Read Western Dani Wayu 9 Bible Online

Wayu 9 - Western Dani bible

Wayu 9

¹Konengge nagarik, wonage me, malayikat ineebe 4 oone nggwok eeka inarompet nogo oone eeko mbaka, ti'nuk, at ambi nen arompet eeke kagak, laaluguragan ambi mbogut paga nen nggween paga wambi wage kagarak. Wambi wagaarak nogo nen Kambunuk Nogo Menggam mbuun ambena ogu kiiniki paga lombok tu paaruwak nduk, kunci wogoge kagarak o.

² Wogogerak Kambunuk Nogo Menggam mbuun ambe nogo tu paake mbaki, yugum yugu ka'luk yonggo-ndonggo eeke menggi kwak, mbuun ambena nen ka'luk alik negen lagi wage logonet, oonegen inom, o oolo ogona ya'i inom, apit eerogo pege kagarak.

³ Kage neegak, ka'luk enggela'me nen wurin ambik lagi wogo nagaarik, nggitamuru eyak inooketak andi kogo mengga kwak, wurin nogo nen aakumi ineyak mbaninabit nogwe paga andi yagan wako logowak nduk, inomaawi eeppiige kagarak.

⁴ Inomaawi eeppiige nagaarik, yorage logonet, “Iri'ngga-kale'ngga inom, igale inom, yi mendek ndi mendek ki wonage nogo abok aret kineyak lelenogo nenet nogo logorak mage o. Ata, it aakumi Ala nen amburu inenggaawak paga labumbiyoolik kenok mban kineyak mbaninabit nogo logonip o.

⁵Ndi, ineebe kambuwak nduk, nibininaburak ti mage o. Ata, we andi yagan wakwi iigak, tut 5 penenuwak nduk, kineyak mbaninabit nogo logonip o,” yinuk, yorage mbaki, nggitamuru nogo nen ineyak mbaninakaatak andi yagan wako mengga kwak, ndak-ndak aret ineyak mbaninabit nogwe iigak, andi nen yagan yobak-nggolak warit nogwe iigirak.

⁶ Ti eyom paga it aakumi andi nen yagan wako logonet, “Nggarurogon kambuwok lak ao,” yinuk, inowe-inawot nen mondok-mondok inooruwak nduk, yoramenggaarak kwe, kambuurak inoba ari woraagin lek me, kangga'lek we ineenik yagan yobak-nggolak mban wako logogun o.

⁷ Ndi, wurin nogo ti, inetenggen aap kokwak kwe, ineeruwak ti, kumi ineeruwak laanak nogo pogom, ndi, ineyak ti, nggeewo singa eyak nogo pogom, wonogwe iigirak. Ndi, kuda amborowak paga kwi'na'nuk wim namburuwok nduk, li'luk eerogo piigo mengga kwak, it wurin ineebe nogo ti, togop aret li'luk eerogo piige logonet, nggare-nggare mbuti emas paga ogobakkigirik inom, tin mbuti omanggen paga yarak inom, yirippiinok, wim namburuwok nduk, kuda nggweendo paga mbarembunuk, niikkenok wim endok kuni unggwogo logonet, kuda ineebe apit me iniyogobit oonembogu nogwe konenggo mengga kwak, wurin nogo wuga agan nogo logonet, ina'naabit oone ti, togop aret agan nogwe iigirak o.

¹⁰Ineyak ti, nggitamuru ineyak nogo pogom me, ineyak aakumi mbaninakwi iinok, andi nen yagan wakwi iigak, tut 5 penengge kagarak.

¹¹ Ndi, at malayikat Kambunuk Nogo Menggam mbuun ambeme unde menggerak nogo ti, it wurin inowe endagembogut inarum menggerak at aret o. At endage ti, aakumi Iberani inoone paga, “Abaron,” yogwe, ndi, Yunani inoone paga, “Apoliyon,” yogwe, eeko menggaarak. (Ndi, nit ninoone paga ti, “Pup Eerogo Piiga o,” yinuk, yogo monggoorak.)

¹² “Inabuwa o, yinuk, ne kenagan paga ari konenggendak nogo ti, ambi wurin nen muk eeke kagandak nogo aret kwe, mbere ti awo eeka'lek me, kenegen logot o,” yinuk, yo'nege kagarak.

¹³ Yo'nege mbaki, nenegen wonage me, malayikat ineebe 5 oone nggwok eeka inarompet nogo oone eeko mbaka, ti'nuk, at ambi nen arompet oone eeke mbaki, obari abe kaga kani kunggo menggam mbuti emas paga ogobakkigirik irip-irip ndomba eyak negen 4 to ari Ala abu'me wonage nogome nen oone ambi ari logonet,

¹⁴ “Malayikat ineebe 4 niyo nggwok Eparat aa'nggi paga keele maarak wonogwe nogo, mbet piinogo nappiyet o,” yinuk, at malayikat trompet oone eekerak nogo yoge mbaki,

¹⁵it malayikat ineebe 4 nogo nen tahun ti paga, tut ti paga, ne ti paga, oonegen ti paga, mondok ndak-ndak ari nage kenok, aakumi ando mogonogo teppiigo logonet, ando sepertiga nogo inoorit nogo logowak nduk, pipuk eerogo piyareegerak nogo aret inoorit nogo logowak nduk, piinogo teppiige kagarak.

¹⁶Kage nagarik, “It aakumi yigin unde kuda inamborowak paga kwi'nogo nagaarik, wim namburi nagaarak nogo ti, ineebe dua ratus juta aret o,” yinuk, ari naruk konenggirak.

¹⁷Ndi, kuda inom, aap ineebe kuda inamborowak paga kwi'ndak wonogwe inom, nabinggaanggo kage logonet, iigirak nogo yi o. Inarin nogo ti, kani kunik kere ari, mbogut mili kibu-kibu pege, ndi, yaliingga yi'nip nggwi ari, eeke nogo pogom, inarin etenggen togop aret kagarak. Ndi, kuda inanobak nogo ti, nggeewo singa anobak nogo pogom aret me, kugi lengga ndi wurogo pit nawak nduk, inambeme nen kwi yigirik etenggen yaliingga yi'nip nogo pogom inom, kani omoonuk inom, ka'luk inom, wundi wage kagarak.

¹⁸Inambeme nen wundi wagaarak nogo paga nen, kugilengga ndi wurogo pit nagaarak me, aakumi ando mogonogo teppiige logonet, ando sepertiga nogo kugi andi nen mondok kambit nogwe iigirak.

¹⁹It kuda inage ti, waalo muuru anobak nogo pogom nen aakumi inoorit nogo nagaarak me, inambe inom, inage inom, ti mondok omaawi ambik aret iigirak o.

²⁰ It ando andi nen kambulik teppiigerak ineenik wonogwe nogo nen, “Nit togop aret kambit nogwe niyo, ninagugiwak nogo ti, yi mendek ndi mendek inigen kogwe, ninoone inaruk konenggwi, tu nogwe, eekulik kagak we aanom warogo mbuti emas paga, mbuti perak nogo paga, mbuti tembaga etenggen kunik negen nogo paga, yugum paga, eyo paga, ogobakkigirogo punuk, alut eekwi, kugi inendage tiyappiigwi,

²¹aakumi inookwi, magagirak inookwi, kumi ugun wurinakwi, yogoot waganggwi, eeko monggoorak abok aret mbo punuk, niniki koonuwi o,” yinuk, yuurak op aret kwe, mbo pega'lek iniki kundugu logonet, eerit nogwe iigirak.