Read Western Dani 1 Tamuwen 9 Bible Online

1 Tamuwen 9 - Western Dani bible

1 Tamuwen 9

¹Aap ambi anebunu Mbeniyamin mendek endage Apiya. At Apiya nen Mbekorat ndake, Mbekorat nen Terot ndake, Terot nen Abiyen ndake, Abiyen nen aput Kiti ndake, eereegwaarak. At Kiti nogo eenggi warak aret wonagagerak.

²At aput wulaga ambi endage Tawun wonagagerak. At enete abu kigirikwe it Iterali inenggela'me at kokwak ambi logolik it abok aret at uum abu'me mban wonogwe iigak, at anggup nggorek inirimbaga lombok tawe wonagagerak.

³Ne ambi paga Tawun ogoba aap Kiti nogo aanggumi keledai kobak ogo mbareegwa, at Kiti nen apuluk Tawun nogo yoge, “Nayeloman ambi kimbirak keledai nogo kwaaginabi nanip o.”

⁴Yorage mbareegi, imbirak nen o Eparayim nggelok-nggobok me kwaarinabeegwaarak mendek lek mbareegwa, o Talita enaagan-ambokan kwaarinabit nogogwaarak mendek lek mbareegwa, o nggween Takalim nogome kwaarinabit nogogwaarak mendek, lek mban mbareegwa, aakumi Mbeniyamin mendek iname kwaaginabi nogogwaarak mendek, ineebe abu lek aret iyareegwaarak.

⁵Lek aret iigo nogogwaarik, o Tup time unggwi nanuk, Tawun nogo nen ayeloman imbirak wonage nogo yoge, “An nogoba nogo nen keledai paga iniki lunik lek nit paga iniki lunik logukwak me, niniyokan oome nawok nduk omok o.”

⁶Yoreegerak kwe, at ayeloman nen ari logonet, “Puk o, nogoba. Aap Ala wone liirogon eeka ambi o kota yime wonage me, at wone yegetak nogo abet mban age kenok, aakumi nen ayuk wuko menggaarak me, at nen, Time kwaarinabi nanip o, yinuk, yo'niraawak nduk, at aa'nduk pekka nawok o.”

⁷Yoge mbareegi, at Tawun nen ayeloman nogo yoge logonet, “Ninambi ninayuma lek age, ndi, aap Ala wone liirogon eeka ti, ninawu wogoriyak lek mban me, pekka noorak kenok, nano wonage me wogoriyak mbaken?”

⁸Yoge mbareegi, at ayeloman nen yoge logonet, “Aap Ala wone liirogon eeka nogo nen, Tu time kwaarinabi nanip o, yo'nirage kenok, onggo wogoriyak an wu mbuti perak ambiriluk ambi wonage me, pekka nawok mban o.”

⁹Yoge mbareegi, at Tawun nen ari logonet, “Op aret yagandak me, nawi o.” Yoge nagagerik, o kota aap Ala wone liirogon eeka wonage me time unggwi nawok nduk, elan me laganggwi me, komologwe niyo tooliyak wogogwaarak inom lambunggo nogogwaarik, yorogo logonet, “Aap obagari yaga nogo wonage ilik, lek a?” yinuk, yorogogwaarak. Wone, Obagari yaga, yorogogwaarak nogo ti, o maan ti eyom paga aap Ala nen yorage kagak yoraga kenok, aakumi Iterali nen endage, Obagari o, yogo nogogwaarak me, aap ambi Ala yoriyak mbake kenok, “Aap obagari yaga nogo pekka nawok o,” yinuk, yogo nogogwaarak kenok, komologwe nogo togop aret yorogogwaarak.

¹²Nogo yorogo mbareegwa, it komologwe nogo nen, “Wonage aret o. Kit peebi wogwe kiigak, at aa'nduk, o kota time yogondak iluk unggwi nage kagak wogoorak me, mugurok nanip o. O yogondak aret aakumi apit puurom paga Ala ake warogo kani kunggo logonet,

¹³at nen, Wo'niragandak Ala wa, yinuk, Ala yoge kenok, it aap inom eeriyak inayonggo piigaarak nogo Tamuwen inom mbi noorak me, nengga'lek tokkogo logukwak me nduk, mbet-mbet nage kero, o kota tu unggwogo menggam taati wonage me, ka namunggup nduk, mbet-mbet aret nanip o.”

¹⁴Yorogo mbareegwa, at Tawun ayeloman imbirak o kota nogome unggwi nawok nduk, tu unggwogo menggam ari nogwe me, at Tamuwen nogo puurom paga alut eekwi me time lagi naakit nduk wundi wage nagagerik, inom lambuneegerak.

¹⁵At Tawun nogo Tamuwen imbirak lambungga'lek kagak, o kobit at Aliku ALA nen Tamuwen yoge logonet,

¹⁶“It aakumi Iterali mendek nen, Ai-ao, yogo logonet, Yeenggwa niret o, yinuk, leenggu maakwi iigirak me, it aakumi Pilitin mendek ineenggime nen inagap ndake logowak nduk, o ko'lu oonegen yogop paga aret aap ambi anebunu Mbeniyamin mendek nappi woraminggirak kimbirak lambumbunuk, an napuri aakumi Iterali inowe inarum logowak nduk, amburu anobak paga kilippunu o,” yoreegerak.

¹⁷Yoreegerak nogo ndak-ndak at Tamuwen nen Tawun imbirak abuk ogo mbareegwa, at Aliku ALA nen at Tamuwen yoge, “Kii'me an yokkigirak nogo aap yi aret o. At yi nen aret an napuri Iterali inarum logonet, wone lengganogo yorage logogin o.”

¹⁸Yoge mbareegi, at Tawun nogo nen Tamuwen owagam tungga pak ambe paga panggo yi nage nagagerik, yoge logonet, “Ai, nogoba. Aap obagari yaga nogo awi ngge o?”

¹⁹Yoge mbareegi, at Tamuwen nen, “Aap obagari yaga ti, an aret me, o yogondak yi eyom paga kat nimbirak mbi noorak nduk, kaa'nduk Ala yogo menggam puurom time lagi nage logot o. Mbi nenok, ko'lu o weege kenok, wone kat kiniki mbake nogo yokkege neenok, kiyokan kame aret nanok o.

²⁰Ndi, kat kaanggumi keledai kobak agaarak kagak, nogo kenagan yegendak nogo ti, muk kwaaginakaarak me, kiniki piirik logogun o. It aakumi Iterali abok iniki mbakwi nogo, Ta nen eeke logogin o, yinuk, kwaakwi nogo, kat inom, kowe-kawot inom, liippinagaga'lek mbake agandik?”

²¹Yoge mbareegi, at Tawun nen, “An nanebunu nogo ti, Mbeniyamin mendek nogo lek a? Aakumi Iterali inanebunu alitik-alitak nggwok aret iigak, an nanebunu Mbeniyamin mendek ti, abu mbuuluk aret o. Ndi, nombomini ndarak kunduk, abu meek lombok tebenak aret me, wone yi nonggop nduk yo'negen o?”

²²Yoreegerak kwe, at Tamuwen nen Tawun ayeloman nogo imbirak laago nonggo menggam o wurik me wogoren unggwi nage nagagerik, it aakumi mbi nawak nduk, yorogogwaarak ineebe 30 negen kwi'ndak iigak, enaame nggwe aap nggwok kwi'nogo menggam nogome kwippiige nagagerik,

²³aap laago lakak unde nogo yoge, “An enggaanggum larak wokkege logonet, yi ambi eeriyak me, ya nimippu o, yokkigirak nogo wonok omok o.”

²⁴Yoge mbareegi, aawi mbanak yi mendek ndi mendek obaga lunik nogo inom aret wonok Tawun owagam pi wage mbareegi, at Tamuwen nen Tawun nogo yoge logonet, “An aap ninom mbi nawok nduk, yoragarak o, ari mbaki, kake leenogo pagagerak me, nunggwi iigak, kat yi namen o.” Ari mbareegi, ne ti eyom paga at Tawun Tamuwen imbirak nunggugwaarak.

²⁵Nonggo nogogwaarik, puurom lako menggam time nen wambi woraanuk, o kota Tamuwen ame nogome unggwi nogo nogogwaarik, tilaabaga wone mbanggwi nogo yereegwaarak.

²⁶O weerikit nduk kilim nagake kagak, at Tawun tilaabaga nogo yege me, Tamuwen nen Tawun yoge logonet, “Nappagi naakit nduk, keenik aru o.” Yoge nagagerik, imbirak aret oome nen wundi nogo nogogwaarik,

²⁷o kota wundi nawak nduk, eeko logonet, Tamuwen nen Tawun yoge, “Ala nen yegerak nogo yokkirikit nduk, ya'i puk age keegak, kayeloman nage logowak nduk, yoru o,” yoreegerak.