Read Western Highland Purepecha San Mateo 12 Bible Online

San Mateo 12 - Western Highland Purepecha bible

San Mateo 12

¹Jesusi sábadu ma jimbo, tríju jatsikatarhu isï parhiakuxapti, ka jurhengorheri jémbechaksï tríjuni kuarhajtsïkupaxapti ka arhasïremptiksï jimbokaksï karhimaxapka.

²Fariseuechaksï jurhengorherichani exearini, Jesusinksï arhispti: “Eraa chéti jurhengorherichani, iásï enga mintsikorhekuejka, imani ambeksï úxati enga juramukua no jiáretpejka.”

³Ka Jesusi arhiantaaspti: “¿Andi nójtsï méni arhintaski ambe enga úpka Dabi, jiájkani enga ima ka pámpiri jémbechaksï k'arhimani jápka?

⁴Na enga Dabi tiósïo inchapka ka kurhinda újchakurakatechanksï auaspti engaksï no sésekua jatsipka arhani, engaksï tátechajku sésekua jatsijka arhani.

⁵¿Andi Moisesiri juramukuarhujtsï no arhintaski? Na engaksï sábadu, tátecha ánchekorhejka ka nóksï k'amanharhiranhantasïndi.

⁶Jíksïni arhixaka, eska ixu jarhaska ima enga sánderu k'érika eska tiósïo.

⁷Engajtsï jánhaskapiringa ambe enga arhikuekajka: ‘P'amojkperakuasïni uéjka ka no parhandikua kéjtsïtakua ambe’, nójtsï ísku jatini k'amanharhirantaapiringa imani engaksï nómbe ma arhikueka.

⁸Ka Acheti Uájpa, sábadujtu juramukua jatsisti.”

⁹Jesusi kéndikusti ka jima anapu k'umanchekua tángorhentskuarhu inchaspti.

¹⁰Ka jima jarhaspti ma enga ma akandani k'urhujkupka, ka nónaksï Jesusini k'amanharhitantani ísïksï kurhamarhespti: “¿Andi sésekua jarhaski sábadu ambakerpentani?”

¹¹Ka Jesusi arhiaspti: “Jaki cha ma ísï enga karichini ma kámka, ka karichi sábadu nani uekanheni, ¿Andi nójtsï p'ínhantasïnki?

¹²¡Néuejki sánderu jukaparhasti eska karichi ma! Ísï jimbo sésekua jarhasti sábaduechani sési ambe úni.”

¹³Ka k'urhujkurhani arhispti: “Ióxurhantsï.” Ka k'urhujkurha ióxurhantaspti, ka sési ambajkurhantaspti eskamendu máteru akandani.

¹⁴Ka fariseuecha engaksï uéntapka, eratsekuntaxapti néna engaksï Jesusini uándikupiringa.

¹⁵Jesusi mítetini ambe engaksï eratseni jápka, kéndikukuaspti, ka uánekuaksï chúxapaspti ka ima iámenduechani ambakerantaaspti,

¹⁶ka juramukuasïrempti eskaksï no jámapiringa imeri ambe uandantani;

¹⁷ka ísï úkorheni enga Diósïri uandari Isaiasï uandaka:

¹⁸“Ísti jucheti jántspiri engani ji erakuka, engani ji xáni uéjka, enga jucheti álmani xáni tsíperajka. Jucheti Espirituni indeni andajtsïteraaka ka iámendu iretechani aianguantauati ambe enga Diósï uéjka.

¹⁹No uandakorheati ka nójtu uinhachaati, ka xanharu isï nónema kurhauati.

²⁰No k'amatakuati p'atamuni enga kuarhajtsïtini jaka, ka no párhutaati piruakuani enga sïraantsïnderku jakaia, eka no urheta xérpeaka ambe enga Diósï uéjka.

²¹Ka iápuru isï anapuechaksï imeri jakangurhikuani mintsikaati.”

²²Jesusinksï achetini ma pérakuspti enga nóambakiti incharhepka, ka enga pátenharhipka ka nunuxini, ka Jesusi ambakerantaspti ka ima úspti exeni ka uandani.

²³Iámenduksï ísku pakareraspti ka uandasïremptiksï: “¿Íxamu Dabidi Uájpe?”

²⁴Ka fariseuechaksï ísï kurharini uandasïrempti: “I Belsebu, k'éri nóambaki jimbosï nóambakitichani petarhpeantajti.”

²⁵Jesusi mítetini ambe engaksï ima eratseni jápka, arhiaspti: “Eka irechekua ma arhukurhitini jauaka, ima irechekua k'amakurhiati, ka nóma k'éri ireta óksï ma k'umanchekuarhu anapuecha jauatiteru engaksï arhukurhitini jauaka.

²⁶Ka eka nóambakiti jandiojku uérhekorhentaska, arhukurhitixati; ¿Imeri irechekua néna jauateru?

²⁷Ka ekani ji nóambakitichani, k'éri nóambakitini jimbo petarhejpeantajka, ¿Ne jimboksï petarhpeantasïnki ima engaksïni chánksïni chúxapajka? Imaksïni xarhataxati eskajtsï cha támu ísï jámaxaka.

²⁸Ka ekani ji nóambakitichani Diósïri Espirituni jimbo petarhpentajka, sési jimbo, Diósïri irechekuaksïni janochestia.

²⁹¿Néna ua nema acheti uinhapitini ma inchakuni, ka jatsikorhekua ambe iámu petakuni? Eka no urheta jótaska, jiájkani k'óru úati ambe petakuni.

³⁰Ima enga no jíndeni jingunika, ikiachesïndirini, ka ima enga no jíndeni jinguni tánantajka, arhukpesïndi.”

³¹“Ísï jimboksïnisï ji arhini jaka, eska náki uéjki ma k'amanharhintskua ka nósesi ambe engajtsï uandaaka, púamenhantaakajtsï. K'óru ima enga Espirituni útakuaka, nómeni púamenhantaati.

³²Ne uéjki enga Acheti uájpani útakuaka, púamenhantaati, k'óru ima nómeni púamenhantaati enga Espiritu Sántuni útakuaaka.”

³³“Enga anhatapu ambakejka, amanhejchakua ambakesïndi, ka enga anhatapu no ambakejka, amanhejchakua no ambakesïndi; amanhejchakua anhatapu jimbo exenhasïndi.

³⁴¡Akuitseni járhaticha! ¿Néna jimbojtsïsï no ambakeparini sési ambe uandajki? Ambe enga mintsitarhu jatanhenhajka ima ambe uandanhasïndi.

³⁵Ima engaksï ambarhaka, sési jásï mintsita jimboksï, sési ambeksï uandasïndi, ka nóambarhatichaksï nósesi jásï ambe uandasïndi, jimbokaksï nósesi jásï ambe jatarixaka.

³⁶Ka jíksïni arhixaka eska ima jurhiatekua enga arhinharhikperanhaaka, eska táchani ísï mókukorhenhaaka ísku jásï uandakuechani jimbo enga xáni uémuskorhenhaka.

³⁷Ambe engari uandaaka, imani jimbori arhikua o nómbe ma arhikueuaka.”

³⁸Máruksï juramukua jurhentpiricha ka fariseuechaksï mókukuntaspti: “Jurhentpiri, milagruchi ma uékasïnga exeni.”

³⁹Ka Jesusi arhiantaaspti: “Iásï anapu no ambarhaticha ka ísku jándichaksï milagru ma kurhajkorhexati, k'óruksï nóteru ma milagru xarhatamenhaati, imantku enga Diósïri uandari Jonasi úmenhaka.

⁴⁰Eskamendu Jonasi tanimu jurhiatekua na jápka k'éri kurucheri k'úparhatarhu, Acheti uájpajtu tanimu jurhiatekua echerirhu inchatsetini jauati.

⁴¹Nínibe anapuechaksï iásï anapuechani útatsperakuarhu arhinharhikuauati, jimbokaksï ima Jonasiri arhijtsïkperatani kurharini, Diósïni andarhentaspka, ka ima enga ixu jaka, Jonasi jinguni sánderu k'éristi.

⁴²Nana irecha kétsekua ísï anapu, iásï anapuechani útatsperakuarhu arhinharhikuauati, jimboka ima iauani uératini jurhaspka Salomoniri mímixekuani kurhani, ka ixu jarhasti ima enga Salomoni jinguni sánderu k'érika.”

⁴³“Enga nósesi jásï ma espiritu uérhpentajka, k'arhikjandu jámani jarhasïndi jirinhantani nani mintsikorheni, ka no exentasïndi.

⁴⁴Jiájkani uandasïndi: ‘Juchenio níntaaka.’ Ka enga niántajka, nónemani exentasïndi ka sési k'arhatakata ka sésesi ambantskantskata jarhasïndi.

⁴⁵Ka nirasïndi ka pájtaasïndi máteru iúmu tsimani espirituechani, sánderu nóambarhatichani, ka incharhpesïndiksï ka jimaksï irekorhesïndi, ka acheti sánderu nósesi úkorhenchasïndi. Iásï anapuechajtuksï májkueni úkorhenchaati.”

⁴⁶Enga Jesusi útasï uandani jápka, amamba ka erachi jémbechaksï uérakua jarhaspti, ka ima jingunksï uandaxeni uékaxapti.

⁴⁷Ka nema Jesusini arhispti: “Chéti nánde ka chéti erachichaksï uerakua jarhasti, ka t'úngeni jingunksï uékasïndi uadaxeni.”

⁴⁸Jesusi arhintaspti imani enga íni ambe arhini jápka: “¿Néski jucheti nánde ka néksïsï jucheti erachi?”

⁴⁹Ka jurhengorheri jémbechani t'antsiraaparini uandaspti: “Íksïsï jucheti nándeti ka jucheti erachinksï,

⁵⁰jimboka ima enga újka ambe enga jucheti Táte uéjka enga auandarhu jaka, jucheti erachisti ka jucheti pirenchisti ka jucheti nándesti.”