Read Western Dani 1 Tamuwen 17 Bible Online

1 Tamuwen 17 - Western Dani bible

1 Tamuwen 17

¹Ne ambi paga it aap Pilitin mendek nen wim namburuwok nduk, inawuri ineegin warak, Kuwak ee'nip o, yinuk, yoragagerak aap Yekura inanggween o Toko paga kuwak eeri wogo nogogwaarik, o Toko yime pa'nggwe, ndi, o Ateka aru pa'nggwe, kagak, oolo o Epet-Ndamim taati inawooliya wukkologogwaarak.

²Ndi, wukkologo mbareegwa, at Tawun inom, awuri Iterali mendek inom, kuwak eeppunuk, o Ela kobappaga time inawooliya wukkologo nogogwaarik, aap Pilitin inom wim namburuwok nduk,

³o Ela kobappaga oolo kagak, it Pilitin mendek puut ene nggwe kuwak eekwi, ndi, Iterali mendek nogo, puut yibaga nggwe inena koonogo Pilitin wonogwe me wunnogwe, eeppunuk, wonogogwaarak.

⁴Wonogwe iigak, aap Pilitin mendek wakaa'ngget lombok awi Nggat mendek endage Nggoliyat nogo, anggup abu nggorek lombok metet kenagan negen aap wuriya wagak aret wonagagerak. At nen wim namburi naakit nduk, anobak paga warukwak abetagi mbuti tembaga mendek yirikkolage, arin mbuti tembaga paga yarak aaninggin 57 negen yirikkolage, owak mbelan imbirak mbuti tembaga paga yarak nabenogo pake, uum oolo paga paloowi mbuti tembaga paga ogobakkigirik awina yonggolak yirikkolage, ndi, awooluwak nogo ti, o omaawi logowak nduk muundu nappogo menggaarak obate nogo ti kokwak me, engget ti, mbuti linik aaninggin 7 negen aret wagangge, eeke nagaatik, nage kagak, at awot ambi nen nggeemu wonok aa'nduk a'nuk, nege nagagerak. Aap Nggoliyat togop aret wonagagerak me, ne ambi paga it Pilitin inawooliya wuppunuk, wonogwe me nen wundi wage nagagerik,

⁵

⁶

⁷

⁸puut nogo paga mi'ndak logonet, it aap ineegin warak Iterali mendek nogo oone nggwok paga yorage logonet, “Kit wim eeruwok nduk, koonogo punuk, wundi wogo nogotik, nonggop nduk wim nambuka'lek time wonogo ogotik? An nogo ti, Pilitin mendek lek mbakop? Ndi, kit ti, aap Tawun awuri nogo lek a? Togop aret me, aap ambi kinenggela'me nen leenogo punuk, an wonage me wuppi woraanip o.

⁹Wuppi woramonggotak at nimbirak nambukkolage logonet, at nen an noorogo panege kenok, nit Pilitin mendek kit kinayeloman ogwe, ndi, an nen at tebenogo punuk, wake neenok, kit Iterali mendek nit ninayeloman agago tebembinaganuk, wonogwe, eeruwok o.”

¹⁰Yorage nagagerik, at Pilitin mendek nogo nen ambinom ari logonet, “Kit Iterali kineegin warak ti, eeriyak meek aret kinombake kwe, o yogondak yi paga aret an nimbirak wakkaawok nduk, aap ambi leenogo pinip o,” yoragagerak.

¹¹Yorage mbareegi, at Tawun inom, Iterali mendek abok aret inom, aap Pilitin mendek wone yereegerak nogo inaruk konenggo nogogwaarik, inagabiti ambik a'nuk, inomanggen tayok yereegerak.

¹²Aap Ndawut nogo ti, o Yekura, kota Mbe'lekem aap Eparata mendek endage Itayi aput aret wonagagerak. At Itayi nogo, apuri aap mban 8 ndaganabeegerak me, at ndarak kagak, yi tahun ndi tahun eeppunuk, abu anggok agagerak kagak, Tawun nogo aap endagembogut wonagagerak.

¹³Aap Itayi apuri inaa'nduk ndarak ineebe kenagan nogo at Tawun inom wim eeri nogo nogogwaarak. Eeri nogo nogogwaarak nogo ti, manggu ndarak Eliyap. Ndi, ambo'me ndarak Abinarap. Ndi, ambo'me ndarak Tiyama. Ndi, enabooluk ndarak endage Ndawut. At apuri kenagan aa'nduk ndarak nogo, Tawun inom wim eeri nogwe iigak,

¹⁴

¹⁵at Ndawut nogo ogoba aanggumi ndomba ndegeninake logowak nduk, ogoba Tawun wonage me nen, o Mbe'lekem nagak eeke nagagerak.

¹⁶At Nggoliyat nogo kuuben inom, kiyoma inom, it Iterali nen inigen kaawak nduk, kin agak eeke logonet, miyuk-meya eerogo piige kagak, nogo 40 yereegwaarak.

¹⁷Ne ambi paga Itayi nen aput Ndawut yoge logonet, “Kat koweewi nogo ti, aap Iterali mendek abok aret Tawun inom o Ela kobappaga time aap Pilitin mendek inom wim nambukwi wonogwe me, gandum anggen worarak aaninggin 10 wakkagak eerak yi wagangge, ndi, oroti worarak 10 yi wagangge, eeke logomenggendik, kowewologwe inawooliyana wonogwe nogo wogorage, ndi, yilak amburu longgo warak 10 kuli yi, it ineegin warak ineebe seribu inowe nogo wogoge, eeke logomenggendik, it kowewologwe ineebe op aret wonogwe ilik? Kin wogiige logomenggendik, Ndogop wonogwe o, yogwe iinok, wone wonok yo'niri woraanok nduk, mbet-mbet nak o,” yinuk, yoreegerak.

¹⁸

¹⁹

²⁰Yoge mbareegi, ko'lu kuubondendok at Ndawut nogo eenik a'nuk, aanggumi kambin-ndomba nogo, aap ambi arum logowak nduk, pege nagagerik, at ogoba yoreegerak nogo ndak-ndak wonok owewologwe inawooliya wuppunuk, wonogwe me nogome unggwi nage kagak, it aap Iterali ineegin warak nogo wim namburuwok nduk, ina koonogo mannogo logonet, “Ninawim o,” yinuk, nggomooreegwaarak.

²¹Nggomooppunuk, it aap Pilitin mendek inom, Iterali mendek inom, wim endok kuniyak nduk, it panggo agan, it panggo agan, ambe paga mondok li'luk eekwi, iyareegerak.

²²Iige nagagerik, at Ndawut nen yi mendek ndi mendek wonok nagagerak nogo, it ineegin warak inamendek arum wonage me nogome pege nagagerik, at owewologwe wim nambukwi me nogome mbe agan nage nagagerik, owewologwe keyage wappiyareegerak.

²³Keyage wappiige kagak, at aap Pilitin mendek wakaa'ngget lombok awi Nggat mendek endage Nggoliyat nogo, it aap Pilitin mendek mbiginik inenggela'me nen wundi wa'nuk, ari nagagerak togo'nogo aret miyuk-meya eerogo piige nogo at Ndawut aruk koneneegerak.

²⁴Ndi, it aakumi Iterali ineegin warak nogo Nggoliyat inigen kogo nogogwaarik, inagabiti ambik aganake mbareegi, kole mbaganeegwaarak.

²⁵Mbaganggo logonet, Iterali ti'nen yogwe, “Aap kulinik-kalinik nit Iterali mendek miyuk-meya eerogo pinanege yi, at ninowe endagembogut nen wone ari logonet, Aap ambi ta nen Nggoliyat wake kenok, eenggi warak eerogo pege, akwe kolaawak nduk, apuluk kolaga wogoge, ndi, at agalo-ogoba inarum wonogwe onggo wu pugwi nogo, Pogo logorak lek, yorage, eerigin, yegerak nogo, aap eebe ombaga yi kogop a?”

²⁶Yogo mbareegwa, at Ndawut nen it aap time inom mi'ndak wonogwe nogo yorage, “Aap agabolo mbana'lek Pilitin mendek ti, At ta me, nduk, agabiti mbaka'lek at Ala eenik menggerak awuri ineegin warak miyuk-meya eerogo piige mbakop? Nit Iterali ninenggali wappinanege yi, lek aruwak nduk, aap ambit-ambi nen aap Pilitin mendek ti, warogo pege kenok, aap ti nonggop eeppuurak?”

²⁷Yorage mbareegi, it aakumi nogo nen wone yogo logonet, “Aap ti wake kenok, Onggo ndogop eeppuurak o,” yinuk, yogo nogogwaarak nogo aret mbininogo yoreegwaarak.

²⁸Yogo mbareegwa, at Ndawut it aap ineegin unde inom wone mbangge nogo at oweeluk Eliyap konengge nagagerik, anini ambik a'nuk, Ndawut mberege logonet, “Kat nonggop nduk yime wagandak? Kaanggumi kambin-ndomba mbereret karume wonogwe nogo ta unde wake kagak wagandak? Kat kiniki maluk kagak, an iya mbakak nege menggendak nogo an neenu me, Wim nambukwi nonggop iyaamun? yinuk, wagandak keegi o.”

²⁹Yoge mbareegi, Ndawut nen onggo ari logonet, “An nano eekirak me, yo'nege agandik? An we wone kin waganggirak ti, maluk mba'nuk yagan a?” yinuk,

³⁰ena logu ari nagagerik, it aap ineegin warak ando wone ti mban aret kin wogiyareegerak kwe, it ando nen wone aa'nduk yoreegwaarak nogo mban aret yoreegwaarak.

³¹It aakumi nen Ndawut oone wungge nogo konenggo nogogwaarik, at Tawun nogo yori nogo mbareegwa, woraawak nduk, wiireegerak.

³²Wiige mbareegi, Ndawut nogo wage nagagerik, Tawun yoge, “Nit Iterali mendek nen aap Pilitin mendek ti, eebe paga niniki ma'nariyak lek o. An kayeloman nen aap ti, nimbirak nambukkola naakit o.”

³³Yoreegerak kwe, at Tawun nen Ndawut yoge, “Aap Pilitin mendek ti, wulaga awo mbuuluk paga nen wim nambuke menggerak me, kat wulaga awo tawe aret me, at kimbirak namburiyak kobambok aret keegi o.”

³⁴Yoreegerak kwe, Ndawut nen Tawun yoge logonet, “An kayeloman yi, nogoba aanggumi kambin-ndomba ndegeninake logonet, nggeewo anini warak singa inom, anini warak beruang inom, wogo nagaarik, nandomba inenggela'me nen ambi ineyak nggereninuk wunggwi me,

³⁵an nen muguren nage nagarik, wake logonet, ndomba nogo singa ambeme nen ndingge neegak, singa nogo nen an nooriyak eeke mbaki, ondogowak paga eeruwak neenggi pippunuk, warogo pigirak o.

³⁶Kayeloman an nen singa inom, beruang inom, imbirak inookirak ti ndak-ndak, aap agabolo mbana'lek Pilitin mendek yi, at eenik menggerak Ala awuri ineegin warak miyuk-meya eerogo piige me, an togop aret warigin o.

³⁷At Aliku ALA nen singa inom, beruang inom, ineenggabit paga nen nibinnake kero, nagap ndakerak ndak-ndak, yogondak at aap Pilitin mendek eenggime nen togop aret ndinogo nagap ndarigin o.” Yoge mbareegi, at Tawun nen Ndawut yoge logonet, “Op aret o. At Aliku ALA kimbirak aret nak o,” yinuk, yoreegerak.

³⁸Yoge nagagerik, Ndawut nogo wim eeri nawak nduk, at Tawun nen wim nambuke logonet, yirike menggerak ayum nogo yirippege, arin mbuti paga yarak nogo yirippege, abetagi mbuti tembaga paga ogobakkigirik nogo yirippege, eeke mbareegi,

³⁹at Ndawut nogo nen Tawun obaloowi yonggolak nogo yum wim nambuka yirippereegerak nogo paga nggerenggolage nagagerik, tu noorak nduk wakkagagerak kwe, togop eerak negeelik me, at Ndawut nen Tawun yoge logonet, “An yi mendek yirikeelik me, yi paga yirippunuk, noorak meek o.” Yoge nagagerik, nggoorogo pereegerak.

⁴⁰Nggoorogo pege nagagerik, owaanggun ndomba ndegeninake menggerak nogo wagangge, yugum anggen eraabin tu aago niyoome mendek 5 kuli waganogo ndomba ndegeninake logonet wonok nega ayumogina nogome yonggoke, yugum nggelembunuk, nombok-kombok eerogo nappuurak keele nogo eenggime wagangge, eeke nagagerik, aap Pilitin mendek wonage me nagagerak.

⁴¹Nage mbareegi, aap Pilitin mendek nogo nen at anggeemu wonok nage menggerak nogo aa'nduk eeppunuk, Ndawut owagam panggo yi wage nagagerik,

⁴²aap Pilitin mendek nogo nen ena koonogo Ndawut pekkage nagagerik, at awo tawe etenggen teretak eebe abu kigirikwe kage nagagerik, Meek, ombake logonet,

⁴³Ndawut yoge, “An nggeewo aret nombake nagandik, nooriyak kowaanggun ti, wonok wagandak?” Yoge nagagerik, agugi endage paga Ndawut pulunogo pereegerak.

⁴⁴Pulunogo pege nagagerik, Ndawut nogo wone ambinom yoge logonet, “Kat nimbirak wakkaawok nduk mbet panggo yi omok nda! Kat kenggaanggum ti, towe wiga agan nugu menggaarak inom, nggwiya karume nugu menggaarak mendek inom, nawak nduk, wogoraakit nen, kat an nowagam ya'i panggo yi omok o.”

⁴⁵Yoge mbareegi, at Ndawut nen aap Pilitin mendek nogo yoge logonet, “Kat an nooriyak nduk, paloowi inom, mbuti wooluwak inom, wolurege inom, li'luk ee'nuk, an nowagam wagandak kwe, an perak, at Aliku Omaawi Lombok Menggerak awuri ineegin warak Iterali inogoba Ala mbelappege menggendak nogo endage paga kowagam wagi o.

⁴⁶Ne yi eyom paga at Aliku ALA nen keebe waganogo an neenggime wo'nege yi aret me, koorogo paganuk, kanobak mbanogo wagangge logonet, kawuri ineegin warak Pilitin mendek abok aret kinom towe wiga agan nugu menggaarak inom, nggwiya eyonggaame menggaarak inom, kineebe kinoorak nawak nduk, wogoraagin o. Ti eeriminggirak paga aakumi o nggween paga yime menggaarak abok nen, Aakumi Iterali inogoba Ala wonage aret kogo o, yinuk, ineenu arugun.

⁴⁷Ndi, ineegin tiyak ari, tebek ari, eeruwak nduk, koongge menggerak nogo ti, at Aliku ALA aret me, kit kineebe apit aret nit nineenggime pinanigin ti paga it aakumi apit ya'i kuwak eeri wagaarak wonogwe yi, at Aliku ALA nen paloowi paga inom, wooluwak paga inom, inagap ndakeelik ineenu arugun o,” yinuk, yoreegerak.

⁴⁸Yoge mbareegi, aap Pilitin mendek nogo nen warikit nduk, Ndawut wonage me panggo yi wage kagak, Ndawut nogo nen imbirak perenggolaakit nduk, it aap Pilitin mendek pipuk aago wonogwe me mbe agan panggo yi nage logonet,

⁴⁹yugum anggen ayumogina yonggolak nogo kilirogo eenggime wagangge nagagerik, yugum nogo keele paga nggelembunuk, nombok-kombok eerogo nappege nagagerik, aap Pilitin mendek nogo enggaawak telak togon wareegerak yugum nogo lobok yi unggwage mbareegi, enete wanduk nggween paga ngginnagagerak.

⁵⁰ Enete wanduk ngginnage mbareegi, at Ndawut nogo mbe agan aap Pilitin mendek warak wonage me, owagam mi'nari nage nagagerik, aap Pilitin mendek obaloowi awina wonage nogo nggiginogo eebe warogo punuk, anobak mbanogo waganeegerak. Ti eereegerak nogo ti, wooluwak eenggime lek we yugum anggen paga inom, keele paga yugum nggelembunuk nappuurak nogo paga inom, aap Pilitin mendek nogo warogo pege nagagerik, eegin tiyak yereegerak. Ndi, it aap Pilitin mendek apit aret inowe wakaa'ngget endage tiyanak nogo, kangge enegen kogo nogogwaarik, kole mbaganit nogogwaarak.

⁵¹

⁵²Mbaganit nogo mbareegwa, it aakumi Iterali mendek inom, Yekura mendek inom, ya-kwa agan it Pilitin mendek muguren nogo mbareegwa, it nogo pelen-pelen mbaganit nogwe me, Iterali mendek nen o Nggat inom, o Ekoron inom, tu Taarayim nogo menggam inoorogo piinet o Nggat koorok tu o Ekoron unggwogo menggam taati kuli piya nogogwaarak.

⁵³Piya nogo nogogwaarik, it aap Iterali mendek nogo iniyokan wogo logonet, it Pilitin inamendek inawooliyana punuk, mbaganeegwaarak nogo inagugun waganggak wogogwaarak.

⁵⁴Ndi, at Ndawut nogo aap Pilitin mendek anobak mbanak wonok, o Yerutalem punuk, at Pilitin mendek obaloowi inom, awooluwak inom, nogo perak, wonok at awooliyana lombok nogome pereegerak.

⁵⁵At Ndawut nogo nen aap Pilitin mendek imbirak wim namburiyak nduk nage at Tawun enegen kage nagagerik, at Tawun awuri ineegin warak inowe Abenet nogo yoge logonet, “Abenet wae. At wulaga tawe ti, ta aput?” Yoge mbareegi, Abenet nen yoge logonet, “Nowe kendagembogut kat aret keegak, an pilit yokkiriyak meek me, an neenggo'lek o.”

⁵⁶Yoge mbareegi, at Tawun nen, “Wulaga tawe ti, Ta aput? yoranet nak o.” yoreegerak.

⁵⁷Ndi, at Ndawut nogo nen aap Pilitin mendek nogo abu aret warogo punuk, anobak mbanak nogo eenggime wonok iyokan wage me, at Abenet imbirak lambumbunuk, anobak ti eenggime kagak, Abenet nen Ndawut nogo wonok Tawun owagam pi wagagerak.

⁵⁸Owagam pi wage mbareegi, at Tawun nen Ndawut yoge, “Wulaga yi wae. Kat ta apuluk?” Yoge mbareegi, at Ndawut nen onggo yoge logonet, “At kayeloman Itayi o Mbe'lekem mendek nogo aput an aret o,” yinuk, yoreegerak.