Read Western Dani 1 Tamuwen 8 Bible Online

1 Tamuwen 8 - Western Dani bible

1 Tamuwen 8

¹Tamuwen abu anggok age nagagerik, at apuri wologwe nen aakumi Iterali inowak loonggo logowak nduk, mippiyareegerak.

²At apuluk manggu endage Yowen, ndi, awuluk endage Abiya. Imbirak o Mberetiyeba time logonet, inowak loongga wonogogwaarak kwe,

³inogoba eeke nagagerak nogo liirogon woppunuk eeko logolik. Ata, wu kolaawok nduk, aakumi inambokan laganggwi, wu wogorogwe iinok, inoone yaga-kaga eerogo abe inowak looninaka'lek teppiigwi, eeko nogogwaarak.

⁴Togop eeko mbareegwa, it aap Iterali mendek inoweewi nogo apit aret kuwak eeppunuk, Tamuwen o Arama wonage me ka wogo nogogwaarik,

⁵ at yogo logonet, “Ninogoba wae. Kat abu kanggok agandak keegak kwe, kapuri nogo kat eeke menggendak ndak-ndak eekwi lek me, it aakumi inanebunu alik mendek inoweewi inendagembogut inarum wonogwe ti pogom, nit ninowe endagembogut ninarum logowak nduk, aap ambi leenogo mippinanu o.”

⁶“Ninowe endagembogut ninarum logowak nduk, aap ambi leenogo mippinanu o,” yinuk, yoreegwaarak nogo, at Tamuwen konengge nagagerik, “It aap yogwe yi, ao!” yinuk, at Aliku ALA yoreegerak.

⁷Yoge mbareegi, at Aliku ALA nen at yoge logonet, “It aakumi Iterali ti, kat mbo pagulik o. An inenggela'me logonet, nendagembogut logorak ineebi nen mbo panegaarak me, it yokkugwi nogo, karuk konengge logomenggendik, aret eeppiyet o.”

⁸Yoge nagagerik, “An nen o maan aakumi Iterali o Metit nen wogoren wundi wagagirak kuli nen nok, yogondak kuli an mbo paninuk, nobaane'me alik mendek mugurok nogwe nogo ndak-ndak, yogondak kat mbo pagarak nduk, eekwi me,

⁹it yokkugwi nogo liirogon konengge logomenggendik, aap inowe endagembogut a'nuk, wone lengganogo yorage logonet, eeke logorak nogo ineenu aruwak nduk, liirogon mbininogo yoret o.”

¹⁰Aliku ALA nen Tamuwen yoreegerak nogo, at Tamuwen nen it aakumi, “Ninowe endagembogut mippuurak o,” yinuk, at yori wogogwaarak nogo, abok aret mbininogo yorage logonet,

¹¹“Aap endagembogut ambi mippugwi kiinok, kinarum logonet, eeke logorak nogo ti, yi aret o. At nen kinapuri abok aret wogonake logomenggerik, wim nambuko logowak nduk, eegu nggweendo paga nogo logorak koonogo piige, eegu nggweendo peebi nage kagak, eegu iniyok paga nggare agan inaa'nduk nogo logowak nduk, koonogo piige, eegu kuda paga yarugu nogo logowak nduk koonogo piige, eerigin o.

¹²Eeke logomenggerik, kinaput ambi it aap ineegin warak ineebe seribu inarum logowak nduk mippege, ambi ineebe 50 inarum logowak nduk mippege, eegu yabu eeko logowak nduk leenogo piige, eegu anggen mbanogo kuwak eeko logowak nduk leenogo piige, ndi, eegu yigin-maale wukwi, nggweendo wim eekak yuurak ogobakkigikwi, eeko logowak nduk, leenogo piige, eeke logogin o.

¹³Eeke logomenggerik, kinapurilogwe komologwe kenok, obari abe ineebe paga eeka nogo mendek at ake ogobakkigiko logowak nduk mippiige, ando lakak yuwak nduk mippiige, ando oroti worako logowak nduk mippiige, eeke logogin o.

¹⁴Aap endagembogut mippumonggotak ti nen kinambi yarak inom, anggur awi yarak inom, eyo tayitun awi yarak inom, abu obeelom kero, at mban unde age logomenggerik, awuri at inom eyabu eeko menggaarak nogo tumburirage,

¹⁵kinambi yarak inom, anggur anggen mbanak inom, 10 kuli wonage kenok nogome nen ambit nggigik eerogo aap at awuri inom yabu eeko menggaarak inom, aap at ake eeko menggaarak inom, nogo tumburirage, eeke logogin o.

¹⁶At eyabu eeppiigak yuurak nduk kit kinayeloman kumi-aap wogonake, kinaanggumi tapi-keledai abu obeelom kero mban wagangge,

¹⁷kinaanggumi kambin-ndomba 10 wonage kenok ambit nggigik eerogo at kolage, ndi, kit kineebe kunduk, at ayeloman ariyak mban eerogo pinagage, eeke logogin o.

¹⁸Aap endagembogut mippumonggotak nogo nen aaninggin-paaninggin togop aret eeppinagit wage ti eyom paga kit nen Aliku ALA yogo logonet, Aap endagembogut mippogoorak nogo nen yogobi eeppinanege me, yeenggwa niret o, yorumonggotak kwe, kinoone at Aliku ALA konenigin mondok lek aret mbako logonip o,” yinuk, yoragagerak.

¹⁹Yoragagerak kwe, it aakumi nogo nen, at Tamuwen oone ari koneniyak ineebi mbako logonet, “Ti yagandak kwe, lek o. Aap endagembogut ninarum logowak nduk, mippinaniyak aret o.

²⁰Mippinanege keenok, nit yi aakumi ndi aakumi inanebunu alik inoweewi inendagembogut inarum wonogwe ti pogom logonet, ninawone mbangge, wim namburiyak nduk, lengganninake, eeke logogin o.”

²¹Yogo mbareegwa, at Tamuwen nen it wone yoreegwaarak nogo konengge nagagerik, mbininogo Aliku ALA yoge mbareegi,

²²Aliku ALA nen, “It aakumi nggino yokkugwi ti, konengge logomenggendik, aap inowe endagembogut ambi inake mippu o,” yinuk, yoreegerak. Yoge mbareegi, at Tamuwen nen aap Iterali nogo yorage logonet, “Kiname lombok aret nanip o,” yinuk, nappiyareegerak.