Read Western Highland Purepecha San Mateo 22 Bible Online

San Mateo 22 - Western Highland Purepecha bible

San Mateo 22

¹Jesusi ménderu uandantskua ma arhiaspti:

²“Auandarhu anapu irechekua, ireche méni jáxesti enga uájpani tembuchatani jámani k'uínchekua úntapka.

³Ka axaaspti jántspirichani eskaksï nipiringa ióarhijpentani, ka ima engaksï uandajpanhantapka nóksï uékaspti nirani.

⁴Ménderu máteru játspirichani axaaspti ka arhiaspti: ‘Arhia je eska t'irekua jaiaraskia. Uákasï p'ukurakatechani uandikutarkorheaska, ka iámendu ambe jaiarastia, jungueksïa tembuchakuarhu.’

⁵Ka ima engaksï uandajpanhantapka ískuksï kurhajchaaspti, ma tarhekorheni niraspti, ka máteru imeri úkua ambe kámaspti,

⁶máteruksï jántspirichani jupikaaspti ka uándikuasptiksï.

⁷Irecha íni ambe mítetini, kánekua ikiaspti, ka axaaspti p'urhejkutichani ka uándikutarkorheaspti atajpitichani ka kurhupakuaspti.

⁸Ka jántspirichani arhiaspti: ‘Sési jimbo tembuchakuarhu iámendu ambe jaiarastia, ka ima engaksï uandajpanhantaka nóksï nitatarhesti.’

⁹Ni je uéramani ísï ka néni engajtsï xáni kúmaaka, p'ímarhe je.

¹⁰Ka jántspirichaksï uéraspti ka p'ímarhesïremptiksï imani engaksï kúmempka, ambakiti k'uiripuechani ka ístu no ambarhatichani ka tembuchakuarhu no jantanhenhaxaptia.”

¹¹“Enga irecha inchantapka exeani imani engaksï p'ímarhenhapka, exespti ma enga no ísï xukuparhatini jápka eska tembuchakuarhu na xukuparhanhantajka,

¹²ka arhispti: ‘Pámpiri, ¿Nénari jimbosï ísï xukuparhatini incha?’ Ka ima pínasku pakaraspti.

¹³Jiájkani irecha arhiaspti jarhojpirichani: ‘Jónduku je ka jójku je ka pájpakandu peta je; jimeuati uekua ka enga sînichani kirisïmendinhantaaka.’

¹⁴Jimbokaksï uánekua uandajpanhasïnga ka namuntkuksïsï erakunhantajti.”

¹⁵Fariseuechaksï jima kéndikuspti ka uandontskorhesptiksï néna engaksï úpiringa Jesusini ambe uandarani, ka imani jimboksï k'amanharhirantani.

¹⁶Ka máru imecheri jurhengorherichanksï erodiasïcheri jinguni axaaspti, eskaksï Jesusini arhipiringa: “Jurhentpiri, míteskachi eskari kánekua tsitisïnga jurhimbekua ambe, ka eskari sési jimbo Diósïri xanharini jurhentpesïnga eska néka, ka ískuri kurhachpesïnga ambe enga xáni uandanhani jarhajka, jimbokari t'u no k'uiripunisï sési pakarakuni jámka.

¹⁷Arhijtsïni, ¿Nári erangusïnki? ¿Sésekua jarhaski o no sésekua jarhaski Sésarini maiamuni?”

¹⁸Ka Jesusi mítetini ambe engaksï nósesi ambe eratseni jápka, arhiaspti: “Ískujtsï ísï uandasïnga, ¿Andijtsïnisï ts'éjkuni uéjki?

¹⁹Tumina taiakata májtsï exera.” Imaksï exeraspti ma enga ma jurhiatekua jimbo andanhajka.

²⁰Ka arhiaspti: “¿Nésï ixu jukanharhi, ka néri jakangurhikuasï ixu karanharhikukata jaki?”

²¹Ka imaksï arhispti eska Sésaririspka. Ka Jesusi arhiaspti: “Sésarini íntsku je ambe enga Sésaririka, ka Diósïni ambe enga Diósïrika.”

²²Íni ambeksï kurharini ískuksï pakareraspti ka kéndikukusptiksï.

²³Imani jurhiatekuaksï Jesusini saduseuecha andarheraspti, engaksï uandajka eskaksï uarhiricha no tsíntasïnga, ka kurhamarhesptiksï:

²⁴“Jurhentpiri, Moisesi uandaspti: ‘Enga acheti ma uarhiska ka nóma uájpani jurajkuni, erachi jémba uarhitini tembuntaati, ka erachi jémba k'érini uájpechani jurajkukuauati.’

²⁵Jarhasptiksï méni ísï ixu iúmu tsimani erachicha ka enga urhetipka, tembuchaspti ka nóma uájpani kángorhetini uarhispti, ka erachi jémba enga chúxapempka uarhiti jémbani tembuntaspti.

²⁶Ka májkueni úkorhenchaspti ima enga k'érini chúxapempka, ka máteru engaksï chúxapempka, iámenduksï májkueni jámaspti, sapichu jingunksï iúmu tsimani erachichespti.

²⁷Ka uarhitijtu uarhisptia.

²⁸Tsíntskuarhu, ¿Náki íni iúmu tsimani erachicheri tembeua? Nóchkaksï iámenduecha tembuspi andi”

²⁹Ka Jesusi mókukuantaaspti: “Diósïri karakatantsï támu ísï jánhaskatixaka ka Diósïri uinhapekuantsï no kurhangusïnga,

³⁰jimboka jiáni enga tsínhantaaka nóteru tembuchanhaatia, Diósïri ánjelini auandarhu anapueni járhanhantaati.

³¹Ka uarhiricheri tsíntskua ambe, ¿Andi nójtsï méni arhintaski ambe enga Diósï uandaka?

³²‘Jíska Abraniri Diósï, ka Isakiri Diósï, ka Jakobueri’ Ima no uarhiricheri Diósïsti, tsípiticherisï Diósïti.”

³³Ísï kurhanhatini, ísku pakareranhasïrempti imeri arhijtsïkperakuechani kurhanhatini.

³⁴Fariseuechaksï tángorhentaspti engaksï mítepka eska Jesusi pínamataraaspka saduseuechani.

³⁵Ka ma enga imecha jinguni juramukua jurhentpiripka, Jesusini ts'éjkukuekani ísï kurhamarhespti:

³⁶“Jurhentpiri, ¿Náki arhistatsperakua sánderu k'ériski juramukuarhu?”

³⁷Ka Jesusi arhispti: “Chéti Acha Diósïni mintsita jinguni xénhcha ka iámu chéti tsípekua jinguni.

³⁸I arhistatsperakua urhetisti ka sánderu jukaparhasti.

³⁹Ka enga chúngumajka sáno májkueni jáxesti: ‘Xénhchpeakari ísï eskari t'u na xénhchakorhejka.’

⁴⁰Íni tsimani arhistatsperakuecharhuksï Diósïri uandaricha ka Diósïri juramukua p'erandakorhesïndi.”

⁴¹Engaksï fariseuecha útasï tángorhetini jápka, Jesusi kurhamarheaspti:

⁴²“¿Krístuerijtsï ambe sáni eratsesïnki? ¿Ne uájpeski?” Ka arhisptiksï: “Dabi uájpesti.”

⁴³Ka Jesusi arhiantaaspti: “¿Néna jimbosï Dabi Espirituni jimbo Tata arhipki? Jiáni enga uandaka:

⁴⁴‘Acha Diósï jucheti, Tatani arhisti: Jurhijkandarini uaxakache, engakini jamberi chéti ikiatspirichani jandandukuarhu péracheaska’

⁴⁵Enga Dabijtu Acha arhijka, ¿Néna uájpeua?”

⁴⁶Ka nónema úsïrempti mókukuntani: Níjtuteru nema tekaueni jiáni uératini ambe kurhamarheni.