Read Western Dani 1 Tamuwen 5 Bible Online

1 Tamuwen 5 - Western Dani bible

1 Tamuwen 5

¹It aakumi Pilitin nen Ala aloobut mbanak nogo aakumi Iterali wonogwe me nen ndininuk, o Eben-Kayetet nen wonok iname o Atorot pi nogogwaarak.

²Pi nogo nogogwaarik, inagugi Ndagon awi wurik me nogome mambunuk, inagugi Ndagon eraaninu peenok taati kwippereegwaarak.

³Kwippogo nogogwaarik, nogo yinuk, ko'lu kuubondendok, aakumi Atorot mendek nogo nen inagugi awi wurik nogome pekka unggwogo nogogwaarik, inagugi Ndagon nogo at Aliku ALA aloobut mbanak enaame enete wanduk nggween paga ngginnagagerak wonage kogogwaarak. Kogo nogogwaarik, obaane'me mippereegwaarak kwe,

⁴nogo yinuk, ko'lu kuubondendok pekka wogo nogogwaarik, Aliku ALA aloobut mbanak enaame ambinom enete wanduk nggween paga ngginnage logonet, eebe longgo warak mban taati kagak, eenggi anobak kalenogo tunggambe paga mbo nappi wagagerak kogogwaarak.

⁵Ti eereegerak mbareegi, it aap inagugi Ndagon unde inom, it aakumi alik mendek inom, inagugi Ndagon awi wurik me, o Atorot wonage nogome unggwi wogo logonet, inagugi eenggi anobak kalenak tungga paga wambeegim taa'nogo iniyok mbaanggokwak nduk, obaga mbo unggwi wogo nogogwaarak me, yogondak kuli togop eekwi wonogwe aret o.

⁶Ndi, at Aliku ALA nen aakumi Atorot mendek inom, inawi inaagan-ambokan wonogwe nogome inom, abok aret aaninggin inoba piige logonet, inawin ineebe paga piirik-kunik eerogo piige, inawi paga maluk mendek eerogo pege, eeke nagagerak.

⁷Ndi, aap Atorot mendek nogo nen aaninggin-paaninggin inoba piige nogo kogo nogogwaarik, yogo logonet, “Iterali inogoba Ala nogo nen nit nineebe paga inom, ninagugi Ndagon nogo paga inom, aaninggin-paaninggin eerogo ninoba pinanegerak me, it Iterali inogoba Ala aloobut mbanak ti, nit yime ninom logorak mondok lek nappuwok aret o.”

⁸Yogo nogogwaarik, aakumi Pilitin mendek inoweewi inendagembogut woraawak nduk, wiirogogwaarak kuwak ari wogo mbareegwa, wone yorogo logonet, “Iterali inogoba Ala aloobut mbanak yi, nonggop eeruwok o?” Yogo mbareegwa, it aap inendagembogut nogo nen yorogo logonet, “Aakumi Iterali inogoba Ala aloobut mbanak yi, o Nggat aret pi nanip o.” Yorogo mbareegwa, Aliku ALA aloobut mbanak nogo o Nggat aret pi nogogwaarak.

⁹Pi nogo mbareegwa, at Aliku ALA nen aakumi o Nggat mendek aaninggin-paaninggin inoba piige logonet, wologwe-mbuulogwe nen nok, aap koleewak kuli, inawin piirik-kunik eerogo piyareegerak paga it aakumi time mendek nen, “Nano nen ee'ninake, ia!” yinuk, noone-koone agan nogo nogogwaarak.

¹⁰Noone-koone agan nogwe iinok, Ala aloobut mbanak nogo wonok o Ekoron time nappereegwaarak. Nappereegwaarak awo wonok unggwi nogwe iigak, it aakumi Ekoron mendek nen inoone nggwok yogo logonet, “Nit inom, ninapuri inom, apit ninooriyak nduk, Iterali inogoba Ala aloobut mbanak ninowagam pi wogwe yi, Nineebi o,” yogwe iigak,

¹¹inenggela'me pi nogo mbareegwa, at Ala nen aakumi o Ekoron mendek aaninggin-paaninggin mondok nggwok abu alik negen inoba piige mbareegi, aakumi apit aret kanggwi, kangga'lek teppiige nogo inawin piirik-kunik agago piige, eereegerak paga andi nen yobak-nggolak yogo logonet, inoone yereegwaarak mbogut polok ari mbareegi, inoweewi inendagembogut Pilitin mendek abok aret wiirogogwaarak wogo mbareegwa, yorogo logonet, “Nit inom, nit Pilitin mendek inom, ambinom ninoorukwak, aakumi Iterali inogoba Ala aloobut mbanak yi, yime nen aa'nduk wonage menggim iyokan aret pi nawak nduk, yoraanip ubi!” yinuk, yorogogwaarak.