Read Western Dani 1 Tamuwen 22 Bible Online

1 Tamuwen 22 - Western Dani bible

1 Tamuwen 22

¹ Ti'nuk, at Ndawut nogo o Nggat mbo punuk, o Arulam ndoome time aret kumaa'nari nagagerak wonage me, at owe-awot inom, agalo-ogoba inom menggaarak inom, nen at time wonage inaruk konembunuk ka nogogwaarak.

²Ndi, it aakumi wone ambi inoba age kenok, iniki piirik wonogwe nogo mendek inom, inanomat mbanak mendek inom, iniki ale-pale aago mendek inom, it aap togop mendek kero mban, ineebe lambunik empat ratus negen at wonage me kuwak ari nogo nogogwaarak iigak, at Ndawut nogo inowe a'nuk, wonagagerak.

³Wonage logonet, ne ambi paga at Ndawut nogo ndoome nogome nen o Mowap yaga'lelo Mitapa nage nagagerik, aap Mowap mendek inowe endagembogut yoge logonet, “At Ala nen an eeriyak nombake nogo yo'niruwak nduk, tokkage neegak, an nagalo-nogoba kat kinom logorak piya woroorak nduk, yokkiri wagi o.”

⁴Yoge nagagerik, wogoren aap endagembogut Mowap mendek owagam piya nanuk, ndo yugum pak wurogo pereegim nogome ari wagagerak wonage kagak, agalo-ogoba aap endagembogut nogo inom aret wonogogwaarak.

⁵Wonogwe iigak, aap Ala nen yoge kagak yoraga endage Nggat nen Ndawut pekka nage nagagerik, yoge logonet, “Kat ndo yugum pak wurogo pereegim yime logogun o. Aakumi Yekura iname time nak o.” Yoge mbareegi, at Ndawut nogo eyonggaame o Keret time nagagerak.

⁶At Ndawut awuri inom time wonogwe nogo, at Tawun konengge nagagerik, puut endage Nggibeya eyo tamarika alom me time awooluwak eenggime kwi'ndak logonet, at awuri inom eeko menggaarak nogo, owagam yendok-wandok aago wonogwe nogo yorage logonet,

⁷“Kit aap Mbeniyamin mendek yi, kinaruk koneninip o. Aap Itayi aput ti nen yabu aago inom, anggur awi yarak inom, wokkiraagin mbakop? Kit aap ineegin warak ineebe seribu a, 100 a, inoweewi wim lenggangga logomunggup nduk, kit abok aret mippinagagin mbakop?

⁸Alom ti paga kit abok aret kiniki ambit eeppunuk, an tebenogo paniyak nduk, eekwi nogo lek a? An naput Yonatan nen Itayi aput imbirak wone nggaruk togon kumbuk mbanggwi, ndi, yogondak Ndawut enaarak wonage nogo ti, an naput nen, Nogoba warenok nduk, enaarak logot o, yinuk, an lombok nayeloman inikime pege, eekerak nogo, an nabuwa nen yo'niriyak op aret kwe, yo'nega'lek ti, nonggop nduk, ogotik?”

⁹ Yorage mbareegi, aap Erom mendek endage Ndowek nogo, Tawun inom yabu eeko menggaarak inom mi'ndak taati wonage logonet, Tawun yoge, “At Ndawut nogo aap Akitup aput Akimelek ame o Nop nogome wagaarak me,

¹⁰at Akimelek nogo nen Ndawut ake at Alik ALA yoge nagaarik, mbi kambu inom, aap Pilitin mendek Nggoliyat obaloowi nogo inom, wogoge kagarak o,” yinuk, yoreegerak.

¹¹Yoge mbareegi, aap endagembogut Tawun nogo nen aap Akitup aput Ala unde Akimelek nogo inom, owe-awot o Nop paga Ala unde wonogogwaarak nogo inom, woraawak nduk, wiirage mbareegi, abok aret at owagam wogo mbareegwa,

¹²Tawun nen at Akimelek yoge, “Kat Akitup aput yi wae. Wone yokkege yi, karuk liirogon konenu o.” Yoge mbareegi, at Akimelek nen, “Yo'niru o, nogoba.”

¹³Yoge mbareegi, Tawun nen at yoge, “An tebenogo panubagip nduk, at Itayi aput kimbirak kiniki ambit a'nuk, oroti inom, paloowi inom, wogoge, at ake Ala yoge, eekendak ti paga nimbirak eeke logorak eebi mba'nuk, o yogondak noorikit nduk, enaarak wonage ti, nonggop nduk, eekendak o.”

¹⁴Yoge mbareegi, at Akimelek nen aap endagembogut nogo yoge logonet, “At Ndawut iniki kwi'ndak abu li'lak eeke menggerak togoti ambi it kinom eeke menggendak inenggela'me wonage mbaken? At nogo ti, kat karugelo aret. Ndi, it karum waka inowe at aret me, kat kame menggaarak abok aret, At iya o, yinuk, endage tiyappugwi nogo lek a?

¹⁵Ndi, an nen at ake Ala yogirak nogo ti, we yogondak yi mban eekirak mbaken? Lek o. Eeke minggirak aret me, wone alom yi agaarak nogo ti, an kayeloman neenggo'lek aret me, kat ninogoba kendagembogut nen kayeloman an inom, nowe-nawot inom, wone yi ninoba lenggenugun o,” yinuk, yoreegerak.

¹⁶Yoreegerak kwe, aap endagembogut nogo nen Akimelek yoge logonet, “Lek o. Kat kowe-kawot kinom abok aret kinooriminggirak kambumunggup o.”

¹⁷Ari nagagerik, awuri at arum waka koorok taati mi'ndak wonogwe nogo yorage, “Aap Aliku ALA unde yi nen Ndawut inom a'nuk, at eebe mbaganit nege nogo, ineenu logonet kwe, an yo'nugwi lek me, kit nen mondok aret inoo'nip o.” Yoragagerak kwe, at awuri nogo nen aap Aliku ALA unde mendek nogo inooriyak ineebi nen puk ogogwaarak.

¹⁸Puk ogo mbareegwa, at Tawun nen Ndowek nogo yoge, “Kalik nen mban aret inoori omok o.” Yoge mbareegi, at Ndowek nogo wage nagagerik, inoorogo piyareegerak. Ne ti eyom paga inoorogo piyareegerak nogo ti, it aap yum agale warak epod yiriko menggaarak nogo ineebe 85 aret.

¹⁹Inoorogo piige nagagerik, it aap Ala unde menggam o kota Nop nogome nage nagagerik, kumi-aap inom, wologwe-komologwe inom, elege awo yilak nunggwi inom, inaanggumi tapi-keledai inom, kambin-ndomba inom, apit tigitogon aret wooluwak paga inoorogo piyareegerak.

²⁰Inoorogo piige kagak, aap Akitup ombooluk Akimelek aput Abiyatat nogo kole mbaganit at Ndawut inom a'nuk, nege logokit nduk, Ndawut ka nage nagagerik, yoge logonet,

²¹“At Tawun nen it Aliku ALA unde abok aret inookerak o,” yinuk, Ndawut yoge mbareegi,

²²at Ndawut nen Abiyatat yoge logonet, “An kiniya nagarak nogo eyom paga at Erom mendek Ndowek time wonage nenegen kage nagarik, Aap yi nen aret Tawun yorigin, kagi, mbakirak me, kat kagalo-kogoba inom, it inom menggaarak nogo inom, abok aret inookerak ti, aaninggin an noba aret wonage o.

²³Togop aret me, aap kat kooriyak ari ti, an kunduk nooriyak aret ari me, nimbirak logonet, kagap ndarak logomunggun me, kagabiti mbarugun o,” yinuk, yoreegerak.