Read Western Dani Wayu 22 Bible Online

Wayu 22 - Western Dani bible

Wayu 22

¹ Ti kage nagarik wonage me, malayikat nogo nen, an yo'nege logonet, “Niyo aakumi ineenik aganaka eneeri mili lombok mbini kin nogo, Ndomba Aagaluk Ala imbirak wone lengganogo yorogo menggam abu'me nen, kilak togon wungge nagaarik, o kota tu yarak eraaninu nage ti, kenegen pekket o,” yinuk, yo'nege mbaki, pekkage me, niyo nggwok nage nogo aa'nggi yibagan-enebagan eyo aakumi ineenik aganake menggerak awi yarak me, tut ambi penengge paga ne ambit paga anggen yi'nage, tut ambi penengge paga ne ambit paga anggen yi'nage, togop aret eerit tahun ambit eerak paga ne 12 paga aret anggen yi'nage kagarak. Ndi, eyoongga nogo ti, yi aakumi ndi aakumi andi aganake kero, obeelom aganaka inake aret wonage kagarak.

³ Yi mendek ndi mendek pulunogo pereegerak maluk wonage nogo tigitogon obeelom eerogo pegerak me, o nogo ti, obeelom mban aret wonage kagarak. Ndi, at Ala inom, Ndomba Aagaluk inom, imbirak it wone lengganogo yorogo menggam eyo ndoonak o oolo taati wonage kagak, at Ala ayeloman mini abok aret at owagam ninggippunuk logonet, at mban alut eekwi iigirak.

⁴At mban alut eeko logonet, etenggen liippugwi iigak, at endage inenggaawak paga liiru mbanak wonage kagarak o.

⁵ Time o kiip age, o weege, eeka'lek o liingge mban wonage kagak, it aakumi nen Ala eya paga nugu logogun me, nugu logonet, “O eya aruwak nduk, oonegen wundi wage, ndi, ndi wuninggwi, eeruwak lak ao,” mbaka'lek it aap inendagembogut negen logonet, mondok-mondok wone lengganogo yorogo logogun o.

⁶Ti'nuk, at wone yo'nege nogo nen ambinom yo'nege logonet, “At Aberiniki nogo it aap Ala yorage kagak yoraga inikime logonet yorage kagak, aakumi yorogo logowak nduk, nappi wagagerak ninogoba Ala nogo nen logonuk lek mbet-mbet eeriyak wone nogo, at ayeloman mini ineenu aruwak nduk, ayonggo nage menggerak malayikat ambi nappi wagaarak. Nappi wagaarak nogo nen wone yokkegerak nogo abok aret, Yi abet aret, yo'negerak me a'me nggelok yigin, mbake logot o.

⁷An mbet-mbet woraagin o, yinuk, yegerak me yokkigi o. Ndi, peebi eeriyak wone an yokkege neegak, liiru mbanggendak nogo, it aakumi liippunuk, mugurok nogwe iinok, iniki ale'nggen aret kogo logogun o,” yinuk, yo'nege kagarak.

⁸Wone agan wagaarak naruk konengge, eerit wagaarak nenegen kage, eekirak nogo ti, an Yaya aret me, naruk konengge, nenegen kage, eeke nagarik, at peebi eeriyak wone yo'negerak malayikat nogo alut eerikit nduk, abu'me tebe ari mbaki,

⁹at nen an yo'nege logonet, “Togop eerugun o. It koreewi Ala nen yorage kagak yoraga inom, it wone liiru mbanggendak liippunuk mugurok nogo logomenggaarak nogo inom, kat inom, an kit pogom Ala ayeloman aret me, Ala mban alut eeke logot o,” yinuk, yo'negerak.

¹⁰Yo'nege nagaarik, “Peebi eeriyak wone yokkege neegak liiru mbanggendak nogo, eeriyak abu aret panggo yi wagaarak me, wone ti, kumaapporogo logorak mage o. Ata, yi aap ndi aap yoranet nege logot o.

¹¹ Yoranet nege keegak kwe, it maluk eeko logorak mbakwi kenok, maluk aret eekwi, ndi, eeriyak lek mendek kagak ugun-ugun eerit nogo logorak mbakwi kenok, ugun aret eerit nogwe, ndi, it ando maluk eeka'lek obeelom mban eeko logorak mbakwi kenok, obeelom mban eerit nogwe, ndi, it ando kikak naka'lek Ala ake mban leenak logorak mbakwi kenok, Ala ake leenak wonogwe, eekkologo logowak o,” yinuk, yo'nege kagarak.

¹² Yo'nege kage nagarik, at Yetut nen, “O maan aa'nduk togon wonagagirak alom Alpa inom, peebi irip paga mondok logorak Omega inom, ti an mban aret me, an logonuk lek mbet-mbet wage logominggirik, yi aap ndi aap eeko logomenggaarak paga onggo wogoroorak mbakirak nogo inalitik-inalitak ndak-ndak wogora woraagin me, liippogo logowak o,” yinuk, yo'nege kagarak.

¹⁴ Yo'nege kage nagarik, “It inambogoyum laambu kookkologo menggaarak nogo, Eyo ineenik aganaka anggen nunggwi, ndi, o kota tu paarak mban wonage yime nowagam unggwi wogwe, eeko logonip o, yinuk, yorage neenok, iniki ale'nggen mbakak o kota unggwi nogwe iigak kwe,

¹⁵it nggeewo pogom eeko menggaarak inom, magagirak iyagalo inom, yawukak mbabilu inom, aap inooka inom, kugi eeka inom, ndi, yi aap ndi aap pilit puguniyak inikilom mbako logonet, pilit-pilit pugungga inom, it perak, o kota time unggwi naga'lek yagat endekem logogun o.

¹⁶ Kit an napuri yi awi ndi awi kuwak eerit nogo monggotak nogo, peebi eeriyak wone yi, paganogo yokkira woraawak nduk, nayonggo nege menggerak malayikat ambi nappi wagarak nogo ti, an Yetut nen aret o. O weerikit nduk eeke kagak, laaluguragan ambiret kere ari nogo pogom anebunu Ndawut paga wiganak agarip ndarak nogo an aret o,” yinuk, yo'negerak.

¹⁷ Yo'nege mbaki, malayikat nogo nen ambi yo'nege logonet, “It aakumi niyo abu aganake kenok, niyo ineenik aganaka nogo mendek onggo lek we aret tookkola woraawak nduk, Aberiniki inom, Ndomba Aagaluk akwe nogo inom, imbirak nen, Wa'nip o, yinuk, muk yorogo agaarik o. Ndi, it wone yi, konembunuk abet mbakwi iinok, Na wa'nip o, yinuk, wiirogo logowak nduk, yoret o,” yinuk, yo'nege kagarak.

¹⁸ Ti yo'nege nagaarik, ambinom yo'nege logonet, “Peebi eeriyak wone yokkege neegak liiru mbanggendak nogo, aakumi konembunuk, wone alik ambi inom nabenogo pugwi iinok, andi-pandi aganaburak kugi alom 7 porogo wonogwe iige nagandik, liiru mbanggendak nogo nen inooruwak nduk, Ala nen nappiya woraagin o.

¹⁹Ndi, at Ala nen, Ineenik aganaka anggen nunggwi, o kota obeelom alik leenak nogome unggwi nogwe, eeko logorak o, yinuk, yereegerak mbuku yi paga liiru mbanak wonage kwe, peebi eeriyak wone yokkege neegak liiru mbanggendak yi, aakumi nen konembunuk, ando waganggo logonet, Ando ti woorak lek o, yinuk, mbo pugwi iinok, at Ala nen it aap ti, anggen nogo nunggwi, ndi, o kota nogome unggwi nogwe, eerugun lek, Kit endekem aret logonip o, yinuk, yoraagin.

²⁰Kat keenu a'nok nduk, wone yi, paganogo yokkegerak nogo nen, An logonuk lek mbet-mbet wagi o, yinuk, abet aret ari kagarak me, wone ti, abu aret yokkigi o,” yinuk, yo'nege kagarak. Yo'nege mbaki, an nen, “Noweeluk Yetut mbet-mbet woraawak lak ao,” yinuk, “Amin,” yagarak.

²¹Kit kinowe Yetut nogo iniki kunik en obeelom eeppinagage logonet, kinarum aret logogin o. Amin.