Read Western Dani Urut 2 Bible Online

Urut 2 - Western Dani bible

Urut 2

¹Nawomi ogonggelo Elimelek owe-awot ambi eenggi warak lombok nagawan indo endage Mbowat aret wonagagerak.

² Kwe Mowap mendek Urut nogo nen Nawomi yoge logonet, “Aakumi waabuk negen jelai anggen mbanit nogo logonet, inambokan wambemenggerak nogo nabuwa nen, Anebenggolet, yo'niruwak nduk, yabume na o.” Ari mbareegi, Nawomi nen at yoge logonet, “E o. Nak o, neenggelo.”

³Yoge mbareegi, nage nagagerik, anggen mbanggwi iigak, wangge nogo inambokan anebenggo'net nage nagagerak. Anebenggo'net aap anebunu Elimelek mendek endage Mbowat anggween paga lik togon aret ari nagagerak.

⁴Ari nanuk, anebenggolage me, aap Mbowat nogo o Mbe'lekem nen nage nagagerik, it waabuk negen jelai mbanggo menggaarak nogo keyage wappiige logonet, “At Aliku ALA kinom aret wonage o.” Yorage mbareegi, it nen at yogo logonet, “Ninogoba kat kunduk, Aliku ALA ale'nggen koba logowak o.”

⁵Yogo mbareegwa, at Mbowat nen at ayeloman waabuk negen jelai anggen mbanggo menggaarak inarum wonage nogo yoge logonet, “Kwe yi, ta apuluk o?”

⁶Yoge mbareegi, at eyabu eeko menggaarak unde nogo nen, “Kwe Mowap mendek Nawomi imbirak aap Mowap iname nen wagaarak nogo yi aret o.

⁷Kwe yi, wage nagaarik, Waabuk negen jelai mbanogo mippit nogwe iigak, wangge kenok, an inambokan anebenggo'net na ilik? yo'nege mbaki, E o, yoge mbaki, puk aga'lek anebenggolage tit kagak o kuubondendok nen nok, yogondak yi aret ari wage nagaarik, we ne ambiriluk mban ooliya wurik me yonggonggolage nagaarik, eeke ti o.”

⁸Yoge mbareegi, at Mbowat nen Urut nogo yoge logonet, “Nayinggelo o. An wone yokkege yi, liirogon konenu o. Aakumi alik ineyabume waabuk negen jelai anebenggola nage, ndi, yime nen alik me nage, eerugun o. Ata, an nayeloman kumi wonogwe yime kinom logot o.

⁹It yabu yarak me waabuk negen jelai anggen mbanit nogwe kenegen iige logomenggendik, it kumi nogwe ti, inambokan aret nage logomunggun o. Ndi, it aap yabu eeko menggaarak nogo nen kat maluk eeppagukwak an muk yoragarak me, kat niyo abu eekkake kenok, it yabu eeko menggaarak nogo nen niyo toologo pugwi iinok mban na nagak yumunggun o.”

¹⁰Yoge mbareegi, Urut nogo abu'me tebe yinuk, ena nggween paga wu'na'nuk yoge logonet, “An ti, kwe nggiru aret kwe, nonggop nduk an nabuwa mbake logonet, liippanegeno?”

¹¹Ari mbareegi, at Mbowat nen kwe nogo yoge logonet, “Kogonggelo kangge mbaki, keenggelo obeelom eeppege logonet, kagalo-kogoba inom, nggween kat nda'nagaginom inom, abok aret nonggoti eerogo mbo piinok, aakumi kat keenggo'lek mendek wonogwe iigak wagandak nogo, an abok aret konenggirak me,

¹²at Aliku ALA nen eekendak nogo onggo wokkege, ndi, towe aagalogwe kanggwi iyo, a'naabit abu'me tebembiinok menggi kwak, at Aliku Iterali inogoba Ala abu'me ari wagandak wonage me, onggo nggwok lombok kalo logonogo wokkege, eerigin o.”

¹³Yoge mbareegi, at Urut nen at yoge logonet, “An nogo ti, kat kayeloman mini kumi nogo ndak-ndak lek aret wonage neegak kwe, an kayeloman nabuwa lombok nombake logonet, koone yanggorogon yo'nege, niniki eyak wappanege, eekendak me, mondok-mondok togop aret eeppanege logot o, nayinggelo,” yoreegerak.

¹⁴Ndi, mbi nonggo menggam aret age mbareegi, Mbowat nen at yoge logonet, “Oroti waganogo anggur amburu ale negen mendek paga labunogo nanok nduk, mok o.” Yoge mbareegi, it waabuk negen jelai anggen mbanggo menggaarak nogo inom kwi'nage mbareegi, at Mbowat nen waabuk negen jelai anggen worarak wogoge mbareegi, Urut nogo ndonggok togon nengge nagagerik, ando ndinogo nggerenggolagagerak.

¹⁵Abu aret nengge nagagerik, ambi anebenggolaakit nduk, mi'na'nuk, nage mbareegi, at Mbowat nen ayeloman mini yabu eeko menggaarak nogo wone lengganogo yorage logonet, “Waabuk negen jelai anggen mbanggo logonet, ando kwe yi, anebenggolaawak nduk, kiniki nen ando nggiginogo wuppegak eeko logonip o. Ndi, wambemenggerak wagangge kenok, mage yogwi, ndi, kwe yi, anggen mbanak mippumonggotak kweyak togon wangge nogo wagangge kenok kunduk, enggali wakwi, eeriyak mage o.” yinuk, yoragagerak.

¹⁷Kwe Urut nogo yabu yarak me anebenggolage tit kagak, o kiyoma aret age mbareegi, anebenggolagagerak nogo menenogo togolowak eno korok togon 22 liter negen aret yonggokkolagagerak.

¹⁸Yonggokkolage nagagerik, ko'nok ame kota nogome aret wage mbareegi, eenggelo nogo nen yonggoleegerak nogo enegen kagagerak. Kage mbareegi, Urut mbi nengge logonet, ando ndonggoppege kenok, nggereneegerak nogo wogoreegerak.

¹⁹Wogoge mbareegi, eenggelo nogo nen at yoge logonet, “O ngga nen anebenogo wagangge, ndi, yogondak aap ta eyabu aago me eeke, eekendak? Eeke keegak, aap liippagagerak nogo Ala nen ale'nggen oba pege logowak o.” Ari mbareegi, eenggelo Urut nen eekerak nogo tigitogon aret mbininogo yoge logonet, “O yogondak aap eyabu eekirak nogo ti endage Mbowat aret.”

²⁰ Yoge mbareegi, Nawomi nen eenggelo yoge logonet, “At Aliku ALA nen aakumi kanggwi inom, ineenik wonogwe inom, abok aret inabuwa mbake menggerak me, at ale'nggen aap ti, oba pege logowak o.” Ari nagagerik, wone ambi ari logonet, “Aap ti, nit ninayinggelo aret me, ninawone koonogo nineebe-ninanggween onggo mbanogo pinaniyak ambi at aret o.”

²¹Yoge mbareegi, kwe Mowap mendek Urut nogo nen, “Aap nayinggelo ti nen an yo'nege logonet, Neyabu eeppanugo menggaarak nen waabuk negen jelai anggen mbanggwi ti, kinom mbanit nage keegak, age yobok ari nawak o, yinuk, yo'negerak.”

²²Yoge mbareegi, kwe Nawomi nen eenggelo Urut nogo yoge logonet, “Aakumi inalik ineyabu yarak me eeri nage kenok, it nen maluk eeppagukwak, kumi Mbowat ayeloman mini yabu eekwi me time kinom eeri noorak op aret o.”

²³Yoge mbareegi, Urut nogo kumi Mbowat eyabu eeko menggaarak nogo inom wonage logonet, waabuk negen jelai inom, gandum inom, mbanit nogwe iigak, age yobok aret ari nagagerak. Ndi, ti eeko logonet, Urut nogo eenggelo imbirak aret wonagagerak.