Read Western Dani Wayu 6 Bible Online

Wayu 6 - Western Dani bible

Wayu 6

¹Ti eekwi iige neegak, Ndomba Aagaluk nogo nen keele 7 maarak nogo aa'nduk maarak piingge kagak, aakumi iigulik mendek ineebe 4 nogo ambi nen oone o ngguurubu pogom ari logonet, “Omok o,” ari naruk konengge nagarik,

² nenegen neegak, kuda eeruwak yanggwi lombok me, amborowak paga aap ambi kwi'ndak eegin eenggime wage mbaki, “Aakumi tebembiya nak o,” yinuk, nggare-nggare ambi yippunuk, nappege mbaki, tebenogo piinet nage kagarak.

³Ti'nuk, Ndomba Aagaluk nogo nen keele aa'nduk maarak piingge nagaarik, ambi maarak nogo piingge kagak, ineebe 4 nogo inore ambi nen ari logonet, “Omok o,” ari naruk konengge nagarik, nenegen neegak,

⁴kuda alik ambi eeruwak maa'ngga kunik me, amborowak paga aap ambi kwi'ndak wage mbaki, “It aakumi o nggween paga ogu time iniki ugun tayenak ale'nggen nugu logorak lek o. Ata, it-it wat-wat yogo logowak o,” yinuk, unde logorak mippege logonet, mbuti wooluwak nggorek lombok wogoge kagarak o.

⁵Ndi, Ndomba Aagaluk nogo nen keele mbere maarak nogo piingge nagaarik, ambi maarak piingge kagak, ineebe 4 nogo inore ambi nen ari logonet, “Omok o,” ari naruk konengge nagarik, nenegen neegak kuda mili lombok me, amborowak paga aap ambi kwi'ndak aaninggin wakkagak nogo mendek eenggime wonok wage mbaki,

⁶it aakumi iigulik mendek ineebe 4 nogo, inenggela'me nen oone ambi ari logonet, “Mbato yum mbuuluk ambi yonggolak nogo ti, wu ne ambit paga it yabu eekwi onggo wogorogwe ndak-ndak nogo paga kungge, ndi, gandum yum mbuulogwe kenagan yonggolak nogo ti, ndak-ndak wu ne ambit paga it yabu eekwi onggo wogorogwe nogo paga kungge, eeriyak kwe, eyo tayitun amburu inom, anggur amburu inom, ti perak, maluk eerogo puurak mage o,” yinuk, ari kagarak.

⁷Ti'nuk, Ndomba Aagaluk nogo nen keele kenagan maarak piingge nagaarik, ambi maarak nogo piingge kagak, aakumi iigulik mendek ineebe 4 nogo inore ambi nen ari logonet, “Omok o,” ari naruk konengge nagarik,

⁸ nenegen neegak, aap kambuurak nduk eeke logonet, etenggen ndoongga kere agago pege menggi kwak, kuda togop aret aap ambi endage Kanggwi Unde nogo kuda amborowak paga kwi'ndak wage kagak, aap ambi endage Kambunuk Nogo Menggam ambokan nabek togon aago wage eekwi iigirak. Wogo mbaka, it nen aakumi o nggween paga ando mogonogo teppiigo logonet, ando mogonogo seperempat nogo wooluwak paga inoorit nogwe, mbi abu nen kambuwak nduk, noogelo eerogo piigwi, andi nen kambuwak nduk, kugilengga ndi wurogo piigwi, ndi, nggwiya eyonggaame mendek nen nibininabuwak nduk, inanini eerogo piigwi, eerit nogo logowak nduk, unde eeppiige kagarak.

⁹Ti'nuk, Ndomba Aagaluk nogo nen keele 4 maarak piingge nagaarik, ambi maarak nogo piingge mbaki, it aakumi Keritut inake eereegerak wone abet mba'nuk, mbo pega'lek Ala wone mondok liippunuk mugurok nogwe iinok, inooko nogogwaarak nogo, inogoma Ala ake warogo kani kunggo menggam abu'me taati wonogwe iigirak.

¹⁰It nogo nen inoone nggwok yogo logonet, “Ninogoba Kaliku Ala wae. Kat kalik mondok nggwok alik leenak menggendak me, it aakumi o nggween paga wonogwe nen ninooreegwaarak ninamiya wambit nagagerak nogo, inowak loonogo ninane'me inooka'lek keegak, ne mande arigin o,” yinuk, yogo mbaka,

¹¹“Lek o. Kit kinowe-kinawot inom, it kinom Ala wone mondok liippunuk mugurok nogwe inom, kit kinooreegwaarak kokwak inookwi iinok perak, kinane'me ambugwi lambuk togon inoorigin aret me, we ne ambiriluk puk logomunggup o,” yinuk, mbogoyum nggorek yanggwi negen inalitak lombok yippiige kagarak o.

¹² Ti'nuk, Ndomba Aagaluk nogo nen keele 5 maarak piingge nagaarik, ambi maarak nogo piingge mbaki, o mi nggwok nuk ari, kibiyan kiik worako mengga kwak oonegen apit age, tut aakumi inamiya negen age,

¹³ o wiya nggwok omaawi wake logonet mbogom anggen ki kagak nggaru-nggaru nggween paga oone ndu wambit wage menggi kwak, laaluguragan mbogut paga nen nggween paga wambit wage,

¹⁴ mbuku pirik-perek eeko mengga kwak mbogut nggoguk ari logonet, pirik-perek arit nage, ndi, puut inom, niyo inikime nggween kup mbanak inom, abok aret wo'narok ambi me ari nagak eeke, eeke kagarak.

¹⁵ Ti eeke kage nagarik, it aakumi nggween paga mendek inendagembogut inom, nagawan-nagawan inom, it aap wim eeka waka'ngget inom, aap ineenggi warak inom, aap inoone omaawi inom, aakumi inayeloman mini inom, aakumi weelek mendek inom, abok nen yogo logonet, “Ala anini eeppinaniyak eyom muk panggo yegerak me, nit nineenik logorak meek aret kogo o,” yinuk, inagabiti nen, “Nggeeme nawi?” yinuk, ndoome inom, yugum ambe nggaganak me inom, kumaa'nari nogo nagaarik, “At wone lengganogo yorage menggim eyo paga kwi'ndak wonage Ndomba Aagaluk inom, imbirak inanini nen nit ninoorukwak, puut yi paga inom, yugum nggwok yi paga inom, aan lebenninabu o,” yinuk, puut inom, yugum inom, yogwi iigirak o.