Read Western Dani 1 Tamuwen 20 Bible Online

1 Tamuwen 20 - Western Dani bible

1 Tamuwen 20

¹At Ndawut o Arama Nayot time nen mbaganit Yonatan ka nage nagagerik, yoge logonet, “Kat kogoba nen an nenggaawak lek eeppaniyak eeke ti, nano eeppiigirak? An maluk eekirak ngge? Ndi, ngge eekirak paga eeke agaarik?”

²Yoge mbareegi, at Yonatan nen, “Togop yagandak ti kwe, kat koorigin lek o. An nogoba nen yi mendek ndi mendek mbuuluk a, nggwok a, eeke logonet, an yo'nega'lek kagak, eekeelik me, kat nen, Eeppanigin, yagandak nogo ti, an yo'nega'lek kagak, eeppagarak mbaken? Ti lek aret mbaki o.”

³Yoge mbareegi, at Ndawut nen ari logonet, “Kat an niniki kunik wonage nogo kogoba abu eenu aret me, at nen ari logonet, An nen Ndawut eeppuurak mbake nogo Yonatan iniki wakkolookwak, eenu eeppuurak lek, mbake me, kat yokkega'lek kagak, an niyok ambi punuk, Ambi pi, ari paga aret noorigin o, yinuk, Aliku ALA eenu me, kat togon keenu a'nok nduk abet aret yokkigi o.”

⁴Yoge mbareegi, at Yonatan nen Ndawut yoge, “Kat nen an eeppagarak kiniki mbakendak nogo ti, eeppagakit nen an yo'niru o.”

⁵ Yoge mbareegi, Ndawut nen at yoge logonet, “Ko'lu tut ngget penengge paga ninale'nggen nen laago lako logonet, an Tawun nimbirak kwi'na'nuk, mbi noorak koonak kwe, kagak an penaame naminggirak time kumaarak neegak, ko'lukwak kiyoma ari nawak nduk, E, yu o.

⁶Penaame naminggirak wonage neegak, kat kogoba nen, Ndawut wonage lek nonggop nduk? Yokkege kenok, kat nen kogoba yoge logonet, At mbet-mbet ame kota Mbe'lekem time owe-awot tahun ambi eekak paga Ala ake warogo wogogo menggaarak nogo wogogwi me, Na o, yinuk, an yo'nege nagaarik, nagaarak, yo'nu o.

⁷Yoge logomenggendik, at Tawun nen, Op aret o, yokkege kenok, an kayeloman yi, Op aret logogin, nombarumunggun kwe, at nen anini mbet-mbet wungge kenok perak, an maluk eeppaniyak koonggerak nogo abet aret mbarumunggun o.

⁸Togop aret me, Aliku ALA enggaanom paga an kayeloman nimbirak wone koonogo pogoorak me, an maluk ambi eekirak noba wonage kenok, wo'neren kogoba wonage me, pani noorak lek o. Ata, nabuwa mba'nuk, kat nen aret noorogo panumunggun o.”

⁹Yoge mbareegi, Yonatan nen, “Yagandak ti, togop abu lek o. An nogoba nen kat maluk eeppagarak koonggerak nogo neenu logonetak en, kat yokkenetak lek mbaken?”

¹⁰Yoge mbareegi, at Ndawut nen Yonatan yoge logonet, “Kat kogoba yoremenggendak wone onggo, oone omaawi yokkege kenok, ta nen an yo'nirigin o?”

¹¹Yoge mbareegi, Yonatan nen Ndawut yoge, “Nimbirak penaame time nawok nduk omok o.” Yoge mbareegi, imbirak penaame aret nogogwaarak.

¹²Nogo nogogwaarik, at Yonatan nogo nen Ndawut yoge logonet, “An nogoba wonage me nage logominggirik, kat eeppagarak koonggerak nogo liippunuk, kat ambi eeppagarak lek op aret kenok, kat keenu a'nok nduk, ko'lu ilik, ko'lukwak a, oonegen yogondak yi ndak-ndak wone agago nappi woraagin o. Ndi, nogoba nen maluk eeppagarak mbake kage kenok perak, kagap ndakko'nok mbaganenok nduk, yokkiri woraagin mban. Yokkiri wage lek neenok ti, Aliku ALA nen an aret nooruwak o, yinuk, at Aliku Iterali inogoba Ala endage paga abet aret yokkigi o. Togop aret me, at Aliku ALA nen an nogoba aa'nduk imbirak wonagagerak nogo pogom kimbirak togop aret logowak o.

¹³

¹⁴Kimbirak togop aret logogin me, an kangga'lek awo neenik wonage neegak, at Aliku ALA nen yi aakumi ndi aakumi mbo piigeelik mondok-mondok inabuwa mbake menggi kwak, an togop aret nabuwa mbake,

¹⁵ an napuri wigannaremenggaarak nogo mbo piiga'lek mondok-mondok inabuwa mbake, ndi, at Aliku ALA nen o nggween paga yime kinom wim mbanak menggendak nogo lek eerogo piige kenok kunduk, an abe'nake, eeke logomunggun o,” yinuk, yoreegerak.

¹⁶Yoreegerak ti paga Ndawut apuri-ombowologwe nen at Yonatan ili yogo logowak nduk, at Yonatan nen Ndawut yoge logonet, “Wone yogoorak yi, taganogo punuk, an nenggaawak lek eerogo panugwi iinok, Aliku ALA nen kat kawim eeppiyamenggerak paga namee'nggo kat aret maluk eeppagago logowak o,” yinuk, wone abuk nggaruk togon mbanogo pereegwaarak.

¹⁷Wone kumbuk mbanogo pereegwaarak nogo ti, at Yonatan iniki kunik eekkolage menggi kwak, at Ndawut iniki kunik wonage menggerak me, alom ti paga at Yonatan nen Ndawut ne ambinom kumbuk mbanuwak nduk, yoreegerak ti aret.

¹⁸Ti yoge nagagerik, at Yonatan nen Ndawut yoge, “Ko'lu tut ngget penengge paga ninale'nggen nen laago nonggo logonet, kat kwi'ndak menggenom keebe lek keenok, At eebe ngge, yugun aret me,

¹⁹ko'lukwak o kiyoma wone yi, iyaalok agagerak paga kumaarak wonagaginom nogome nage logomenggindik, yugum Etin ambo'me time to'nake wonage me,

²⁰an nen maale ne kenagan paga yugum ti, wake yuwak eraaninu namburogo nappunuk,

²¹nayeloman yoge logonet, Maale namburik ti, wa nak o. Yoriminggirak nage logomenggerik, kwaarit nege kagak, Time lek o. Maale namburik ti, yime pa'nggwe wonage me, wonok omok o. Ari neenok, kat nen, At eenik menggerak Aliku ALA endage paga pilit lek abet aret yo'nege me, maluk ambi eeppaniyak lek op aret nagin kagi, mba'nuk, woraamunggun o.

²²Ndi, an nen wulaga nogo yoge logonet, Time lek o. Maale namburik nogo ti, aru pa'nggwe tayorogon time wonage o, yoge neenok perak, Aliku ALA nen, An o ena time nggwe nappanege, kagi, mba'nuk, time aret namunggun o.

²³Ndi, kat nimbirak eeko logorak wone yogoorak nogo ti, kat yagandak inom, an yagarak inom, Aliku ALA enggaanom paga yogoorak me, at nen mban ninenggali wappinanege logukwak, mondok-mondok porogo logowok o,” yinuk, yoreegerak.

²⁴Yogo nogogwaarik, at Ndawut nogo iri'nggaame time kumaa'nari nagagerak kagak, tut ngget penenak laago noorak eyom panggoni wage mbareegi, aap endagembogut nogo mbi nawak nduk, at kwi'nage menggim obaane'me kobat eraaninu time kwi'nage, ndi, at Yonatan nogo Tawun engga loolo kwi'nage, ndi, aap Abenet nogo Tawun eeben abeenok kwi'nage, eereegwaarak kwe, at Ndawut kwi'nage menggim perak, tenak aret wonagagerak.

²⁵

²⁶Tenak aret mbareegi, at Tawun nen iniki mbake logonet, “Ndawut yi, maluk ambi oba age nagaarik, lek aga'lek kenok, puk agaarak abet aret kagi o,” mbake nagagerik, ne ti eyom paga oone ambi yuulik puk agagerak kwe,

²⁷ko'lu laago lappunuk, nonggo logonet, Ndawut kwi'nage menggim tenak aret mbareegi, at Tawun nen aput Yonatan yoge, “At Itayi aput Ndawut nogo, o kobit inom, yogondak inom, ninom nawok nduk, waga'lek mban ti, nonggop nduk puk aga?”

²⁸Yoge mbareegi, at Yonatan nen Tawun yoge logonet, “Ndawut nen, An nowe-nawot o kota Mbe'lekem time Ala ake warogo wogogo logonet, nayonggo pegaarak me, nowe-nawot pegiya naakit nen, E, yo'niru o. Yo'nege mbaki, E o, yoge neenok, nagaarak me, alom ti paga kendagembogut kimbirak mbi noorak nduk, woroolik o,” yinuk, yoreegerak.

²⁹

³⁰Yoge mbareegi, at Tawun anini ambik a'nuk, Yonatan mberege logonet, “Wone liirogon waganggeelik ya wukak aagaluk kat yi, Itayi aput kimbirak a'nuk, agan nege ti paga kat inom, kagalo inom, kineebe maluk eerogo pakop o.

³¹At Itayi aput eenik wonage kagak, kat kendagembogut age, ndi, kabu'me piige logowam nggwok age, eerigin lek nogo kat keenggo'lek a? Togop aret me, an warikit nduk, eebe wonok niri woraawak nen, aap ambi nappiyet.”

³²Yoge mbareegi, at Yonatan nen wone onggo ogoba yoge logonet, “At nonggop nduk wariyak? At maluk nano eekerak?”

³³Yoge mbareegi, at Tawun nen Yonatan mondok warikit nduk, awooluwak paga wondep wureegerak. Wondep wureegerak ti paga at Yonatan nen, “Nogoba nen Ndawut abet aret wariyak mbake kagi,” yinuk, eenu agagerak.

³⁴At ogoba Tawun nogo nen enggali lek Ndawut meek eerogo pege paga, at Yonatan iniki wakkolage logonet, anini ka'luk aagi negen mi'nage nagagerik, tut ngget penenak ne ambi lakwi ti paga inom mbi noolik mbo punuk, wundeegerak.

³⁵Wungge nagagerik, ko'lu kuubondendok at Yonatan Ndawut imbirak wone mbaneegwaarak nogo, a'me lik yuwak nduk, wulaga mbuuluk ayeloman imbirak Ndawut iri'nggaame wonage me nogome aret nogo nogogwaarik,

³⁶at Yonatan nogo nen wulaga nogo yoge, “Maale namburogo nappege yi, mbe agan wa nak o.” Yoge mbareegi, mbe agan nage kagak, maale nogo obaga mbo namburogo nappereegerak.

³⁷Nappege mbareegi, at ayeloman nogo maale namburik wambeegim taa'nogo awo ari nage me, at Yonatan nogo nen oone nggwok paga yoge logonet, “Wulaga yi wae. Maale namburik nogo ti, o ndaanda aru time nappigirak nogo lek a?

³⁸Time wonage me, puk arugun o. Mbet-mbet wa nak o.” Yoge mbareegi, ayeloman nogo nen maale nogo wonok ogoba Yonatan iri wagagerak.

³⁹At ayeloman nogo ti, “Yi nonggop nduk eeke?” mbarulik kwe, Yonatan Ndawut imbirak mban ineenu wonogogwaarak.

⁴⁰Maale nogo Yonatan iri wage mbareegi, Yonatan nen at ayeloman yoge, “Yigin maale yi, wonok kiyokan o kota time nak o.”

⁴¹Yoreegerak wage kagak, Ndawut yugum lunik ambo'me o ame pa'nggwe nen wundi wage nagagerik, Yonatan owagam endobanggun yindumbunuk, ne kenagan paga etenggen nggween paga wanduk yagak eeke nagagerik, imbirak linggik-kambuk yogo logonet, le yereegwaarak. Le yogo logonet, at Ndawut nogo perak, iniki abu puru agan nagak mban eeke mbareegi, le nggwok yereegerak.

⁴²Le ari mbareegi, at Yonatan nogo nen Ndawut yoge logonet, “Kat nimbirak niniki-kiniki kunik eeko logowok o, yinuk, at Aliku ALA endage kumbunuk, wone mbanggoorak nogo ti, at Aliku ALA enggaanom paga yogoorak me, at nen ninenggali wappinanege logukwak, kat inom, an inom, kat kapuri ndaganabemenggendak inom, an napuri ndaganabigin inom, mondok-mondok porogo logowok o,” yinuk, yogo nogogwaarik, Ndawut nogo ambime nage kagak, Yonatan nogo ame kota nogome wagagerak.