Read Western Dani 1 Tamuwen 27 Bible Online

1 Tamuwen 27 - Western Dani bible

1 Tamuwen 27

¹Tawun ame wagagerak wonage kagak, Ndawut iniki koongge logonet, “Ne ambi paga at Tawun nen nenggaawak lek eerogo panigin aret me, Iterali inenggela'me kwaa'nabit nege logonet, pi'nake kero, an mbaganit it Pilitin iname naminggirak ninom wonage neegak, op aret logogin,” mbake nagagerik,

²at Ndawut nogo awuri ineebe enam ratus inom o kota Nggat mendek inowe endagembogut aap Mowak aput Akit wonage me ka nogogwaarak.

³Ka nogo nogogwaarik, Ndawut awuri nogo inalitak inakuwi-inapurilogwe inom, at Ndawut nogo akuwi mbere ambi Yiteren apuluk Akinowam, ndi, ambi aap Naban togwe waganeegerak kwe awi Karemen mendek Abigayin nogo imbirak inom, o Nggat aap Akit inom time aret ye mbambatinuk, wonogogwaarak.

⁴“At Ndawut mbaganit o Nggat time nagaarak o,” yinuk, Tawun yoreegwaarak mendek, mugurok noolik puk agagerak.

⁵Ti'nuk, at Ndawut nen aap Akit nogo yoge logonet, “An kayeloman o kota abe kat unde menggenom yime nimbirak nonggop togon logorak? Meek aret me, kat nabuwa nomba'nuk, an logorak o kota mbuuluk nggween kobappaga ambi wonage kero, kuli mbanogo wo'niru o.”

⁶Yoge mbareegi, ne ti eyom paga aret aap Akit nen o tini Tikalak nogo at Ndawut aret kuli mbanogo wogoreegerak. Wogoreegerak me, o ti, it Yekura mendek aap inendagembogut kero, unde ogogwaarak yogondak kuli wonogwe o.

⁷Ndi, at Ndawut nogo it aap Pilitin mendek inanggween paga time wonage kagak tahun ambit eeppunuk, tut kenagan eneneegerak.

⁸It aakumi Nggetut mendek inom, Nggiriti mendek inom, Amalek mendek inom, it aap inanebunu ti mendek ti, maan o Tiyut kuli nen nok-nok, o Metit kuli inawi nenaarogo wuppatinuk wonogwe nogo, at Ndawut awuri inom inawi paga kwi'nari unggunuk, ineebe inoorogo piinet nogo nagaatik, inamendek ndinggologo nogogwaarak.

⁹Ti eerit nogo logonet, aap inom, kumi inom, ineenik ambi teppiigo logolik tigitogon inooko logonet, inaanggumi tapi-ndomba inom, keledai-unta inom, inayum inom, apit aret waganggo nagaatik, iniyokan aap Akit wonage me ka wogo nogogwaarak.

¹⁰Ka wogwe iinok, at Akit nen Ndawut yoge, “O yogondak nggeeme yigirogo piinok, wagan?” Yoge kenok, at Ndawut nen, “Karume nggwok o ame pa'nggwe aakumi Yekura iname a, karume nggwok aakumi Yeramen mendek iname a, karu nggwok aakumi Keni mendek iname a, nogome yigirogo piinok, wagi o,” yinuk, yoge nagagerak.

¹¹Ti eerit nege logonet, “Aap ambi eenik teppege neenok, at nen ninabok wonok o Nggat time yora nookwak,” mba'nuk, aap inom, kumi inom, ambi teppiige logolik tigitogon inooke nagagerak. At Ndawut aakumi Pilitin mendek inom logonet, togop aret eeke nagagerak.

¹²At Ndawut nen togop aret yori wagak eeke kenok, at Akit iniki mbake logonet, “At Ndawut anebunu Iterali mendek nogo nen Ndawut eerit nage paga mondok ineebi ombako logonet, ogole yogwe me, at Ndawut ti, an nayeloman mondok-mondok aret logogin kagi,” yinuk, eerit nage logowak nduk, oba pereegerak.