Read Western Dani 1 Tamuwen 28 Bible Online

1 Tamuwen 28 - Western Dani bible

1 Tamuwen 28

¹Ne ti eyom paga it aap ineegin warak Pilitin mendek nogo Iterali inom wim namburiyak nduk, li'luk eeko mbareegwa, at Akit nen Ndawut yoge, “Kat kawuri inom, an nawuri inom, lambumbunuk, Iterali ninom wim eeri noorak aret mbake logot o.”

²Yoge mbareegi, at Ndawut nen, “Nambukwi paga mban an kayeloman eeke neyaamunggun o.” Yoge mbareegi, Akit nen onggo ari logonet, “Ti kenok, kat nen neebe narum mondok logonok nduk, mippagagi o,” yoreegerak.

³At Tamuwen nogo kangge mbareegi, it aakumi Iterali mendek abok aret at ame lombok o kota Arama time aret nggween taambugwi, ndi, at Tawun nen it aakumi tili pagangga inom, aakumi inogoma wiiraga inom, Iterali inenggela'me nen mugogo wumbiige, eereegwaarak kagak,

⁴ne ambi paga it aap Pilitin mendek nen wim eeruwok nduk, o Tunem koorok time inawooliya wukkola wogo mbareegwa, at Tawun kunduk awuri Iterali mendek abok aret kuwak eeppiige nagagerik, puut Nggilobowa time aret inawooliya wukkola nogogwaarak.

⁵Wuppunuk logonet, at Tawun nogo aakumi Pilitin mendek ineegin warak nogo enegen iige nagagerik, agabiti nen aganak ambik wareegerak.

⁶ Wake mbareegi, at Tawun nen, “At Aliku ALA ambi yo'niruwak,” mba'nuk, nggino yoreegerak kwe, at Aliku ALA nen onggo abi paga inom, yugum Urim paga inom, aap Ala nen yorage kagak yoraga paga inom, wone ambi abu yorulik.

⁷Yoga'lek mbareegi, at Tawun nen awuri inom eeko menggaarak nogo yorage, “Kwe ambi aakumi inogoma wiiraga owagam ka nage neenok, at nen wone ambi yo'niruwak nduk, kwaari nanip o.” Yorage mbareegi, it nogo nen, “Kwe inogoma wiiraga ti mendek ambi o Endot wonage o,” yoreegwaarak.

⁸Yogo mbareegwa, at Tawun nogo aakumi yelok kookwak nduk, mbogoyum alik mendek yippunuk, oonikiya aret aap mbere inom kwe nogo ka nogogwaarak. Ka nogo nogogwaarik, at Tawun nen kwe nogo yoge, “An nen aap ambi endage ari neenok, kat kagugi nen kin eeppi woraawak nduk, wiiru o.”

⁹Yoge mbareegi, kwe nogo nen Tawun yoge logonet, “At Tawun nen eekerak nogo kat keenggo'lek a? It aap tili pagangga inom, aakumi inogoma wiiraga inom, lek eerogo piyareegerak nogo keenu aret kwe, pagi ta'na pugume wake menggi kwak, an nooriyak, mba'nuk, nonggop nduk, eeke agandik?”

¹⁰Yoge mbareegi, Tawun nen at yoge logonet, “Kat yi eeke paga, Aaninggin ambi noba arigin mondok lek, abet aret mbarenok nduk, at eenik menggerak Aliku ALA owak o,” yinuk, kumbuk mbaneegerak.

¹¹Kumbuk mbangge mbareegi, kwe nogo nen, “Kat kake ta ogoma wiiri?” Ari mbareegi, Tawun nen, “Tamuwen aret neya woraawak nduk, wiiru o.”

¹²Yoge mbareegi, wiireegerak kin age mbareegi, kwe nogo nen at Tamuwen aret enegen kage nagagerik, oone nggwok paga Tawun yoge logonet, “Kat Tawun aret kagak, nonggop nduk nambokan laganggendak?”

¹³Yoge mbareegi, at endagembogut Tawun nen kwe nogo yoge logonet, “Kagabiti mbarugun o. Kat kenegen ngge kage agandik?” Yoge mbareegi, kwe nogo nen, “Kugi ambi nggween enoona nen wundi wage kagi o.”

¹⁴Yoge mbareegi, Tawun nen, “Enete nonggop negen kagan?” Yoge mbareegi, kwe nogo nen, “Aap anggok iluk me, ayum nggorek yirik wundi wage kagi o.” Ari mbareegi, at Tawun nen, “Ti Tamuwen aret kagi,” mbake nagagerik, endobanggun yindumbunuk, etenggen wanduk nggween paga ngginnagagerak.

¹⁵Ngginnage mbareegi, at Tamuwen nen Tawun yoge logonet, “Kat nonggop nduk, Keebe kin aru, yinuk, wii'nege logonet, piya'nake agandik?” Yoge mbareegi, at Tawun nen Tamuwen yoge logonet, “Ala nen an mbo panege mbaki, aakumi Pilitin mendek ninom wim nambukwi paga an niniki ma'nagagerak wonage logonet, it aap Ala nen yorage kagak yoraga paga inom, nabi paga inom, yo'niruwak nduk, yogitak kwe, yo'nega'lek mban kenok, nogoba kat nen an eeriyak yo'nenok nduk, wiigigirak o.”

¹⁶Yoge mbareegi, at Tamuwen nen yoge logonet, “At Aliku ALA kimbirak kawim keenok, mbo pagareegerak kagak, an nonggop nduk kin wo'nege agandik?

¹⁷ Aliku ALA nen, Aap Tawun ndogop eeppigin o, yinuk, yo'nege mbareegi, yokkireegirak nogo ndak-ndak, eeppagage logonet, kat kendagembogut logonet, aakumi Iterali inarum menggendak nogo, muk ndinogo koreeluk Ndawut aret wogoreegerak o.

¹⁸ At Aliku ALA anini kani kunik negen age logonet, Aakumi Amalek mendek ndogop inoba piyaagin o, yinuk, koonogo yokkereegerak nogo konengga'lek mbo pereegindak ti paga Aliku ALA nen o yogondak eeppagage yi aret o.

¹⁹At Aliku ALA nen kat inom, aakumi Iterali mendek inom, abok aret waganogo aakumi Pilitin mendek ineenggime piyamenggerak paga, ko'lu kat Tawun nogo kapuri kinom kinogoma an wonage me ninom aret wonogwe kiyaagin o. Ndi, it kawuri ineegin warak kunduk, togop mban ineenggime piyaagin o,” yinuk, yoreegerak.

²⁰Ne ti eyom paga o kuubondendok nen nok, oonikiya kuli, at Tawun nogo mbi abu noolik me, eebe lebenak eereegerak wonage me, at Tamuwen wone yoge nogo, aruk konengge nagagerik, agabiti nen kweyak togon nggween paga oone ndu ngginnagagerak.

²¹Ngginnage nagagerik, at Tawun ogut nggigik togon wungge logonet, iniki ma'nagagerak wonage kwe nogo enegen kage nagagerik, yoge logonet, “Nogoba wae. An kayeloman yi, eeriyak nggino yo'negendak nogo konembunuk, neenik nili yikkoloolik kat kake aret eekirak me,

²²an kayeloman noone yokkege yi, konenu o. Mbi nengge logomenggendik, komaawi eekko'nok kat noorak mbakenom time aret nanok nduk, mbi ambi wokkiriyak op aret ilik?”

²³Yoreegerak kwe, at Tawun nogo nen, “Mbi noorak neebi o.” Ari kagak, kwe nogo inom, Tawun inom eeko menggaarak nogo inom, nen yogo logonet, “Mbi namen o,” inoone nambeerit yogo mbareegwa, at Tawun nogo, “E o,” ari nagagerik, mi'na'nuk, eyo kwi'nogo menggaarak ndoonak paga kwi'nagagerak.

²⁴Kwi'nage mbareegi, kwe nogo tapi aagaluk piirigalo ambi ame wonage me, mbet-mbet wake nagagerik, mbanogo lake, ndi, gandum anggen yigirik waganogo amok mbanogo oroti piiruwak nduk, pugwi nogo mendek pega'lek kagak worake, eeke nagagerik,

²⁵Tawun awuri inom nawak nduk, wogorage mbareegi, nonggo nogogwaarik, oonikiya ti eyom paga aret wogogwaarak.