Read Western Highland Purepecha San Mateo 25 Bible Online

San Mateo 25 - Western Highland Purepecha bible

San Mateo 25

¹“Auandarhu anapu irechekua, tembuchakuarhu méni jánhaskorheati: Témbeni iurhitskirichaksï erajkutakuechanksï p'íkuasti ka uérasptiksï tembuchani erokani.

²Iúmu iurhitskiricha, míakua jukarisptiksï ka máteruksï iúmu no míakua jukaspti.

³Ima engaksï nósani míakua jukapka, engaksï erajkutakuechani p'íkuapka tamakuaksï no pájtaspti;

⁴ka máteru engaksï míakua jukapka, jatsirakorhesptiksï tamakua ka erajkutakua jingunksï pájtakorhespti.

⁵Ka k'uírasptiksï jimbokaksï uarhixapka k'uínhchani, jimboka tembucha ióndaxapka niárani.

⁶Ka terujkani chúri kurhakorhenhaspti uinhachanhani: ¡Uéra je kókuani, tembucha janoxatiia!

⁷Ka iurhitskirichaksï jauaraspti ka erajkutakuechanksï sési jupiantaani,

⁸ka no míakua jukarichaksï arhiaspti, míakua jukarichani: Íntskujtsïni sáni tamakua jimbokaksï juchari erajkutakuecha parhukuekaxakaia.

⁹K'óruksï míakua jukaricha arhiantaaspti: Ni je piákorheni jini enga ataranhantajka, ísïchi nónema kueratancheaka.

¹⁰Ka engaksï ima nirani jápka piáni, tembucha niáraspti ka ima engaksï jinguntku jápka erokani, tembuchakuarhuksï, tembucha jinguni inchaspti, ka míkanhaspti.

¹¹Tátsekuaksï niáraspti máteru iurhitskiricha uandaparini: ¡Tata, Tata mítachejtsïni!

¹²K'óru ima arhiantaaspti: Jíksïni no míteska.

¹³Jingutku ja je jimbokajtsï no míteska na jatini ka ambe jándusï jungua.”

¹⁴“Auandarhu anapu irechekua acheti méni jáxesti, enga iauani isï nirani jámani, ioarhiapka imeri jántspirichani ka jatsikorhekua patsaraaspti.

¹⁵Méchakuani iúmu taiakata íntskuspti ka máteruni tsimani ka máteruni ma, xántku intsaaspti eskaksï xántku sésku ánchetapiringa.

¹⁶Ima enga iúmu taiakata intsïnhapka niraspti ka tuminani ánchetaspti ka máteru iúmu taiakata andaspti.

¹⁷Ka májkueni úspti ima enga tsimani taiakata intsïnhapka, ka tsimani taiakatajtu andaspti.

¹⁸Ka ima enga ma taiakatajku intsïnhapka, jarhaskuspti ka ima achetiri tuminani enga jántspekuempka inchaskuspti.”

¹⁹“Ióni jimbo, ima tata enga jántspirichani káauempka k'uanhatsentaspti, ka uandajpantaaspti tumina miiukuantaani.

²⁰Ka andarheraspti ima enga iúmu taiakata p'ípka ka máteru iúmu pérakuspti ka arhispti: ‘Tata, chájtsïni iúmu taiakata íntskuspka, inde máteru iúmu taiakatechani engani andaka.’

²¹Ka ima arhispti: ‘Sési jarhasti, sésiri ánchekorhesïnga ka mintsinharhikueskari. Sánderukini kánekua íntskuaka. Incha chéti tateri tsípekorhetarhu.’

²²Imajku andarheraspti enga tsimani taiakatecha p'ípka ka uandaspti: ‘Tata tsimani taiakatarini íntskuska: Ixuksï jarhasti máteru tsimani taiakatecha engani inde tuminani andaraka.’

²³Ka ima arhispti: ‘Sési jarhasti, sésiri ánchekorhesïnga ka mintsinharhikueskari, sánderukini kánekua íntskuaka. Incha chéti tateri tsípekorhetarhu.’

²⁴Ka andarheraspti imajtu enga ma taiakatajku intsïnhapka ka arhispti: ‘Tata, míteska eskari kánekua uinhamarhetspesïnga, ka eskari jima p'ikuntasïnga nani engari no tsíri jatsijka, ka jimari uarhojpani engari no t'u k'uajpajka;

²⁵indeni jimbosïni chéka, ka ísï jimbosïni chéti taiakatani túskuka; ixu jarhasti, ísï chétiti.’”

²⁶“Ka ima arhispti: ‘Jántspiri, nóri sési ánchekorhesïnga ka xépeskari, ekari míteka eskani no jucheti tsíri jatsikatarhu p'ikuntasïnga; ka eskani jima uarhojpantasïnga nani engani no ji k'uájpajka,

²⁷t'úri tuminani, tumina kuánetkorherichani íntsaapiringa ka jiájkani engani janoguapiringa, ji jucheti tuminani andakua jinguni p'íntapiringa.

²⁸Euantsï je taiakatani ka imani íntsku je enga témbeni taiakatecha káani jaka,

²⁹jimboka ima enga jatsika, sánderu intsïnhaati ka sánderu jatsiati; ka ima enga no jatsika, sáni ambe enga kángorhejka imani jamberi euanhaati.

³⁰Ka jántspiri no marhuarini uérakua pájpakandu peta je; jimasï ueraati ka sînichani kirisïmeantaani.’”

³¹“Jiájkani enga Acheti uájpa t'íntskua jinguni ka imeri pímbinharhati ánjelichani jinguni junguaka, imeri k'éri uaxantskua t'íntskuerikuarhu uaxakaati,

³²ka imani japarinksï iámendu iretecha tángorhentaati; ka ima máru jarhangustauati, ísï eska karichi eranguti karichi sïuangua jukarichani na jarhangustajka.

³³Ka karichichani jurhijkandani pérakorheauati, ka karichi sïuangua jukarichani uikixkandani péraauati.

³⁴Ka irecha arhiauati imechani engaksï jurhijkandani jaka: ‘Juíni je, Táte juchetiri ujchakurakatecha, p'i je irechakuani engajtsï parhakpeni k'ueraakatarhutki cha míndamenhatini jaka.

³⁵Jimbokajtsïni t'ireraska jiáni engani k'arhimani jápka, ka itsïmatantsïni engani ji k'arhichani jápka; ka sésirini erokaska engani iauani ísï jámani jápka;

³⁶xáskuni jámaxapka ka xukutaskarini; p'urhembeskarini engani p'amenchani jápka; ka niraskarini sáni kataperakuarhu eranhani.’

³⁷Ka kaxumbitichajtsïni arhiati: ‘Tata, ¿Andi na jatinksïni k'arhimaparini exeski ka t'ireranksïni? Ka ¿Andi jatinispki engaksïni jucha itsï sáni intsïmbeka engari k'arhichani jápka?

³⁸¿Andi na jatiniri uérakua isï jámaxapki ka juchaksïni sáni p'imarheni o xukutanksïni engari xásku jámani jápka?

³⁹¿Andi na jatinksïni p'amenchaparini exespki, óri k'ataperakuarhu jarhani ka niranksïni eranhani?’

⁴⁰Ka irecha arhiauati: ‘Sési jimboksïni arhixaka, engajtsï íni ma chári erachi sapichuni ísï káani jaka, jíndentsïnisï ísï kámani jaka.’

⁴¹Ka arhiauati imani engaksï uikixkandani jaka: ‘Kéndikuchejtsïni ikimekatecha, chpírirhu k'uanijpe je enga nómeni pójpejka, enga nóambakiti ka imeri ánjelichaksï úmenhaka,

⁴²jimbokani k'arhimaxapka ka nórini t'ireraska ka k'arhichaxapka ka nórini sáni itsï intsïmpeska;

⁴³iauani isï jámaxapka ka nórini sáni chénio páska, ka xáskuni jámaxapka ka nórini sáni xukutaska; k'ataperakuarhu jarhaspka ka p'amenchaxapka ka nórini sáni niraska eranhani.’

⁴⁴Ka imaksï arhintaati: Tata, ¿Andi na jatinksïni k'arhimaparini exeski ka k'arhichaparini ka iauanisïri jámani jarhani ka xásku, óri p'amenchani jarhani óri k'ataperakuarhu jarhani ka nóksïni sáni jarhuatani?

⁴⁵Ka imaksïni mókuchentaati: ‘Sési jimboksïni arhixaka, jíndenturini no jarhuataska engari íni sapichuni ma no ísï kámaka.’

⁴⁶Íchkaksï méntku ísï ikimenhaati, ka kaxumbitichaksï méntku isï anapu tsípekuani p'iuati.”