Read Western Dani Wayu 19 Bible Online

Wayu 19 - Western Dani bible

Wayu 19

¹Ti konengge nagarik, wonage me, o mbogut paga time aakumi ambik abu alik negen komaarak inoone nggwok ambugwi yogo mengga kwak yogo logonet, “Kat kalik komaawi ambik ninagap ndaka kendage mondok tiyanak, ninogoba Ala wa.

² Kwe yawukak mondok iya eerit nage nogo nen, Ee'nabi woraanip o, ari kenok, Yi aap ndi aap abok aret eeppi unggwagak eekwi paga o nggween paga time maluk eerogo pege nagagerak nogo onggo kwe nogo oba kwippege, Ndi, kwe nogo nen kat kayeloman mini inooreegerak inane'me wake, Eekendak me, Kat kalik mondok obeelom irip-kunduk eerogo aakumi liirogon inowak loongge logonet, Kwe nogo owak loonogo maluk onggo eeppegendak me, Wa!” yinuk,

³ yogo nagaarik, ambi yogo logonet, “O kota nggwok kwe yawukak pogom nogo, Kani nengge logonet, ka'luk mondok-mondok yarugu-parugu lagangge logogin o,” yinuk, Ne ambi paga, “Wa,” yinuk, yogo mbaka,

⁴it mbogut paga wonogwe inoweewi ineebe 24 inom, aakumi nen iigulik mendek ineebe 4 nogo inom, at wone lengganogo yorage menggim Ala time kwi'ndak wonage kagak abu'me tebe yinuk, alut eeko logonet, “Ninogoba wa, wa,” yinuk, “Amin,” yogwi naruk konenggirak.

⁵ Yogwi naruk konengge nagarik, wonage me, wone lengganogo yorage menggim nen oone ambi ari logonet, “Kit Ala ayeloman mini nen at ayuk wuko monggotak kinendage warak inom, kinendage lek inom, abok aret ninogoba Ala mban alut eeko logonip o,” yinuk, ari mbaki,

⁶ niyoraakut nggwok oonebu ari, o ngguurubu alik negen ari, it yi aakumi ndi aakumi ambik kuwak eerak ambugwi inoone nggwok yogwe, eeko mengga kwak, yogo logonet, “At Omaawi Lombok Menggerak ninogoba Ala nogo, Yi aap ndi aap inowe endagembogut logokit nduk, mi'nagagerak wonage me, Ninogoba Wa, yinuk, alut eeruwok o.

⁷At Ndomba Aagaluk nogo akwe lambumbuurak eyom age mbaki, akwe nogo amindik-amendek li'luk eekko'nok wage me, Ninale'nggen nen ndawi lubuk wako logonet, endage tiyappogo logowok o,” yinuk,

⁸inoone yogwe iigak, akwe nogo wage mbaki, ayum ambi abu yawenak kikak naka'lek abe laambu yanggwi negen lan aago yikkolawak nduk, wogoge kagarak. Ndi, ayum abe yawenak nogo ti, it Ala apuri ake leenak nen maluk eeka'lek obeelom mban eerit nugwi nogo kwak aret kagarak.

⁹ Kage mbaki, malayikat nogo nen an yo'nege logonet, “Ndomba Aagaluk akwe lambumbogo logonet, abugo larak inom nawak nduk, yonggo piyareegerak nogo, iniki ale'nggen mbako logowak o,” yinuk, yo'nege nagaarik, ambinom yo'nege logonet, “Wone ti, Ala nen abet aret yegerak me, liiru mbanu o,” yinuk, yo'negerak.

¹⁰Yo'nege mbaki, abu'me tebe yinuk, alut eerikit nduk eeke me, at nen yo'nege logonet, “Togop eeriyak mage o. At Yetut wage nagagerik, Ala ndogop menggerak o, yinuk, paganogo yoragagerak wone koreewi waganggo nogogwaarik, porogo wonogwe nogo inom, kat inom, an kit pogom Ala ayeloman aret me, Ala abu'me tebe yinuk, at mban alut eeke logot o. At Yetut nen paganogo yorage nagagerak wone nogo ti, nit abok Aberiniki nen yo'nirage kagak yorogo monggoorak me nduk, yokkigi o,” yinuk, yo'nege kagarak.

¹¹ Yo'nege kage nagarik, mbogut paga tungga paarak wonage kagak, aap ambi endage Abet Mban Ari, Liirogon Eeke, Eeka nogo, kuda yanggwi negen amborowak paga kwi'ndak wage kagarak. Wage nagaarik, liirogon inowak loonogo a'me nggelok mban onggo wogorage, wim liirogon aret nambuke, eerit nage kagarak.

¹² At enegen ti, kani omoonuk wunuk ari pogom. At anobak paga nggare-nggare mendaarak apit yirik, ndi, at endage toonak eebe paga liiru mbanak wonage nogo, aakumi nen maleniyak meek at mban eenu wonagaarak kwe,

¹³“At endage ti, Ala Wone aret o,” yinuk, an yo'nege kagarak. At ambogoyum nggorek paga aakumi inamiya labunik yikko'nok nage kagak,

¹⁴it yigin unde mbogut paga wonogwe nogo abok aret inayum abe yawenak kikak naka'lek abu laambu yanggwi negen yirik logonet, inalitik-inalitak kuda ineeruwak yanggwi negen inamborowak paga kwi'na'nuk, inom nogwe iigirak.

¹⁵ Inom nogo logonet, at yi aakumi ndi aakumi inanebunu lombok abok aret tebenogo piyoorak nduk, paloowi ngget ambik ambeme nggelenak wonok nage logonet, tebenogo piinok, mbim obate mbanak ineenggime logonet, inoone omaawi paga yorogo mengga kwak, at oone omaawi paga wone lengganogo yorage kagarak. At omaawi lombok menggerak Ala anini nen aakumi eeppiyoorak nogo ti, anggur amburu aambiranggo mengga kwak aret me, at nogo nen aakumi togop aret aambiranogo piinet nage kagarak.

¹⁶Ndi, at endage nogo ti, Aap Inendagembogut Inowe Endagembogut inom, Aakumi Inoweewi Inowe inom, nogo ti aret me, ambogoyum paga inom, ambulok paga inom, at endage ti, liiru mbanak wonage kagarak.

¹⁷ Kage nagarik, at malayikat ambi oonegen paga mi'ndak logonet, yi towe ndi towe o oolo yime wuga agan nugu menggaarak nogo yorage logonet, “It aap inendagembogut inom, aap wim eeka inoweewi inom, aap waka'ngget inom, kuda inom, it kuda amborowak paga kwi'na'nuk wim namburi nogo menggaarak inom, aap inendage warak inendage lek inom, aakumi inayeloman mini inom, aakumi weelek mendek inom, yi aakumi ndi aakumi abok aret Ala nen inoorogo punuk, kinake pipuk eerogo pegerak me, Inenggaanggum namunggup nduk, kuwak eeri wogo logonip o,” yinuk, yorage kagarak o.

¹⁹Yorage mbaki, nggeewo anini warak nogo inom, aakumi inoweewi inendagembogut inom, inawuri yigin unde inom, nen at kuda amborowak paga kwi'ndak wonage nogo awuri inom wim namburuwok nduk, kuwak eeppunuk, inom perenggolaawok nduk eekwi iigirak.

²⁰ Ti eekwi iigak kwe, at nggeewo anini warak aa'nduk lagi wagaarak eebe nogo inom, ndi, it aakumi inenggaawak paga nggeewo aa'nduk lagi wagaarak endage liiru mbanak wonok nugwi, at ogut eerak nogo alut eekwi, eeruwak nduk, awone kilirik paga inagabiti warak mendek eerit nage logonet, inambokan lagangge menggerak nggeewo peebi lagi wagaarak eebe nogo inom, imbirak ineenik ngge-ngge pigogo kani omoonuk wunuk mban ari menggim nogome nappiige kagarak.

²¹Nappiige kage nagarik, at kuda amborowak paga kwi'ndak paloowi ambeme nggelenak nogo paga inawuri ando nogo inoorogo piinet nage mbaki, yi towe ndi towe abok wogo nagaarik, aakumi inoorak nogo inenggaanggum inaanoma'le nggaruk yogorak nonggo nagaarik, kumunuk ndan agan nogwe iigirak.