik kalik leenak obeelom mban menggendak o. Kat mondok a'me nggelok mban inowak loongge menggendak ineenu me, It aakumi inanebunu lombok abok aret kowagam tebe yi wogo logomenggaarik, kalut eeko logogun o,” yinuk, ndawi wakwi iigirak.

⁵ Ti wakwi iige nagarik, Ala ninom wonage mbaruwak nduk, Ala awooliya wurik mbogut paga wonage nogo, tu paarak kage nagarik,

⁶nogome nen malayikat ineebe 7 nogo nen aakumi andi-pandi eeginaburak kugi alom 7 nogo, wonok wundi wogwe iigirak. It nogo inambogoyum yawenak abu laambu abinak kere'li-kere'lo aago yirik, ndi, inagabee'le tabak mbuti emas paga ogobakkigirik inobate paga nggerenak wonogwe iigirak.

⁷Iige nagarik, nenegen neegak, it aakumi nen iigulik mendek ineebe 4 nogo ambi nen at Ala eenik mondok itok menggerak anini aakumi inoba piyaawak nduk, togolowak mbuti emas paga ogobakkigirik 7 nogome eno korok togon toolak it malayikat ineebe 7 nogo wogorage kagarak.

⁸ Wogorage mbaki, Ala mondok omaawi ambik me, eebe eya ndelenak-welenak eeke paga nen ka'luk wungge logonet, Ala awi wurik me mondok endak wa'nage mbaki, it malayikat ineebe 7 nogo nen andi aganaburak kugi alom 7 aakumi inoba nappiigwi nogo, worok togon nappiiga'lek iigak, aakumi nen Ala awi wurik me time ungguurak meek aret age kagarak.