Read Western Highland Purepecha San Mateo 23 Bible Online

San Mateo 23 - Western Highland Purepecha bible

San Mateo 23

¹Jesusi arhijpespti ka jurhengorherichantu arhiaspti:

²“Juramukua jurhentpirichaksï ka fariseuechaksï Moisesiri juramukua jimbo jurhentpesïndi.

³Ísï jimbo, ambe engaksïni xáni ima arhistacheaka, kurha je ka marhuata je; k'óru ásï ísï jáma je eskaksï ima na jámka, jimbokaksï ima arhistatspesïnga néna jámani ka imaksï no ísï jámasïndi.

⁴Ts'unhapekua ambeksï arhistatspesïndi enga úkua jukajka úni, ka k'óruksï ima, ni munchujkurhakua ma manatki.

⁵Mámaru ambeksï úsïndi xarharakuekani, Diósïri karakatechanksï sánderu kóstarakata jóngorhekuecharhu karanharhikuasïndi, ka jóxurhantaasïndiksï ka jóntsïntaani;

⁶tsitisïndiksï k'érikuarhu uaxakani t'irekuecharhu ka k'umanchekua tángorhentskuecharhu.

⁷Ka eskaksï xanhari jimbo sési uandajpanhaaka, ka eskaksï: Tata jurhentpiri, arhiauaka.”

⁸“Cha ásï uéka je eskaksïni: Jurhentpiri, arhiaka, jimbokajtsï cha márkueska, chári jurhentpiri májkuesti.

⁹Ka parhakpeni ásï nemani: Tate, arhi je; jimboka májkueska Táte enga auandarhu jaka.

¹⁰Ka ásï uéke je eskaksïni: Urhejtsïkuri, arhiaka. Jimboka Krístujkusï chári urhejtsïkurika.

¹¹Ima enga chánksïni jinguni sánderu k'érika, jatsisti máteruechani marhuakuani.

¹²Jimboka ne enga k'éramakorheaka, ísku nemeni xénhaati, ka ima enga kétsekua uérajka, k'éri xénhaati.”

¹³“K'óru ¡Áke cha, juramukua jurhentpiricha ka fariseuecha, ískujtsï ísï uandasïnga! Auandarhu anapu irechekuarhujtsï míkatspesïnga, nójtsï inchasïnga ka níjtujtsï jiáretpejki eskaksï máteruecha inchaaka, engaksï inchakuekani jaka.

¹⁴¡Áke cha, juramukua jurhentpiricha ka fariseuecha ísku ísï uandaricha! ¡Jimbokajtsï uarhiti tsîndio k'amantskantasïnga, ka nónentantsï ióskutantasïnga uandatsekorheni, inde jimbojtsï cha sánderu kánekua k'amanharhiranhantaaka!”

¹⁵“¡Áke cha, juramukua jurhentpiricha ka fariseuecha, ísku ísï uandaricha! Jimbokajtsï iápuru isï jurhengorherini ma jirinhakorheni jámasïnga, ka engaksï xéntajka imechantsï sánderu chpírirhu k'uanijpasïnga.”

¹⁶“¡Áke cha, urhepatspiri pátenharhicha! Uandasïngajtsï eska nómbe ma jauaka eka nema tiósïo jimbo aiakorheni jámaaka, k'óru enga nema tiripiti tiósïo anapu jimbo aiakorhejka, aiatspetixatiia.

¹⁷¡Chájtsï no míakua jukaska ka nójtujtsï jánhaskasïnga! ¿Andi ambe sánderu jukaparhakueski? ¿Tiripiti, o tiósïo enga tiripitini ujchakuraajka?

¹⁸Ka ístujtsï cha uandasïnga: ‘Nómbema jarhasïndi eka nema kéjtsïtatarakua jimbo ambe aiakorheska, k'óru aiatspetixatiia, ne enga kéjtsïtakua jimbo ambe aiakorheska.’

¹⁹¡Inchandimecha ka no kurhandirecha! ¿Andi ambe sánderu jukaparhakueski, parhandikua o kéjtsïtatarakua? ¿Andi ambesï újchakurajki parhandikuani?

²⁰Ima enga kéjtsïtatarakuani jimbo ambe aiakorhejka, imani jimbosï uinhaperani jati, ka iámendu ambe jimbo enga jima kéjtsïtakata jaka.

²¹Ka ne enga tiósïo jimbo aiakorhejka, imani jimbo aiakorhexati, ka ístu Diósïni jimbo enga jima irekaka;

²²ka ima enga auandani jimbo ambe aiakorhejka, Diósïri k'éri uaxantskua jimbo, ka Diósïni jimbo aiakorhexati.”

²³“¡Áke cha, juramukua jurhentpiricha ka fariseuecha ísku ísï uandaricha! Engajtsï kuatsitesïni ka putsutini ka kulanduni arhutajka tiósïo íntspeni. Ka juramukuarhu anapu ambeni, imani enga sánderu jukaparhakueka mirikurhisïngajtsï úni: Sési p'ikuarhenhetpentani ka p'amojpeni ka Diósïni mintsikani. Íni ambesï k'uanijti úni ka máteru ambejtu no jurajkuaparini.

²⁴¡Pátenharhichantsï urhekupaasïnga, sïpimuntsï t'úatantasïnga ka kameiuntsï kunajkani!”

²⁵“¡Áke cha, juramukua jurhentpiricha ka fariseuecha ísku ísï uandaricha! Jimbokajtsï tsúntsuni ka urhanichani ambe kutsuparhakuantasïnga, ka chájtsï uininhetixaka sïpatspekua ambe, ka ambe enga no jurhimbekueka.

²⁶¡Fariseo pátenharhi, tsúntsuni ka urhanini jinirisï jupanhantaaka ka iámu sési jáxentaati!”

²⁷“¡Áke cha, juramukua jurhentpiricha ka fariseuecha ískujtsï ísï uandasïnga! Jimbokajtsï uarhiri jántskua urapitini járhaska, engaksï tájtsïkuni sési xarharani jarhajka, ka inchatsetini úni tereri ka karhasï ambe jarhani.

²⁸Xárhaskajtsï: Kaxumbitintsï xarharasïnga, ka k'órujtsï chkuándirakua ka ikiata ambe uininhetixaka.”

²⁹“¡Áke cha, juramukua jurhentpiricha ísku ísï uandaricha! Jimbokajtsï eratakua úkuantasïnga Diósïri uandarichani jima engaksï jatsinhantka, ka kaxumbiticheri eratakuechantsï kasïperantaasïnga,

³⁰ka uandasïngajtsï: ‘Ekachi imani jurhiatekua irekapiringa engaksï juchari tátepka, nóchi jarhojpepiringa uándikuani Diósïri uandarichani.’

³¹Íni jimbojtsï uandakorhentaxaka eskajtsï ima uájpeska engaksï Diósïri uandarichani uándikuaka.

³²¡Cháchka k'amarhuta jeia, ambe engaksï chári tátecha uénaka!

³³¡Akuitsecha, akuitseni járhaticha! ¿Andi chpírintsï néna sïpakorhekua?”

³⁴“Jíksïni axacheauaka Diósïri uandarichani ka mímixetichani ka juramukua jurhentpirichani, ka chájtsï máru uándikuauaka, ójtsï krúsirhu cháparhataani, ka máteruechantsï chári k'umanchekua tángorhentskuecharhu k'uikirheauaka, ka máteruechantsï iretecharhu isï andanguani káuaka ataani.

³⁵Ísï jimbo, chánksïni niáchentaati erakukatecheri iurhiri enga iurheka, Abeli kaxumbitiri uénani ka Sakariasi Berekiasi uájperi, engajtsï tiósïo ekuarhu ka jima enga kéjtsïtakua jaka uándikuka.

³⁶Sési jimboksïni arhisïnga eska i ambe iásï anapuechaksï maiampetaranhantaaka.”

³⁷“¡Jerusaleni, Jerusaleni engari Diósïri uandarichani uándikuajka ka tsakapkueraandi imechani engari axamenhajka! Namoni xanhari uékaspki chéti uátsïchani márkuerantaani, eska tsíkata na márkuerantaaka kereskuarhu pipichu sapinharhichani, k'óruri no uékaska

³⁸Chénio pínandentaati.

³⁹Arhixakaksïni ekajtsïni iásï uératini jíndeni nóteru exeaka ekajtsï jamberi uandaaka: ‘Újchakurakatesti ima enga Achani jimbo jurhani jaka.’”