Read Western Dani 1 Tamuwen 11 Bible Online

1 Tamuwen 11 - Western Dani bible

1 Tamuwen 11

¹Ti'nuk, aap Amon mendek endage Nakat nogo, awuri inom o Yabeti Nggileyat nogo nogogwaarik, inawooliya wuppunuk, aakumi time mendek inooriyak nduk, yengget-wangget eeko mbareegwa, it aap Yabeti mendek abok aret nen Nakat yogo logonet, “Nit nen kabu'me logonet, yo'nirage keenok, eeko logowok nduk, wone mbanuwok o.”

²Yoreegwaarak kwe, aap Amon mendek Nakat nogo nen wone onggo it yorage logonet, “Kit nen, Nit Iterali mendek abok aret ninenggali aruwok nduk, ninalitik-ninalitak ninigen abe'nggan pa'nggwe kilirogo pinaniyak op aret o, mbakwi kiinok, ninom wone mbaniyak op aret kwe, togop mbakwi lek kiinok perak, an ninom wone mbaniyak lek aret o.”

³Yorage mbareegi, it aap Yabeti mendek inoweewi nen wone onggo at yogo logonet, “Nit nen it aakumi wonogwe me ilin-ilin abok aret yeenggwa nira woraawak nduk, yonggo nappiigwi niigak, ne 7 paga iluk to'ninake logot o. Ndi, yeenggwa nira wogwe lek iinok perak, nit eeriyak meek me, kabu'me aret ari woraagun o.”

⁴Yogo nogogwaarik, it nappiya wogogwaarak nogo Tawun wonage menggim o Nggibeya nogome ari woraanuk, wone yereegerak nogo it aakumi Iterali yorogo mbareegwa, it abok aret inoone nggwok paga leenggu maareegwaarak.

⁵Leenggu maakwi me, at Tawun nogo eyabume nen aanggo tapi wonok awo wage nagagerik, “Nonggop agaarak kenok, it aakumi ti, leenggu maako agaarik?” Yorage mbareegi, it aap o Yabeti nen wone wonok yora wogogwaarak nogo mbininogo yoreegwaarak.

⁶Yoreegwaarak nogo at Tawun aruk konembunuk, Ala Aberiniki omaawi oba age nagagerik, anini ambik kani kunik negen age logonet,

⁷tapi mbere wagangge nagagerik, wappunuk mbanogo aakumi Iterali wonogwe me nappege logonet, “Aap ambi an inom, Tamuwen inom, nimbirak mu'niren nogwe lek iinok, at aanggo togop aret mbanogo ndi wuruwok o.” Ari mbareegi, it aakumi Iterali mendek nogo, “Ala nen nonggop eeppinanigin,” yogo logonet, inagabiti nen ambi puk agak eerulik ambugwi aret,

⁸o Mbetek Tawun wonage me, kuwak ari wogogwaarak. Kuwak ari wogogwaarak nogo at Tawun nen eenggi linggininake logonet, it Iterali mendek ineebe tiga ratus ribu iige, ndi, it Yekura mendek ineebe tiga puluh ribu iige, eereegerak.

⁹Eeke nagagerik, it Iterali mendek nen aap Yabeti mendek yonggo nappiya wogogwaarak nogo yorogo logonet, “Ko'lu o mo mbigarogon kinagap ndari woraagun me, wone ti wonok it Yabeti Nggileyat mendek yora nanip o.” Yorogogwaarak nogo wonok yora nogo mbareegwa, iniki ale'nggen ambik ogogwaarak.

¹⁰Iniki ale'nggen ogo nogogwaarik, aap Nakat nogo yogo logonet, “Nit nen eeriyak ninomaawi lek kenok, ko'lu kabu'me tebe yi wogwe me, eeppinaniyak kiniki koonggendak nogo eeppinaniyak op aret o,” yoreegwaarak.

¹¹Yo'nuk wonogwe iigak, ko'lu kuuben at Tawun nogo awuri kenagan eerogo piige nagagerik, o kilim nagake kagak, aakumi Amon mendek inawooliya wuppunuk wonogwe me, inoba kwi'nogo logonet, inoorit nugwi iigak, o wulik liingge aret agagerak. Ndi, inoorit nogwe iigak, mbaganeegwaarak nogo ti, mbere lunik lek inalitak aret mbaganit nogogwaarak.

¹²Mbaganit nogwe iigak, it aakumi Iterali mendek nogo nen Tamuwen yogwi, “At Tawun ninowe endagembogut logonet, ninarum logorak op mbakop? yagaarak nogo taani o? Nit nen inooruwok nduk, waganogo wo'niret o.”

¹³Yoreegwaarak kwe, at Tawun nen ari logonet, “At Aliku ALA nen o yogondak kit aakumi Iterali mendek kinagap ndakerak me, ne yi paga aap ambit-ambi wariyak abu mage o,” yoragagerak.

¹⁴Yorage mbareegi, at Tamuwen nen it aakumi nogo yorage logonet, “At Tawun ninowe endagembogut logowak nduk, o Nggilagan nogome ambinom nggwok paga mippuwok nduk, nawok o.”

¹⁵Yorage mbareegi, it aakumi nogo abok aret o Nggilagan nogo nogogwaarik, at Tawun nogo inowe endagembogut logowak nduk, at Aliku ALA enggaanom nggwok paga mippunuk, Ala inom lambunik logowak nduk, Aliku ALA ake warogo wogogo logonet, at Tawun aakumi Iterali mendek abok aret inom inale'nggen nggwok eereegwaarak.