Read Western Dani 1 Tamuwen 2 Bible Online

1 Tamuwen 2 - Western Dani bible

1 Tamuwen 2

¹ Eeko nogogwaarik, kwe Kana nogo tamban eeke logonet, “Kaliku ALA nen eeppanegendak paga Niniki ale'nggen ambik mbake agarik o. Kaliku ALA nen yeenggwa nege keegak, An nomaawi tiyak yigi o. Ninom ogoorak tebenogo piinok, Nagap ndareegindak me, Nale'nggen nen wogoppake agarik o.

²Yugum kole itok menggi kwak, Ninogoba Ala kat togop aret wonage menggendak o. Kaliku ALA kikak nakeelik abu obeelom wonage kwak, Togop ambi wonage lek o. Kat wonage menggendak kwak, ambi wonage lek mban.

³Kaliku ALA kat aret me, yi wone ndi wone abok aret keenu age, Aakumi nen yi eekak ndi eekak eekwi nogo, inowak loongge, Eeke menggendak me, It aakumi nen, Nit iya o, yinuk, tiyappatit nugwi, Wi niruwak o, yinuk, inoone paga wogoppatit nugwi, Eerugwaarik o.

⁴It aap wakaa'ngget ineegin nogo muk kalenogo piige, Ineebe lebenak ya ngginnagak nugwi nogo perak, inomaawi eerogo piige, Eekendak o.

⁵It aa'nduk mbi ndonggorogon nonggo nogogwaarak nogo, Mbi abu nen yabu kwaakwi, Ndi, it aa'nduk mbi abu wonogogwaarak nogo, Yogondak inambi ndonggorogon nunggwi, Eeko agaarik o. Kwe aa'nduk wubili wonagagerak nogo, Yogondak aagalogwe 7 ndaganake kagak kwe, At aa'nduk aagalogwe apit ndaganake nagagerak nogo, Yogondak elege ndake menggim nggilit agaarak wonage o.

⁶Kaliku ALA nen it aakumi kambuwak nduk eeppiige, Ineenik logowak nduk eeppiige, Kambunuk nogo menggam nappiige, Time nen mippiige, Eeke menggendak o.

⁷Kaliku ALA nen mban aakumi ineenggi lek eerogo piige, Ineenggi warak eeppiige, Iniki wogoppakwi iinok tebeppiige, Iniki tebeppakwi iinok, tiyappiige, Eeke menggendak o.

⁸It aap abu meek liirubu paga, Ndenen warak wonogwe nogo pilanogo mippiige, Iniki aaninggin nen purok lengge eerak wonogwe nogo, Iniki obeelom eerogo piige, Eerogo piinok, Aap inendagembogut inapuri nogo inom nugu logowak nduk piige, Inayuk warak logowak nduk, yabu unde eeppiige, Eeke menggendak. Kaliku ALA nen aret nggween alom yi, O eyak kwak wurake nagagindik, Nggween ogombaga ndoonogo kwippereegindak me,

⁹It aakumi abet mbako menggaarak nogo, Nggween ti paga iniyok pit nogwe iigak, inarum wonage, It inogogun ambik maluk eekwi iinok perak, o apit me time inoone lek eerogo piige, Eeke logomunggun o. Aap ambit-ambi, An nomaawi paga ndogop eerikit o, Koonggetak nogo aret ageelik me,

¹⁰It Kaliku ALA kinom ogoorak wonogwe nogo, Yigirik-noonom eerogo piige, Ngguurubu oone eeke menggi kwak, Kaliku ALA mbogut paga koone ari, It aakumi o irip-irip abok aret inowak loongge, Eerumunggun me, At aap inowe endagembogut logowak nduk, Mippereegindak nogo omaawi wogoge, Kat leenogo punuk, amburu eeppereegindak nogo, Omaawi kaawak nduk tiyappege, Eerumunggun o,” yinuk, tamban eereegerak.

¹¹Eeke mbareegi, at Elakana akuwi-apurilogwe inom o Arama iniyokan nogwe iigak kwe, at Tamuwen nogo perak, aap Ala unde Eli abu'me logonet, at Aliku ALA enggaanom paga eeke nagagerak.

¹²At Eli apuri nen Aliku ALA inagabiti mbaka'lek inobaabut abu maluk lombok aret wonogogwaarak.

¹³Aakumi Iterali mendek nen tapi-ndomba Ala ake wogori wogwe iinok, warogo togolowa'na lakugak, aap Ala unde ayeloman nen paando negen yigirok eyak kenagan eenggime wonok wage nagaatik,

¹⁴enggaanggum togolowa'na ilik, ndoonogo laka kuwalina ilik, pancina ilik, lakwi iigak, ayeloman nogo nen ndaninogo wonok wungge kenok, it Ala unde nen, “Ti nit ninake o,” yinuk, waganggo nogogwaarak. It aakumi Iterali apit aret Ala ake wonok o Tilo wogwe iinok, liirogon aret eeko nogogwaarak kwe, it Eli apuri nogo nen perak,

¹⁵ndomba-tapi warogo amok leenogo Ala ake kani kunogo wogoriyak nogo, awo kani kungga'lek kagak, Ala unde ti, inayeloman nogo nen wage nagaatik, it aap Ala ake warogo wogogwi nogo yorage logonet, “It nogobamini Ala unde nogo ndomba-tapi enggaanggum niyo paga larak wogorogwe nogo ineebi me, worarogo nawak nduk, ki aret wo'ninip o.”

¹⁶Yorage kenok, it nen yogo logonet, “Ndomba-tapi amok leenogo aa'nduk kani kunggwi niinok, it uugwe mbakwi nogo aret waamunggun o,” yogaatak kwe, it Ala unde inayeloman nogo oone omaawi paga yorage logonet, “Lek o. Yogondak aret wo'ninip o. Wo'nugwi lek kiinok, an nalik nen aret waagin o,” yinuk, yorage nagagerak.

¹⁷It Eli apuri mbere nen togop eeriyak inayeloman yogo nogogwaarak nogo ti, Aliku ALA ake warogo wogogwi abu meek mba'nuk, yogo nogogwaarak me, Aliku ALA enegen kagak maluk nggwok lombok eeko nogogwaarak.

¹⁸Togop aret eekwi iigak kwe, Tamuwen nogo perak, wulaga awo mbuuluk kagak ayum ligi yawenak amuni mbanak paga penggaarak agale warak epod nogo yippunuk, Ala alut eeko menggam awooliya wurik me ake eeke nagagerak.

¹⁹Ndi, tahun ambi eekak paga Tamuwen agalo nogo ogonggelo imbirak Aliku ALA ake warogo wogoriyak nogo wogori wogo logonet, at agalo nogo nen yum nggorek ambi at Tamuwen ake penggaarogo wogori wagak eeke nagagerak.

²⁰Wogori wagak eeke kenok, at Eli nen Elakana akwe imbirak keyage warogo ale'nggen inoba piige logonet, aap Elakana nogo yoge, “Kakwe yi nen, Naagaluk wo'niriyak o, yinuk, Aliku ALA yoreegerak wogoge mbareegi, Aliku ALA wogoreegerak nogo obaane'me kapuri ambinom wokkege logogin o,” yorage kenok, at Elakana akwe imbirak iniyokan iname o Arama aret nogo nogogwaarak.

²¹Togop eekwi iigak, at Aliku ALA nen kwe Kana nogo abuwa mbake mbareegi, aagalogwe wologwe kenagan ndaganake, ndi, komologwe mbere ndaganake, eereegerak. Ndi, Tamuwen nogo Aliku ALA awooliya wurik me enggaanom paga ake eeke kagak, eebe tawe aret age nagagerak.

²²Ndi, aap Eli abu anggok agagerak wonage kagak, at apuri nen it aakumi Iterali abok aret maluk mendek eeppiinet nugwi, ndi, komologwe Ala inom lambungge menggim ooliya wurik tungga arum menggaarak nogo inom nogo yugwi, eekwi nogo at Eli aruk konengge nagagerik,

²³it yorage logonet, “Kit maluk eerit nugwi nogo aakumi apit aret yo'niri wagak mban eekwi konengge ti, kit nonggop nduk togop eerit nogo ogotik?

²⁴Kit eerit nugwi paga Aliku ALA apuri nen, Nit maluk togop aret eerit nogo logowok o, yinuk, wiganit nogwe konenggirak me, Togop ambinom eerugup o, napuri!

²⁵Aap ambit-ambi nen ore maluk eeppege kenok, at Ala nen inowak loonogo inawone mbaniyak op aret kwe, at Aliku ALA maluk eeppege kenok perak, aap ti, ta nen awone mbanigin mbakop? Lek aret me,” yinuk, yoragagerak kwe, at Aliku ALA nen Eli apuri inooriyak iniki kooneegerak me, inogoba inaruk wake nogo liirogon konengga'lek aret wonogogwaarak.

²⁶ Ndi, wulaga Tamuwen nogo perak, eebe tawe age kagak, Ala inom, aakumi inom, iniki ale'nggen ombako nogogwaarak.

²⁷Ne ambi paga aap Ala wone liirogon eeka ambi nen Eli owagam wage nagagerik, yoge logonet, “At Aliku ALA nen yegerak nogo yokkiri o. At Eli ombomini o Metit time Pirawun abu'me tebembiirogo wonage kagak, an kenom paga aret nigiya wagagirak nogo lek a?

²⁸ Nigiya wage logonet, it aakumi Iterali inanebunu lombok iigak, at lombok ombo nen neebe unde logonet, ndomba-tapi nake warogo wo'nege, obari abe kaga mendek kani kungge, it aap neebe unde inayum agale warak epod nogo yippunuk, nimbirak wone mbani unggwage, eeke logowak nduk, leenogo mippereegirak. It aakumi Iterali mendek nen ndomba-tapi warogo an nake kani kuniyak mendek nogo kunduk, at ombo wiganak unde eeppiyareegirak kwe,

²⁹an nawooliya wurik me time it aakumi Iterali nake warogo kani kunggwi, iniki ale'nggen paga yi mendek ndi mendek we wo'nugwi, Eeko logonip o, yinuk, yoragagirak nogo, nonggop nduk miyuk-meya eerogo pogo agaarik? Ndi, it napuri Iterali mendek nen ndomba-tapi warogo nake kani kunggwi iinok, apuri nen enggaanggum mbanak abe kenok inaanoma'le andi lek nunggwi ti, nonggop nduk it iya, ndi, an meek, nomba'nuk, inaruk waka'lek teppiige agaarik?

³⁰At togop aret eeke me, Naliku Iterali inogoba an Ala nen, At apuri inom, at anebunu mendek inom, it aap neebe unde a'nuk nawi wurik me nenggaanom paga mondok-mondok nake eeko logowak o, yinuk, noone abuk nggaruk togon yoragagirak kwe, yogondak nen wone ti eeriyak abu meek aret aga o. Aap ambit nen an tiyappanege kenok, an nen aap ti aret tiyappege, ndi, aap ambit nen an meek eerogo panege kenok, an nen aap ti meek eerogo pege, eeke minggirak me,

³¹at apuri inom, anebunu mendek inom, ambik kenok iya ombakwi nogo, lek eerogo piyoorak eyom abu panggoni wagaarak wonage me, at paga wiganak ambi li a'nuk kanggo logogun mondok lek o.

³²An nen aakumi Iterali inanebunu alik mendek obeelom eeppiige at enegen iige logomenggerik, ari logonet, It mban eeppiige yi, Ao, yinuk, iniki wakkolamenggerak kwe, at paga wiganak ambi li a'nuk kanggo logogun lek o.

³³It an nake warogo kani kunggo menggam eekwi iigak, inoorigin kwe, ando inooka'lek teppiige neenok, eerit nugwi paga at le ari logonet, enegen mbuk age, iniki wakkolage, eerigin o. Ndi, at mendek wiganak nogo abok aret ineebe awo obate paga aret kanggo logogun o.

³⁴ An ari yi nogo, Abet aret arigin, eenu aruwak nduk, at apuri mbere Kopini Pinekat imbirak ne ambit paga aret kambugun o.

³⁵Aap ambi nen an eeriyak mbake inom, niniki koongge inom, neebe unde logonet, mondok liippunuk, ndak-ndak eeke logowak nduk, leenogo mippatigin o. Mippake logominggirik, at apuri wiganak wogoriminggirak mondok nu'lek logonet, at ambi leenogo amburu eerogo punuk, mippigin nogo, enggaanom mondok-mondok ake eeke logogin o.

³⁶Ti eeke neenok, at apuri wiganak ineenik wonogwe nen aap mippigin nogo, owagam wogo logomenggaarik, inendobanggun yindumbunuk, Ai, ninogoba. Nit mbi abu me, wu a, mbi a, kolaawok nduk, aap Ala unde ineyabu ambi eeriyak yo'niret o, yinuk, yori wagak eeko logogun, yegerak o, yinuk, yokkigi o,” yoreegerak.