Read Western Dani Urut 1 Bible Online

Urut 1 - Western Dani bible

Urut 1

¹URUT WONE Ne ambi paga it aap wone owak loongga mendek nen aakumi Iterali inarum wonogwe iigak, it Iterali wonogwe me time mbi noogelo ambik agagerak. Mbi noogelo age mbareegi, aap ambi akwe inom, apuri mbere inom, inawi Yekura o Mbe'lekem nen aakumi Mowap mendek iname luulu logowok nduk, nogogwaarak.

²Aap ti endage Elimelek, ndi, at akwe endage Nawomi. Apurilogwe wologwe mbere nogo ambi endage Makolon, ndi, ambi endage Kiliyon. It ti, aap Eparata mendek inawi Yekura o Mbe'lekem aret wonogogwaarak kwe, o Mowap time logowok nduk, nogogwaarak.

³Nogo nogogwaarik, time wonogwe me, kwe Nawomi ogonggelo aap Elimelek nogo kangge mbareegi, kwe Nawomi nogo aagalogwe wologwe mbere nogo inom inalik wonogogwaarak.

⁴Wonogo logonet, wologwe nogo inakuwi kumi Mowap mendek wogonabeegwaarak me, kwe ambi ti endage Orapa, ndi, ambi ti endage Urut, kologogwaarak wonogwe iigak, tahun 10 eeppunuk,

⁵Makolon kunduk, Kiliyon kunduk, time aret kambeegwaarak. Kwe Nawomi nogo ogonggelo inom, aagalogwe mbere nogo inom, kanggo mbareegwa, inagalo nogo mban alik wonagagerak.

⁶Ti'nuk, at Aliku ALA nen apuri Iterali liippiige logonet, inambi wogoragagerak kwe Nawomi nogo aruk konengge nagagerik, kumi eenggelomini nogo inom aap Mowap iname nen iniyokan woroorak nduk, pipuk eereegwaarak.

⁷Pipuk eeko nogogwaarik, iname time mbo punuk, o Yekura woraawok nduk, kwe Nawomi eenggelomini inom tu paga ari wogo nogogwaarik,

⁸kwe Nawomi nogo nen eenggelomini nogo yorage logonet, “Kit kinalitak aret kiname kinagalomini-kinogobamini iya nanip o. Iya namonggotak wonogwe kiigak, kit kinogonggelomini kanggaarak nogo obeelom eeppiigwi, ndi, an kunduk, obeelom eeppanugwi, eeko nogotak nogo ndak-ndak at Aliku ALA kinabuwa nen obeelom eeppinagage, ndi, kinogonggelomini wokkiramenggerak kinom obeelom aret logomunggup nduk, eeppinagage, eeke logowak o.” Yorage nagagerik, inagandin eyak mbaninake mbareegi, it kumi nogo inoone nggwok paga le yogo logonet,

¹⁰“Lek o, nineenggelo. Kat kogoni-kaagi wonogwe me, time ninom aret nawok o.”

¹¹Yoreegwaarak kwe, Nawomi nen it yorage logonet, “Neenggelomini o. Nonggop nduk ninom noorak yo'nogo ogotik? Kit kinogonggelomini kolaamunggup nduk, naagalogwe peebi ambi ndariyak nomba'nuk, yogo ogotik?

¹²Togop eeriyak meek me, kiname nanip o, naagalogwe. An abu kweegelo kagak, nogonggelo ambi wagin lek abet aret kwe, Op aret ndarigin, mba'nuk, oonikiya yi paga aret an nogonggelo kolage logominggirik, naagalogwe aap aret ndaganake neenok,

¹³tawe ogwe iigak, kit kinogonggelomini alik mbet-mbet kolaga'lek it torinako logorak op mbakop? Togop eeriyak meek aret me, naagalogwe o. Kit perak, obeelom logonet eerit nogo logorak op aret kwe, an perak, Ala nen ale-pale eerogo panegerak niniki abu andi lombok wonage me, obeelom eeppaniyak meek me, nanip o, naagalogwe.”

¹⁴Yorage mbareegi, inoone nggwok paga le yogo logonet, at Orapa nogo nen eenggelo nogo linggik-kambuk eerogo agandin eyak mbangge nagagerik, ame aret nagagerak kwe, at Urut nogo perak, “Nimbirak aret noorak o,” yinuk, perenggolage mbareegi,

¹⁵at Nawomi nen at yoge logonet, “Koregelo nogo muk owe-awot inom, ayuk wuko menggaarak inagugi inom, wonogwe me nogome nage me, kat koregelo kimbirak aret nanip o.”

¹⁶Yoreegerak kwe, Urut nen ari logonet, “An nen kat mbo pagage, nimbirak noorak neebi ari, eeruwak nomba'nuk, kat nen koone nabenak mban yo'nirugun o. Kat, Noorak, mbake keenok, an kunduk time aret nage, Time nogo yikit, mbake keenok, an kunduk time aret nogo yege, kat kogoni-kaagi kunduk, an nogoni-naagi aret age, ndi, kat kogoba Ala kunduk, an nogoba Ala aret age, eerigin o.

¹⁷Ndi, kat ambime kangge keenok, an kunduk time aret kangge neenok, time aret nggween taambanugun o. Togop aret eeriyak me, neebe kambunuk nogo menggam nage logonet perak, nimbirak ninalitak aret nagun kwe, nineebe nineenik wonogo logonet, ninalitak ogwe kenok perak, Ala nen an maluk lombok eeppaniyak op aret o,” yoreegerak.

¹⁸At Nawomi nen Urut nogo imbirak woroorak iniki nggaruk togon koonggerak yelok kage nagagerik, wone yoge nagagerak nogo puk aret a'nuk,

¹⁹imbirak o Mbe'lekem aret wogogwaarak. O Mbe'lekem unggwi wogo mbareegwa, aakumi o kota time mendek abok aret inogut na'nuk, it kumi abok aret yogo logonet, “Yi Nawomi nogo aret mbakop?”

²⁰Yereegwaarak kwe, at nen it yorage logonet, “At Omaawi Lombok Menggerak nogo nen ale-pale eerogo panegerak me, an nendage Nawomi ti, yo'nirugup o. Nendage, Ale-Pale Aago, aret yo'ninip o.

²¹Neenggime yebet aago wonok wundi nagagirak kwe, at Aliku ALA nen, Kwe yi maluk o, yinuk, ari, ndi, at Omaawi Lombok Menggerak nen aaninggin alik lombok noba kwippanege, eeke nagaarik, neenggime lek aret wo'neren unggwi wagaarak me, kit nen nendage, Nawomi, nonggop nduk, yo'nogo ogotik o?” yinuk, yoragagerak.

²²Kwe Nawomi eenggelo Mowap mendek Urut nogo imbirak o Mowap nen o Mbe'lekem unggwi wogogwaarak nogo ti, waabuk negen jelai anggen iyaalok mbanggwi nogo eyom aret unggwi wogogwaarak.