Read Western Highland Purepecha San Mateo 14 Bible Online

San Mateo 14 - Western Highland Purepecha bible

San Mateo 14

¹Ima jurhiatekuechani, Erodesi Antipasï enga Galilea juramuni jápka, Jesusiri ambe mítespti, jimboka imeri ambeterku uandanhaxapkia,

²ka arhiaspti imeri jántspirichani: “I Juánu itsï atajtsïkpiristi, tsíntasti, jimbosï xásï uinhapekua xarhatajti.”

³Ma xanhari Erodesi Juánuni jupirkorhespti ka ónhatarkorheni, Erodiasïni jimbo, enga imeri erachi jémba Filipueri témbepka.

⁴Jimboka Juánu arhisïrempka: “Nóri sésekua jatsiska indeni uarhiti jinguni jarhani.”

⁵Ka Erodesi uékasïrempti Juánuni uándikuni, k'óru iretani chérhesïrempti jimbokaksï Juánuni Diósïri uandarini exesïrempka.

⁶Ka jiájkani enga Erodesi máteru uéxurhini andangutapka, Erodiasï uájpa uátsï, kéjpespti uarhani, ka Erodesi kánekua jaiapanhentaspti,

⁷enga aiakorhepka íntskuni iámendu ambe enga ima kurhakupiringa.

⁸Ka t'uíni amamba arhistakutixaptia, ka ima nanaka Erodesïni arhispti: “Iáiasïrini Juánu itsï atajtsïkpiriri éjpuni íntsku urhani ma jimbo.”

⁹Ka irecha Erodesï kánekua kómu p'ikuarheraspti, jimboka p'ímarhekatechani japarini aiakorhespka, ka juramuspti eskaksï íntskupiringa.

¹⁰Juramusti eskaksï Juánuni k'ataperakuarhu kachujchakupiringa.

¹¹Ka uátsïnksï Juánueri éjpu urhanirhu ma pákuspti, ka ima amambani íntskuntaspti.

¹²Juánueri jurhengorherichaksï niraspti Juánuni p'íntani ka jatsintasptiksï, ka tátsekuaksï niraspti Jesusini aianguntani.

¹³Enga Jesusi mítepka, jandiojku icharhutarhu ma jimbo niraspti jima enga nónema jámempka. Enga mítekorhepka, iretecharhu uéakunhaspti ka xanharakorhepasptiksï chúxapani.

¹⁴Enga Jesusi icharhutarhu kétseni jápka, uánekua exejpespti; ka p'amojkuaspti ka p'amenchatichani ambakerantaaspti.

¹⁵Ka tirimarhandu, jurhengorheri jémbechaksï andarheraspti ka arhisptiksï: “Ixuesï no irekanhasti ka chúrexatia. Axajpentsï, jurakue ninhani iretecharhu t'irekua ambe piákorhenhani.”

¹⁶Ka Jesusi arhiaspti: “Ambejtuksï úni niua; cha t'ireraa je.”

¹⁷Ka imaksï uandaspti: “Iúmu kurhindechani ka tsimani kuruchechantkuchisï káani jaka.”

¹⁸Ka Jesusi arhiaspti: “Juácheajtsïni je.”

¹⁹Jiájkani juramuspti eska uitsakuarhu uaxandenhapiringa, ka iúmu kurhindechani ka tsimani kuruchechani p'íkuaspti, ka erancheparini újchakuraspti, ka jurhengorheri jémbechani íntsaapti ka imaksï etsakuspti.

²⁰Iámenduksï uiniarhantaspti t'ireni, ka pakarakataksï témbeni tsimani tsïkiata uiniri tánantaspti.

²¹Ka ima engaksï t'irepka iúmu míli ísïsptiksï, ka no miiuaparini uarhitichani ka sapichani.

²²Ísï tátsekua, Jesusi jurhengorheri jémbechani arhiaspti eskaksï icharhutani jatantapiringa, ka eskaksï urheparinga japundarhu parhimeni enga jamberi ima axajpentapiringa.

²³Ka enga axajpentapkia, jandiojku juátarhu ma karhamaspti kómarhani, ka chúrekua juátarhu jandioterku pakaraspti.

²⁴Ka icharhuta terumeni ísï niraxaptia, ka jenguerakuechaksï manamananhtsïtaxapti icharhutani jimboka tarhiata k'uanhaskuntasïrempka.

²⁵Ka erandepakua, Jesusi niraspti chúxapaani itsïrhu xanharapani.

²⁶Ka jurhengorherichaksï exerini eska itsïrhu xanharaxapka, kánekuaksï chéspti ka chérakorhetinksï uinhachasïrempti “¡Uarhicha ma!”

²⁷K'óru Jesusi jimajku uandajpaaspti: “¡Ásï che je, jíska!”

²⁸Ka Pédru arhispti: “Tata engari t'úeka, juramu eskakini ji úaka andarheraaka itsïrhu xanharapani.”

²⁹Ka ima arhispti: “Juíni.” Ka Pédru icharhutarhu kétsetini, itsïrhu xanharaxapti Jesusini andarherani.

³⁰K'óru exerini na enga uinhamendu tarhiani jápka, chérakorhespti ka inchamexaptia. Ka uinhachaspti: “¡Tata p'ímantsïrini!”

³¹Ka Jesusi jupijkuspti ka arhispti: “¡Xáni engarini no mintsikajka! ¿Andirisï tsimantsimanea?”

³²Ka engaksï icharhutarhu jatantapka, nóteru tarhiaspti.

³³Ka ima engaksï icharhutarhu jápka, Jesusinksï andarheraspti ka tinguixurhikusptiksï arhini: “Sési jimbori t'u Acha Diósï Uájpeska.”

³⁴Engaksï japundarhu parhikupka, Jenesaretiksï niáraspti.

³⁵Ka engaksï jima anapuecha Jesusini mítentapka, aianguantaasptiksï iámendu jimajku isï anapuechani, ka imaksï iámendu p'amenchatichani pákuaspti;

³⁶ka kómarhisïremptiksï eska jurajkuapiringa sunundajku jupirhukukuni. Ka ima engaksï p'árhempka ambakentasïremptiksï.