Read Western Highland Purepecha San Mateo 17 Bible Online

San Mateo 17 - Western Highland Purepecha bible

San Mateo 17

¹Kuímu jurhiatekua jimbo, Jesusi juátarhu ma niraspti ka Pédruni ka Santiaguni ka erachi jémba Juánuni pájtaaspti.

²Ka jima imechani japarini ménderueni jáxentaspti, tata jurhiateni mereanharhintaspti, ka xukuparhakua t'íntskueni t'uput'upuxentaspti.

³Ka Moisesinksï ka Eliasïnksï exespti, engaksï Jesusini jinguni uandontskorheni jápka.

⁴Ka Pédru Jesusini arhispti: “Tata xáni engaksï sési jaka ixu, engari uéjka tanimu uapajtsïtakuechanchi úauaka, ma chétiuati ka máteru Moisesiri ka máteru Eliasïri.”

⁵Enga Pédru uandani jápkateru, janikua meremeresï ma andajtsïkueraspti ka janikuarhu uandakua ma kurhaakorhespti uandani jarhani: “I jindesti jucheti Uátsïti enga ji xáni uéjka, kurhajcha je.”

⁶Jesusiri jurhengorherichaksï íni ambe kurharini, kókuatsespti jimbokaksï kánekua chérakorhespka.

⁷Ka Jesusi andarheraaspti ka p'árheaparini arhiasti: “Jauara je, ásï jáma je chéni.”

⁸Engaksï jurhengorhericha eraapka, Jesusiniterkuksï exesptia.

⁹Ka engaksï juátarhu uératini kétsemantani jápka, Jesusi arhiaspti: “Ambe engajtsï exeka, ásï nemani aianguntsï je enga Acheti Uájpa nótki tsíntani jauaka.”

¹⁰Ka jurhengorherichaksï Jesusini kurhamarhespti: “¿Andiksïsï juramukua jurhentpiricha uandajki eska Eliasï urheta juuaka?”

¹¹Ka Jesusi arhiantaaspti: “Ísïsti eska Eliasï urheta juuaka, ka eska ima iámendu ambe sési péntaaka.

¹²Ka jíksïni arhixaka eska Eliasï jurhaskia, ka nóksï mítentasti. Kántastiksï eskamenduksï na uékaka kántani. Májkuenksï Acheti Uájpani nósesi kántaati.”

¹³Ka jurhengorherichaksï jánhaskaspti eska Jesusi Juánu itsï atajtsïkpiririsï ambe arhiani jápka.

¹⁴Engaksï k'uiripuni andarhentapka, acheti ma Jesusini andarheraspti ka tinguixurhikutini arhispti:

¹⁵“Tata, p'amojku jucheti uátsïtini, p'íntani jámsïndi, ka kánekua nósesi jarhasïndi, enga p'íntka chpírirhu uékajpesïndi o itsïrhu uékamesïndi.

¹⁶Chéti jurhengorherichani juákuaska ka nóksï ústi ambakerantani.”

¹⁷Ka Jesusi uandaspti: “¡Xáni enga no mintsikanhajka ka no kurhangunhani! ¿Andi na jatini jamberi chánksïni jinguni jauateru? ¿Na xánteruksïni tekaantaa? Axuentsï juáche je tumbini.”

¹⁸Jesusi xukaspti nóambakitini, ka nóambakiti tumbini uérhentaspti ka tumbi jimajku ambakentaspti.

¹⁹Ka jurhengorherichaksï Jesusini támu páspti ka sïpatekuarhkuksï kurhamarhespti: “¿Andisïni jucha no u petarhetantani?”

²⁰Ka Jesusi arhiaspti: “Jimbokajtsï Diósïni no kánekua mintsikasïnga. Sési jimboksïni arhixaka, eskajtsï xántku mintsikapiringa eska mostaseri tskípu nájku k'énharhijka, andeni juátantsï arhipiringa: ‘Jiniani ni’ ka juáta mótseati, ka nómbe ma jauati engajtsï no úaka úni.

²¹[Íni jásï nósesi járhatichaksï kómakua ka karhinda japarintkusï petarhetpenhantajti.]”

²²Engaksï Galilea jámani jápka, Jesusi arhiaspti: “Acheti Uájpanksï intsïnharhitpeati,

²³ka uándikuatiksï, k'óru taminu jurhiatekua jimbo tsíntaati.” Jurhengorherichaksï ísï kurharini kánekua kómu p'ikuarheraspti.

²⁴Engaksï Jesusi ka imeri jurhengorhericha Kafarnaumi niárapka, Pédrunksï andarheraspti tiósïo anapu tumina tánantsticha ka kurhamarhesptiksï: “¿Chéti jurhentpiri tumina tiósïo úrakua íntspesïnki?”

²⁵Ka Pédru: “Jo” Arhiaspti. Engaksï k'umanchekuarhu inchantapka, Jesusi Pédruni uandajpaspti ka arhispti: “¿Nári eranguntasïnki? Parhakpeni anapu irechechaksï, ¿Néchani maiamperataraasïnki? ¿Imeri irechekuarhu anapuechani o uérakua anapuechani?”

²⁶Ka Pédru arhispti: “Uérakua anapuechani.” Ka Jesusi arhispti: “Jiájkanksï irechekuarhu anapuecha nómbema íntspeati.

²⁷Nóchi ikiatauaka, japundarhu ni ka kurucha p'ímatarakuani k'uanima ka p'ímaakari kuruchani ma, arhachaku ka taiakatari exentaaka. P'íchakuntsï ka imani jimborini maiampeche ka t'újtu maiampekorhe.”