Read Western Dani 1 Tamuwen 26 Bible Online

1 Tamuwen 26 - Western Dani bible

1 Tamuwen 26

¹ Ne ambi paga it aap Tip mendek nen Tawun o Nggibeya wonage me, wogo nogogwaarik, at Tawun yogo logonet, “At Ndawut nogo o karume nakkagak puut Akila time kumaarak wonage o.”

²Yogo mbareegwa, at Tawun nogo mbet-mbet aret aakumi Iterali mendek wim nambuka kero ineebe tiga ribu leeninake nagagerik, Ndawut kwaaruwok nduk, wogoren o Tip karume time wambi nogo nogogwaarik,

³o karume nakkagak puut Akila tu ambet paga taati inawooliya wuppatinuk wonogwe iigak, at Ndawut nogo o karume time aret wonagagerak. Wonage logonet, Tawun awuri inom mugurok nogogwaarak karume wonogwe konengge nagagerik,

⁴“Tawun awuri inom abet aret wagaarak wonogwe ilik?” yinuk, inigen yomboppiyaawak nduk, nappiya wagagerak wogo nogogwaarik, abet aret wonogwe iinok, Ndawut yori nogogwaarak.

⁵Yori nogo mbareegwa, at Ndawut nogo Tawun awuri inom inawooliya wuppunuk wonogwe me, enegen wu'nari wage nagagerik, at Tawun inom, aap Tawun awuri ineegin warak inowe aap Net aput Abenet nogo inom, ooliya oolo wurik me time windak iigak, it aap ineegin warak nogo, inawooliya endekem yendok-wandok wurik me wonogwe iyareegerak.

⁶Iige nagagerik, at Ndawut nen aap o Ket mendek endage Akimelek inom, kwe Teruya aagaluk aap Yowap oreeluk Abitayi inom, yorage logonet, “At Tawun awooliya wurik me ta nimbirak wambi noorak?” Yorage mbareegi, at Abitayi nen, “An nimbirak aret wambi nawok o.”

⁷Yoge mbareegi, oonikiya at Ndawut imbirak Tawun awuri wim nambuka inawooliya wurik me time wambi wogo nogogwaarik, at Tawun awuri nogo inawooliya yendok-wandok aago endekem nggwe wurik iigak, at Tawun awooluwak nogo anobak me yindumbunuk, awooliya oolo wurik me nogo yege kagak, Abenet awuri inom yendok-wandok eeppunuk, nogo yugwi,

⁸iigo nogogwaarik, at Abitayi nen Ndawut yoge, “Ala nen kat kawim o yogondak oonikiya yi paga keenggime pagagerak me, an nawooluwak yi paga eebe ne mbere lek ne ambit mban nggween inom mondok polok togon warikit nduk yo'niru o.”

⁹Yoreegerak kwe, at Ndawut nen ari logonet, “At Aliku ALA nen leenogo piige kenok amburu eeppiigaatak aap ambi nen wake kenok, aaninggin oba arigin lek ti lek, arigin aret me, wariyak mage o.

¹⁰At anggok a'nuk kambigin ilik? Wim eeke me warugun a? At Aliku ALA nen mban eeppigin, abet aret mbake logonok nduk, at eenik menggerak Aliku ALA endage kumbunuk, yokkigi o.

¹¹ Togop aret me, at Aliku ALA nen leenogo pereegerak amburu eeppugu nogo, an nen wake neyo, Aliku ALA nen non mbambanege logowak o. Awooluwak inom, agiiwak inom, anobak me wonage nogo, ti mban waganggo logomonggoorik, nawok nduk, waawok o.”

¹²Yoge nagagerik, at Ndawut nen Tawun awooluwak inom, agiiwak inom, anobak me wonage nogo wonok nagagerak. Ndi, wonok nagagerak nogo ti, Aliku ALA nen Tawun awuri inom nogo pili yuwak nduk, eeppiyareegerak me, it ambi nen ineenik ogwe, inigen kogwe, ineenu ogwe, eerulik aret o.

¹³At Ndawut nogo Tawun awooluwak inom, agiiwak inom, wonok o kobappaga wunda nanuk, puut ogobak paga tayorogon taati puk ari nage nagagerik,

¹⁴Tawun awuri wim eeka inom, aap Net aput Abenet inom, oone nggwok paga yorage logonet, “Abenet wae. Kat an noone konengge agandik ilik, lek a?” Yoge mbareegi, at Abenet nen, “Kat ta nen aap endagembogut i'mbanege agandik o?”

¹⁵Yoge mbareegi, at Ndawut nen onggo yoge, “Abenet wae. Kat aap aret nogo lek a? Ndi, Iterali inenggela'me nen abu wakaa'ngget kat kokwak ta o? Togop aret kwe, kat nonggop nduk kowe endagembogut liirogon arum warulik eekendak? Aap ambi kat kowe endagembogut wariyak nduk, oonikiya kinawooliyana unggwi wage kagandak ilik, lek a?

¹⁶At Tawun awooluwak inom, agiiwak inom, anobak me wonage menggerak nogo wonage ilik, lek a? Pekket! At Aliku ALA nen leenogo pereegerak amburu eeppugu kogoba nogo, arum logonok nduk mippagagerak kwe, liirogon arum logolik ti, maluk aret eekendak me, kat kawuri kinom aret kinagap mbugunggologotak abet aret mbarenok nduk, at eenik menggerak Aliku ALA endage kumbunuk, yokkigi o.”

¹⁷At Tawun nogo Ndawut oone ari aret konengge nagagerik, “Kat naput Ndawut koone aret a?” Yoge mbareegi, at Ndawut nen Tawun yoge logonet, “E o, nowe kendagembogut. Ti an noone aret o.”

¹⁸Ari nagagerik, “An maluk nano eekirak. Ndi, maluk ngge eeriyak koongge me, an kayeloman mu'neren-ma'neren nege agandik?

¹⁹Nowe kendagembogut an kayeloman noone yokkege yi, konengge logot o. At Aliku ALA nen aret an nooriyak nduk, wone kinikime pege kenok, at Aliku ALA ake warogo wogoge obari ogobak me nage kenok, iniki yanggok yuwak nduk, warogo wogoru o. Ndi, aakumi nen nooriyak nduk, wone kinikime mambugwi iinok perak, Ala obaane'me kugi eerit nogwe nogo, Kinom aret eerit nage logot o, yinuk, yogwe ti paga at Aliku ALA yate kwak nggween mbanak wo'nireegim nogome nen mugogo wumbanugwi me, Aliku ALA nen it aret pulunogo piyaagin o.

²⁰Togop aret me, aap ambi towe wonde wariyak nduk, eyonggaame puurom kwaarit nege menggi kwak, an nggeewo abi kwak neegak, kat aakumi Iterali inowe kendagembogut nen aret nooriyak nduk, kwaa'nabit nege me, namiya nggween paga nda wambuurak lek o. Ata, Aliku ALA awooliya wurik me enggaanom paga aret wambuwak o,” yinuk, yoreegerak.

²¹Yoge mbareegi, at Tawun nen ari logonet, “Ai, Ndawut naput o. An eekkabit nege nogo ti, wi negen maluk lombok eekkabit nege abet aret kagi o. Kat oonikiya yi aret nooriyak kwe, Nogoba me, wariyak meek o, nomba'nuk, teppanegendak me, an nen peebi koorigin lek aret me, niname nawok o.”

²²Yoge mbareegi, at Ndawut nen yoge logonet, “Kat kawooluwak wonage yi, wa lagi woraawak nduk, wulaga ambi nappi lagi mok o.

²³It aap abe koonak li'lak eeko menggaarak kero, at Aliku ALA nen onggo obeelom eeppiige menggerak me, at Aliku ALA nen oonikiya yi paga kat keebe waganogo an neenggime panegerak kwe, At Aliku ALA nen leenogo pereegerak amburu eeppugu me, yinuk, an koorulik teppagagirak o.

²⁴O yogondak yi paga an nen, Nogoba aret me, yinuk, kat koorulik keenik teppagagirak ndak-ndak, an maluk noba age kero, at Ala nen, Naput aret me, yinuk, nagap ndarogo nili yuwak o,” yoreegerak.

²⁵Yoge mbareegi, at Tawun nen Ndawut yoge, “Naput o. Ala ale'nggen koba logogin o. Ale'nggen koba pemenggerak paga abok aret eerit nage keegak, a'me nggilik-nggelok arit nage logogin o,” yinuk, yoreegerak. Yoge mbareegi, at Ndawut nogo nage kagak, at Tawun nogo ame aret wagagerak.