Read Western Highland Purepecha San Mateo 16 Bible Online

San Mateo 16 - Western Highland Purepecha bible

San Mateo 16

¹Jimaksï andarheraspti máru fariseuecha ka saduseuecha Jesusini ts'éjkukuekani, ka arhisptiksï eska auandarhu mínda ma xarhatakuapiringa.

²Ka Jesusi arhiantaaspti: “Enga inchatirueni jarhajkia, chájtsï uandasïnga: ‘Sési jándeati jimboka charhapencheska.’

³Ka tsípkujtsï uandasïnga: ‘¡Iásï nósesi jándeati jimboka k'umanharhikuni erandeska!’ ¡Ískujtsï ísï uandasïnga. Úsïngajtsï erancheparini exeni néna enga jándeaka, ka k'órujtsï no úsïnga íni jurhiatekuechani mínda exeani!

⁴Iásï anapu no kaxumbiticha ka ísku jándichaksï mínda kurhajkorhexati. Ka nóteruksï ma mínda xarhatamenhaatia, imantku enga Diósïri uandari Jonasi úkorhenchapka.” Ka kéndikukuaspti.

⁵Engaksï Jesusi japundarhu parhikupka, jurhengorherichaksï mirikurhispti kurhinda pájtani.

⁶Ka Jesusi arhiaspti: “Exe je, jinguntku jáma je fariseuecheri ka saduseuecheri xarhiperakua jinguni.”

⁷Ka imaksï mámaru ambe arhijperaspti: “Ísïjtsïni arhixati jimbokachi kurhinda no juáska.”

⁸Ka Jesusi mítespti ka arhiaspti: “¿Andijtsïsï ísï arhijperani jaki eskajtsï kurhinda no kámsïnga? ¡Sántkujtsï jakajkusïnga!

⁹¿Nótkijtsï kurhangusïnki ka nójtsï míantasïnki engani iúmu kurhindechani jimbo, iúmu míli t'irerpepka?, ¿Namuntsï tsïkiata tánantaaspki?

¹⁰¿Andi nójtsï míasïnki engani iúmu tsimani kurhindechani jimbo, t'ámu míli t'irerpepka? ¿Namuntsï tsïkiata tánataaspki?

¹¹¿Andijtsïsï no jánhaskajki eskaksïni no kurhinda jimbosï arhini jaka? Engaksïni arhijka eskajtsï jinguntku jámaaka fariseuecheri ka saduseuecheri xarhiperakua jinguni.”

¹²Ka jurhengorherichaksï jiájkani kurhanguspti eska Jesusi no kurhinda xarhiperakuerisï arhiani jápka, eska fariseuecheri ka saduseuecheri jurhentperakua ambe jimbosï arhiani jápka.

¹³Engaksï Jesusi Sesarea niárapka, jima enga Filipu anapueka, Jesusi jurhengorheri jémbechani kurhamarheaspti: “¿Na uandanhasïnki eska néska Acheti Uájpa?”

¹⁴Ka imaksï arhintaspti: “Máruksï uandasïndi eska Juánu itsï atajtsïkpiriska, ka máteruksï uandasïndi eska Eliasïska, ka máteruksï uandasïndi eska Jeremiasïska o máteru Diósïri uandari ma.”

¹⁵Ka Jesusi kurhamarheaspti: “¿Ka cha na uandasïnki eskani ji néska?”

¹⁶Ka Simoni Pédru arhispti; “T'úrisï Krístueka, Acha Diósï tsípiti Uájpa.”

¹⁷Ka Jesusi arhintaspti: “Tsípe t'u, Simoni Jonasi uájpa, jimbokakini nónema aianguska, jucheti Táte auandarhu anapukinisï aianguntati.

¹⁸Ka ístukini ji arhixaka eskari Pédrueska ka íni k'erendarhu újtsïtaaka jucheti tángorhekuani, ka uarhikueri uinhapekua no úati andani.

¹⁹Ka auandarhu anapu mítakuechanikini t'úngeni íntsauaka: Ambe engari parhakpeni k'ataaka, auandarhujtu k'atanhaati, ka ambe engari parhakpeni kuerakuaka, auandarhujtu kuerakunhaati.”

²⁰Tátsekua Jesusi jurhengorheri jémbechani juramukuaspti eskaksï no jámapiringa uandantani eska imasï Krístueka.

²¹Jiájkani uénani Jesusi jurhengorheri jémbechani aianguantaaspti eska k'uanisïrempka eska Jerusaleni nipiranga, ka eska jini kánekua nósesi nitamanchapiringa, jimbokaksï achamasïcha ka tátecheri urhejtsïkuricha ka juramukua jurhentpirichaksï nósesi kámapiringa, ka eskaksï uándikupiringa ka eska tanimu jurhiatekua jimbo tsíntapiringa.

²²Ka Pédru Jesusini támu pératini xukaspti ka arhispti: “Tata, p'amojkukorhe ¡Nóri ísï úkorhenchaaka!”

²³Ka Jesusi p'irhipakorhespti Pédruni arhiparini: “¡Nóambakiti, kéndikucherini! Ójkutasïngarini jimbokari no ísï exesïnga eska Diósï na exejka, k'uiripuendi exesïnga.”

²⁴Tátsekua Jesusi jurhengorheri jémbechani arhiaspti: “Ima engarini chúxapakuekaaka, mirikurhikorhe, ka krúsini ichandikorhe ka chúxapuerini.

²⁵Jimboka ima enga imeri tsípekuani pátsakorhekuekaaka, sánderu tsîtaati, ka ima enga imeri tsípekuani jíndeni jimbo tsîtaaka, tsípekua jatsiati.

²⁶¿Andi ambe marhuatspea enga parhakpeni anapu ambe andakorhenhaaka, ka jini tsípekua tsîtakorhenhani? ¿Andi náxani jimbo ua nema tsípekuani piántani?

²⁷Jimboka Acheti Uájpa Tátjemberi t'íntskua jinguni ka imeri ánjelichani jinguni juuaka, ka mándani arhiati maiamuantaani imani ambe jimbo enga xáni únhaka.

²⁸Sési jimboksïni arhixaka máru engajtsï ixu jaka, nótkijtsï uarhini jauaka engajtsï no urheta exeaka Acheti Uájpani jurhani irechetspeni.”