Read Western Dani 1 Tamuwen 21 Bible Online

1 Tamuwen 21 - Western Dani bible

1 Tamuwen 21

¹ At Ndawut nogo aap Ala unde endage Akimelek o Nop wonage me ka nagagerak. Ka nage mbareegi, at Akimelek nogo aganak nugirit ka wungge logonet, at yoge, “Kat aap ambi kinom lek kalik mban yime nonggop nduk wagan o?”

²Yoge mbareegi, at Ndawut nen wone onggo Ala unde Akimelek nogo yoge logonet, “At ninowe endagembogut nogo nen ambi eeke logokit nduk, noba paninuk, yo'nege logonet, Kat unde eeppagagirak nogo eebe eeke logonet, aakumi ineenu eeppiyoorak mage o, yinuk, yo'negerak me, an yokkiriyak meek o. Ata, ninom eeriyak nawuri, O ndime ninom lambunuwok o, yinuk, inaa'nduk nappiigirak me, wogoroorak nduk, kat nano mendek wonage o? oroti 5 ilik, nano mendek ambi wonage kero, wo'niru o.”

⁴Yoge mbareegi, at Ala unde Akimelek nogo nen Ndawut yoge, “An oroti wee'lek mendek ambi wonage abu lek kwe, oroti Ala ake pugu leenak mban wonage me, kawuri kumi inom lambunggulik kenok, wogora nanok nduk, wokkiriyak op aret o,” yoreegerak.

⁵Yoge mbareegi, at Ndawut nen ari logonet, “Nit wim eeri wunggo logonet, kumi ninom lambungga'lek kagak, wim eeri nogo monggoorak me, yogondak ti, lambungga'lek aret ogoorik o. Wim ugun eeko logonet, nawuri ninom maluk ninoba lenggenak lek abu obeelom logonet, eeko monggoorak me, yogondak ti, ambi alik lombok eeriyak ninoba pinanegerak wonage me, nineebe abunuk maluk ninoba lenggenak lek obeelom aret ogoorik o.”

⁶ Yoge mbareegi, at Ala unde nogo nen oroti Aliku ALA wonage mbaruwak nduk, ake kii'me pugu leenak Aliku ALA awooliya wurik me enggaanom paga wonage nogo, waganogo alik me pege nagaatik, oroti ngget worarak obaane'me pege menggerak me, oroti wee'lek mendek lek kenok, kii'me alik me pugu nogo aret waganogo Ndawut wogoreegerak.

⁷At Tawun aanggumi ndegeninako menggaarak inowe Tawun awot endage Ndowek awi Erom mendek nogo nen ambi eeriyak nduk, Aliku ALA awooliya wurik me nagagerak ti eyom paga time aret wonagagerak.

⁸Ndi, at Ndawut nen Akimelek yoge logonet, “Nogoba o. At ninowe endagembogut nen wone eeriyak yo'negerak nogo koorok panggok ari mbaki, nawooluwak inom, neegin-nomaale inom, li'luk eekko'nok lek we aret wagarak me, an wonok naakit nduk, tege wooluwak ilik, paloowi a, yime ambi wonage ilik, lek a?”

⁹ Yoge mbareegi, at Aliku ALA unde nogo nen Ndawut yoge, “Ti mendek yime wonage lek o. Ata, kat o Ela kobappaga time aap Pilitin mendek Nggoliyat wareegindak obaloowi nogo, yum agale warak epod wonage ambo'me taati yum paga perenogo pigirak ti mban aret wonage me, kat ti aret woorak mbakendak kenok, aret wamen o.” Yoge mbareegi, at Ndawut nen, “Paloowi togop mendek ambi wonage lek me, ti aret wo'niru o,” yoreegerak.

¹⁰Ne ti eyom paga aret Ndawut nogo at Tawun nen wake kero, mbaganit aap o Nggat mendek inowe endagembogut Akit wonage me ka nagagerak.

¹¹ Ka nagagerak me, it aap Akit awuri inom eekwi nogo nen inowe endagembogut nogo yogo logonet, “Iterali inowe endagembogut aap Ndawut yi aret nogo lek a? It kumi Iterali mendek nen ndawi kwirabik-kwirabok yogo logonet, Tawun nen ninawim apit negen inookerak kwe, At Ndawut nen inookerak nogo perak, ineenggi lingginiyak abu meek aret o, yinuk, ndawi anep pogo menggaarak nogo, at yi aret lek a?” yoreegerak.

¹² Wone yogwe nogo at Ndawut liippege nagagerik, iniki piirik logonet, aap endagembogut o Nggat mendek Akit eebe paga agabiti ambik agagerak.

¹³ Agabiti age mbareegi, at Ndawut nogo, it aakumi ti, inom wonage logonet, inenggaanom paga pilit-pilit kumili negen ari logonet, ambe amburu nggaru-nggaru amboro paga wangge kagak, tunggambe paga eenggabit kobo-kobo eeke kenok,

¹⁴at aap endagembogut Akit nogo nen awuri yorage, “Aap yi, kumili kunik kagak, liippega'lek logonet, nonggop nduk an nowagam wonok wogotak?

¹⁵Aap kumili kunik an wonage me yime ambi wonage lek, yogonok, aap iniki mbanak yi, wonok wogotak ya? Aap yogobi mendek an name nimbirak logorak op mbakop?” yinuk, yoragagerak.