Read Western Dani 1 Tamuwen 16 Bible Online

1 Tamuwen 16 - Western Dani bible

1 Tamuwen 16

¹Ti'nuk, at Aliku ALA nen Tamuwen yoge, “At Tawun nogo ti, it aakumi Iterali inowe endagembogut logorak an mbo pigirak neegak, at paga kat kiniki wakkolage keegak, ne mande logomunggun o? Yogondak eyo tayitun amburu togolowa'na toologo wonok, o Mbe'lekem aap endage Itayi wonage me nage logomenggendik, at apuri ambit-ambi Iterali inowe endagembogut logowak nduk, an muk leenogo pigirak me, amburu oba kilippi nak o.”

²Yoge mbareegi, at Tamuwen nen ari logonet, “Ti eeriminggirak at Tawun aruk konengge logomenggerik, an nooriyak aret me, time nonggoti na o.” Yoge mbareegi, Aliku ALA nen at yoge, “Tapi awooluk ambi wonok nage logomenggendik, it aakumi time yorage logonet, Aliku ALA ake warogo wogorikit nduk wagi o.

³Yorage logomenggendik, tapi Naliku ALA nake warogo wo'ninuk, lake logonet, aap Itayi woraawak nduk, yorumunggun o. Yoge keenok, at time woramenggerak me, Aap yi aret mippu o, yokkege neenok, at aret amburu oba kilippumunggun o,” yoreegerak.

⁴Yoge mbareegi, at Tamuwen nogo at Aliku ALA nen yoreegerak nogo ndak-ndak aret, o ti eyom paga o kota Mbe'lekem wambi nage mbareegi, it aap o kota wonogwe inoweewi nogo nen inaganak nugiranet Tamuwen inom lambumbunuk, at yogwi, “Ninogoba wae. Kat yime op eeppinaniyak nduk wagan a?”

⁵Yogo mbareegwa, at Tamuwen nen ari logonet, “E o. An niniki yanggonak paga ninom Aliku ALA ake warogo wogoruwok nduk, wagi o. Togop aret me, kit apit aret Aliku ALA ake warogo wogo'nuk, ninom laruwok nduk, kinalitak lombok kinoba mbeenogo patinuk, woraanip o.” Yorage mbareegi, at Itayi inom, apurilogwe inom, it kunduk inoba mbeenogo patinuk woraawak nduk, wiiragagerak.

⁶Wiiragagerak kuwak ari wogo mbareegwa, Tamuwen nen Itayi aput Eliyap kage nagagerik, iniki mbake logonet, “At Aliku ALA nen amburu kilirogo mippuurak mbakerak nogo, at enggaanom paga mi'ndak wonage yi aret kagi,” mbake me,

⁷Aliku ALA nen Tamuwen yoge, “An nen aap ti, miirulik me, kat nen aap etenggen inom, eebe nggorek paga inom, liippunuk, mippugun o. An liippege minggirak nogo ti, aakumi nen liippiigo menggaarak ndak-ndak lek o. It aakumi nen ineebe paga liippiigo menggaarak kwe, an perak, aakumi inikime lombok liippiige minggirak o,” yoreegerak.

⁸Yoge mbareegi, ti'nuk, aap Itayi nen apuluk Abinarap nogo wiireegerak, “Tamuwen owagam nak o,” yoreegerak. Yoreegerak nage mbareegi, at Tamuwen nen, “At yi kunduk, Aliku ALA nen miirulik o,” yereegerak.

⁹Ari mbareegi, at Itayi nen aput Tiyama nogo, “Tamuwen owagam nak o,” yoreegerak. Yoreegerak nage mbareegi, at Tamuwen nen, “At yi kunduk, Aliku ALA nen miirulik o,” yereegerak.

¹⁰Ari mbareegi, at Itayi nen apurilogwe ineebe 7 nogo at Tamuwen owagam nappiigak mban eereegerak kwe, at Tamuwen nen at yoge logonet, “It yi kunduk, Aliku ALA nen miirinabulik o.”

¹¹Yoge nagagerik, Itayi ambinom yoge logonet, “Kat kapurilogwe aap ndarak nogo, yi abok aret ilik, ambi wonage a?” Yoge mbareegi, at Itayi nen wone onggo yoge logonet, “Ambiret enabooluk ndarak wonage kwe, ndomba ndegeninake wonage o.” Yoge mbareegi, at Tamuwen nen, “At waga'lek kagak, nit mbi nagun lek me, woraawak nduk, wiiru o,” yoreegerak.

¹²Yoge mbareegi, at Itayi nogo nen aap ambi apuluk wa nawak nduk, nappereegerak wonok wage mbareegi, etenggen teretak eebe abu kigirikwe mondok yelok abe wonage mbareegi, at Aliku ALA nen Tamuwen yoge, “An miikkirak nogo yi aret me, mi'na'nuk, amburu oba kilippu o.”

¹³Yoge mbareegi, at Tamuwen nogo mi'na'nuk, eyo tayitun amburu toolak nogo wagangge nagagerik, oweewi inenggaanom paga at Ndawut nogo anobak paga amburu kilippereegerak. Kilippege mbareegi, ti eyom paga aret at Aliku ALA Aberiniki omaawi Ndawut oba agagerak mondok-mondok wonage kagak, at Tamuwen nogo iyokan o Arama aret wagagerak.

¹⁴At Aliku ALA Aberiniki Tawun oba wonagagerak nogo tayo ari kagak, kugi maluk mendek nen piyakkage logowak nduk, Aliku Ala nen oba nappi wagagerak.

¹⁵Nappi wagagerak piyakkage kagak, at Tawun ake eeko menggaarak nen at yogwi, “Ninogoba wae. Ala nen kugi maluk kat piyakkeege logowak nduk, nappi wagaarak kinikime wonage ti, pekkolet o.

¹⁶Kat kugi maluk kinikime unggwi wagaarak nogo nen piyakkake kenok, aap nggitat eeke kagak, kiniki yanggonuwak nduk, aap nggitat obeelom eeke menggerak kero, ambi nit kayeloman mini nen ninogoba kat kwaakkiruwok nduk, yo'niret o.”

¹⁷Yogo mbareegwa, at Tawun nen at ake eekwi nogo yorage logonet, “Op aret o, aap nggitat abu obeelom togon eeke menggerak kero, kwaako logomonggotik, an wonage me wonok woraanu o.”

¹⁸Yorage mbareegi, at ayeloman ambi nen yoge logonet, “Aap Itayi o Mbe'lekem mendek apuluk ambi nggitat abu obeelom eeke menggerak eenu kagarak o. Aap ti, wim nambuka wakaa'ngget kalu-kalu menggerak aret me, eebe abu kigirikwe, wone liippunuk mbangge menggerak o. Ndi, at Aliku ALA imbirak wonage o,” yoreegerak.

¹⁹Yoge mbareegi, at Tawun nen Itayi wonage me, yori nawak nduk, wone eerogo nappiige logonet, “Kat kapuluk ndomba ndegeninake menggerak Ndawut nogo an nowagam nappi mok o,” yinuk, nappiyareegerak nogo nogogwaarik, yogo mbareegwa,

²⁰at Itayi nen oroti inom, ndomba agabolo paga yiiwak ogobakkigirik me, anggur amburu toolak inom, kambin aagaluk ambi inom, keledai amborowak paga pege nagagerik, apuluk Ndawut nen Tawun wogori nawak nduk, nappi wagagerak.

²¹Nappi wagagerak Tawun owagam wage nagagerik, ayeloman a'nuk, ake eeke kagak, Tawun nen Ndawut iniki mondok kunik eeke nagagerik, at eegin wonok nega nogo mendek eerogo pereegerak.

²²Eerogo pege nagagerik, at Tawun nen Itayi yori nawak nduk, wone agago nappege logonet, “At Ndawut yi, an ninikilom aret me, nimbirak logonet, nake eeke logorak, Op aret, yo'niru o,” yinuk, eerogo nappereegerak.

²³Ndi, at Ala nen kugi maluk mendek Tawun piyakkagak eeke logowak nduk, nappi wagak eeke nagagerak nogo, piyakkagak eeke kenok, at Ndawut nen anggitat nogo waganogo eeke kagak, kugi nogo tayo ari nagagerak. Tayo ari kagak, at Tawun iniki yanggo yinuk, ugun obeelom aret wonagagerak.