Read Western Highland Purepecha San Mateo 19 Bible Online

San Mateo 19 - Western Highland Purepecha bible

San Mateo 19

¹Jesusi íni ambe uandarini, Galilea uéakuntaspti ka Judea, iurhekua Jordanirhu parhikutini isï niraspti.

²Uánekuaksï chúxapaspti ka jima ima p'amenchatichani ambakerantaaspti.

³Máruksï fariseuecha Jesusini andarheraspti ka ts'éjkunksï arhispti: “¿Sésekua jatsiski acheti témbani ísku ambe jimbo jurajkuni?”

⁴Ka Jesusi arhiantaaspti: “¿Andi nójtsï arhintaski karakatarhu eska uénakuarhutki uératini Diósï achetini ka uarhitini kueraaska?

⁵‘Ísï jimbosï, tataka jurajkuauati tátjembani ka amambani ka tembuchaati, ka temba jingunksï májkuentaati.’

⁶Nóteruksï táchanistia, májkuentastiksïa, ísï jimbo, ambe enga Diósï kúndaka, ásï nema jarhangutpe.”

⁷Ka fariseuechaksï arhispti: “¿Ka andisï Moisesi juramutspe uarhitini karakata ma úkuni, enga arhiaka eska jurajkunhaxaka?”

⁸Ka Jesusi arhiaspti: “Jimbokajtsï cha mintsitani chuperatixaka, Moisesiksïni sésekua íntskusti uarhitini jurajkuni, k'óru urhetku no ísïspti.

⁹Jíksïni arhixaka eska ima enga témbani jurajkuaka ka máteruni tembuntani, ka jini témba no ísku jándikuni jarhani, ima ísku jándi úkorhexati.”

¹⁰Ka jurhengorherichaksï Jesusini arhispti: “Enga acheti ma tembani ísï jatsika kámani, sánderu sésisti no tembuchani.”

¹¹Ka Jesusi arhiantaaspti: “Nóksï iámenduecha íni ambe kurhangusïndi, imechajku enga Diósï kurhangukua íntsaaka.

¹²Jimbokaksï jarhaska máru engaksï no újka tembuchani jimbokaksï ísï kóndenhaska, ka jarhastiksï máteru engaksï xájkunhajka, ka jarhastiksï máteru engaksï auandarhu anapu irechekua jimbo xáxekorhejka ka nóksï tembuchasïndi. Ne enga íni ambe újka kurhanguni, kurhangue.”

¹³Jesusinksï sapirhatichani máru pákuaspti, eska ima p'ájtsïkuapiringa ka kómarhijpekuani. Ka Jesusiri jurhengorherichaksï xukaasïrempti imani engaksï sapichani páani jápka;

¹⁴ka Jesusi uandaspti: “Jurajkua je eskajtsïni sapirhaticha andarheraaka, ásï p'íngua je, jimboka auandarhu anapu irechekua imecheriska engaksï sapini járhaka.”

¹⁵Ka p'ájtsïkuaspti ka kéndikuspti.

¹⁶Tumbi ma Jesusini andarheraspti ka arhispti: “Jurhentpiri, ¿Ambesïni sési ambe ua engani jimbo úaka tsípekua méntkisï jatsini?”

¹⁷Ka Jesusi arhispti: “¿Andirinisï sési ambe kurhamarhejki? Diósïjkusï sési ambeti. K'óru engari uéjka tsípekuarhu inchani, janhanharhia arhistatsperakua juramukatechani.”

¹⁸Ka tumbi kurhamarhespti: “¿Nákichani?” Ka Jesusi arhintaspti: “Ásï uándikpe. Ásï ísku jándi. Ásï sïpajkurha. Ka ásï jáma chkuándiraparini máteruni nósesi úkuni.

¹⁹Janhanharhi táteni ka nándeni, ka xénhchpe ísï eskari t'u na xénhchakorhejka.”

²⁰Ka tumbi arhispti: “Ideni ambe úskia, ¿Ambeterusïni kuerantachajki?”

²¹Ka Jesusi arhispti: “Engari k'amak'amasï kaxumbenhchajka, atarantsï ambe engarini xáni jatsikorheka ka kómu jándichani íntsaa, ka auandarhu jauati chéti jatsikorhekua ka xásïrini chúxapaaka.”

²²Tumbi ísï kurharini kánekua kómu níntaspti jimboka kánekua jatsikorherispka.

²³Tátsekua Jesusi jurhengorheri jémbechani arhiaspti: “Sési jimboksïni arhixaka eska auandarhu anapu irechekuarhu, jatsikorheri ma kánekua úkua jinguni inchaaka.

²⁴Ménderuksïni arhixaka eska kameiu ma p'ikukueri p'orhojchakuarhu isï sánderu sóntku parhijchakuaaka, eska jatsikorheri ma Diósïri irechekuarhu inchani.”

²⁵Jurhengorheri jémbechaksï íni ambe kurharini ískuksï pakareraspti ka uandasïremptiksï: “¿Jiájkani néjkusï p'ímutanhantaa?”

²⁶Ka Jesusi erateaparini arhiaspti: “Parhakpeni anapuechanksï nómeni úati ísï úni, k'óru Diósïni jimbo iámendu ambe úsïndi úkorheni.”

²⁷Ka Pédru arhispti: “Juchaksïni t'úngeni chúxaputini iámendu ambechi jurajkuska, ¿Ambechi p'iua?”

²⁸Ka Jesusi arhiaspti: “Sési jimboksïni arhixaka, jiájkani enga iámendu ambe jimbanheranhantaaka, enga Acheti Uájpa t'íntskua jinguni uaxakatini jauaka, chánksïni engajtsïni chúxapuka, témbeni tsimani k'éri uaxantskuarhuksïni péraaka, témbeni tsimani Israeli anapu iretechani arhinharhikuani.

²⁹Ka ima enga erachichani o pirenchichani, tátjembani o amambani o témbani, sapichani, ka echeri ambe jíndeni jimbo jurajkuaka, iúmu ukuatse sánderu intsïnhantaati, ka tsípekua méntkisï anapu andakorheati.

³⁰Ka uánekua engaksï iásï k'éri ambeni jaka, xásïksï ísku nementaati ka engaksï iásï ísku nemeka, xásïksï k'éri ambeuati.”